JEREMIA 3

₁Muṋe washu u ri, “Arali munna a ṱala musadzi wawe, musadzi a mu ṱutshela a vhingwa nga muṅwe munna, nṋa uyo munna mulayo u nga tenda a tshi dovha a vhinga uyo musadzi naa? Zwo vha zwi sa ḓo shata shango tshika tshoṱhe naa? Hone iwe wo vha na vhafarakano vhanzhi – zwino u vho ṱoḓa u vhuya kha Nṋe naa? ₂Sedza miṱumbani ya zwikwara u vhone. Hu hone he wa si ite vhupombwe naa? Wo dzula tsini ha nḓila u tshi lindela vhafunwa vhau, unga Vhaarabia vho lalela vhaendi phangani. Shango wo ḽi ḓodza mashika nga vhupombwe na vhuvhi hau. ₃Ndi zwe mvula ya si tsha na, na vhusuṱo ha tshifhefho ha si tsha vha hone. Wo ita unga phombwe, na u shona u sa shoni.

₄“Zwino u vho amba na Nṋe wa ri, ‘Khotsi anga! Khonani yanga u bva hanani hanga! ₅U ḓo sokou dzula wo sinyuwa naa? Mbiti dzau a dzi nga gumi naa?’ U tshi amba u ralo, hone wa ḓi ita vhuvhi nga u kona.”

₆Musi hu tshi vhusa khosi Josiasi, Muṋe washu a amba na nṋe a ri, “Wo zwi vhona zwe Israele musadzi a sa fulufhedzei a ita? O namela tshikwara tshiṅwe na tshiṅwe tshi re na muṱumba, a ya na fhasi ha miri yoṱhe yo adzaho a ita vhupombwe henefho. ₇Ndo vha ndi tshi vhona unga u ḓo ri u ita zwoṱhe hezwo a vhuya kha Nṋe, hone a si vhuye; na Juda murathu wawe a sa fulufhedzei o zwi vhona. ₈Israele musadzi a sa fulufhedzei ndo mu fha luṅwalo lwa vhuṱanzi ha uri ro ṱalana, nda mu thatha nga mulandu wa vhupombwe hawe. Juda, murathu wawe a sa fulufhedzei, a zwi vhona, hone a si ofhe. Na ene a ita vhupombwe, ₉a si vhuye a shona na luthihi. O shata shango tshika, a ita vhupombwe nga u luvha matombo na miri. ₁₀Naho zwo ralo, Juda murathu wawe a sa fulufhedzei ho ngo vhuya kha Nṋe nga mbilu yawe yoṱhe, wo vha u tshi tou vha muhoyo. Ho amba Nṋe Yahavee.”

₁₁Muṋe washu o mmbudza uri naho Vhaisraele vho mu shandukela, vha tshee khwiṋe kha vha Juda vha sa fulufhedzei. ₁₂O mmbudza uri ndi ye devhula ndi vhudze Israele ndi ri, “Iwe Israele we wa ntshandukela, vhuya kha Nṋe! Nṋe thi shanduki, a thi tsha ḓo u sinyutshela; a thi nga u sinyutsheli tshoṱhe. ₁₃Iwe tenda mulandu, u tende uri wo shandukela Yahavee Mudzimu wau wa ḓiṋekedza midzimu isili fhasi ha miri yoṱhe yo adzaho, Nṋe wa si tsha nthetshelesa. Ho amba Nṋe Yahavee.”

₁₄Muṋe washu u ri, “Inwi vhana vha sa fulufhedzei, vhuyani kha Nṋe, ni ḓo dovha na vha vhanga. Ndi ḓo ni nanga muthihi-muthihi muḓini na vhavhili-vhavhili kha mutupo nda ni ḓisa Tsioni. ₁₅Ndi hone ndi tshi ḓo ni ṋea vhalisa vha ntakadzaho, vha ni endedza nga nḓivho na ṱhalukanyo.

₁₆“Misi yeneyo musi no no anda shangoni, vhathu a vha tsha ḓo ri, ‘Ri na mbulungelo ya mulanga wa Yahavee!’ A vha tsha ḓo vhuya vha i humbula kana vha i elekanya; vha ḓo vha vha si tsha i ṱoḓa, na u ita iṅwe a vha nga iti. ₁₇Misi yeneyo vha ḓo ri Jerusalema ndi khuluṋoni ya Yahavee, na tshakha dzoṱhe dzi ḓo kuvhangana Jerusalema dza hulisa dzina ḽa Yahavee. A vha tsha ḓo ita zwine vha vhudzwa nga mbilu dzavho dza tshipimbi. ₁₈Misi yeneyo nnḓu ya Juda na ya Israele dzi ḓo ṱangana dza vha tshithu tshithihi, vha bva shangoni ḽa devhula vha ḓa shangoni ḽe nda ṋea vhomakhulukuku wavho uri ḽi vhe ḽavho.”

₁₉Muṋe washu u ri,

“Ni ri, ‘Ee, ri ḓa ha Iwe, u Yahavee Mudzimu washu. ₂₃Zwe ra luvha midzimu ya vhannḓa miṱumbani ya dzithavha a zwo ngo vhuya zwa ri farisa tshithu. Ngoho u tshidzwa ha Israele hu bva ha Yahavee Mudzimu washu. ₂₄U tou bva hanani hashu ro vhona midzimu i shonisaho i tshi ḽa mitshelo ya zwe vhokhotsi ashu vha shuma – masambi avho a dzinngu na a kholomo, vhana vhavho vha vhatuka na vha vhasidzana. ₂₅Kha ri shone ri tou lala fhasi, ri tou niwa nga ṱhoni. Ro khakhela Yahavee Mudzimu washu, roṱhe riṋe na vhokhotsi ashu; u bva hanani hashu, na ṋamusi a ro ngo thetshelesa Yahavee Mudzimu washu.’ ”