JOHANISI 16

₁“Ndi khou dzula ndo ni vhudza uri musi zwi tshi itea ni sa ḓo tou tshenuwa na vho gunea. ₂Vha ḓo ni tumula zwivhidzoni. Nahone tshifhinga tshi khou ḓa tshine muthu a ḓo ri a tshi ni vhulaha a vhona unga ndi hone a tshi khou ṋekedza Mudzimu nduvho. ₃Vha ḓo ni ita zwithu izwo ngauri hu Nṋe, hu Khotsi, a vha ri ḓivhi. ₄Hone Nṋe ndi dzula ndo ni vhudza uri tshifhinga tshazwo tshi tshi swika ni elelwe uri ndo ni vhudza.

“Ndi sa ni vhudzi zwithu izwi mathomoni ndi uri ndo vha ndi tshi kha ḓi vha na inwi. ₅Hone zwino ndi khou ṱuwa, ndi ya ha o nthumaho; tshi kanukisaho ndi uri a hu na na muthihi waṋu ane a vhudzisa hune nda ya. ₆Zwino ndó no ni vhudza mbilu dzaṋu dzi vho vhavha. ₇Naho zwo ralo ndi ni vhudza ngoho ndi ri, u ṱuwa hanga ndi u ni tonda, ngauri nda sa ṱuwa, Mutiki ha nga ḓi kha inwi; fhedzi nda ṱuwa, ndi ḓo mu ruma. ₈Huno Ene a tshi ḓa u ḓo rovhedza shango a ḽi sumbedza uri vhutshinyi ndi mini, na uri vhuvhuya ndi mini na uri khaṱhulo ya Mudzimu ndi tshithu-ḓe. ₉U ḓo rovhedza shango vhutshinyi nga u ḽi sumbedza uri a ḽo ngo tenda Nṋe; ₁₀u ḓo sumbedza shango uri a re muvhuya ndi Nṋe ngauri ndi khou ya ha Khotsi, a ni tsha ḓo mmbona; ₁₁u ḓo vha rovhedza uri khaṱhulo ya Mudzimu ndi yone-yone nga u vha sumbedza uri muvhusi wa ḽino shango o no ḓi haṱulwa.

₁₂“Ndi tshee na zwinzhi zwine nda nga ni vhudza; ndi ro vhona uri a ni athu swika hune na nga zwi ṱalukanya. ₁₃Hone hu tshi ḓo ḓa Ene Muya Muḓivhadzangoho u ḓo ni dededza na ḓivha ngoho yoṱhe. Ha nga ambi zwawe; u ḓo amba zwenezwo zwine a ḓo vhudzwa, a ni vhudza na zwine zwa kha ḓi ḓa. ₁₄Ene u ḓo ita uri Nṋe ndi rendwe, ngauri zwoṱhe zwine a ḓo ni vhudza zwi ḓo vha zwi tshi bva kha Nṋe. ₁₅Zwoṱhe zwe re zwa Khotsi anga ndi zwanga; ndi zwe ndi tshi amba nda ri, ‘Zwoṱhe zwine a ḓo ni vhudza zwi ḓo vha zwi tshi bva kha Nṋe.’

₁₆“Hu si kale a ni tsha ḓo mmbona; hone hu ḓo dovha he hu si kale na mmbona.”

₁₇Vhaṅwe vhafunziwa vhawe vha vhudzisana vha ri, “Nṋa u amba mini a tshi ri, ‘Hu si kale a ni tsha ḓo mmbona, hone hu ḓo dovha he hu si kale na mmbona’; nahone a dovha a ri, ‘Ndi khou ya ha Khotsi anga’? ₁₈Zwino a tshi ri, ‘hu si kale’ u amba mini? Riṋe a ri khou vhuya ra pfa na uri u khou amba mini!”

₁₉Yesu o zwi ḓivha uri vha khou ṱoḓa u mu vhudzisa; ndi zwe a vha vhudza a ri, “Ndo ri hu si kale a ni tsha ḓo mmbona, hone hu ḓo dovha he hu si kale na mmbona. A si zwenezwo zwine na khou vhudzisana zwone kani? ₂₀Zwino ipfani-ha: Inwi ni ḓo lila lwa u lila, shango ḽone ḽo ḓitakalela. Inwi ni ḓo ṱungufhala, hone u ṱungufhala haṋu hu ḓo shanduka ha vha dakalo. ₂₁Musi musadzi a tshi ṱoḓa u vhofholowa, u wana o tou ṱungufhala, ngauri tshifhinga tshawe tshi vha tsho swika; hone ṅwana o no bebiwa u hangwa u vhavha hazwo, ngauri u vha a tshi vho takadzwa nga muthu muswa o ḓaho shangoni. ₂₂Na kha inwi zwo tou ralo; zwino no ṱungufhala, hone musi ndi tshi ḓo dovha u ni vhona ni ḓo takala nahone a hu nga vhi na ane a nga ni dzhiela dakalo ḽaṋu.

₂₃“Musi wazwo a ni tsha ḓo vhuya na mmbudzisa na tshithu. Zwino ipfani-ha: Zwoṱhe zwine na humbela Khotsi nga dzina ḽanga u ḓo ni fha. ₂₄U swika zwino a ni athu vhuya na humbela tshithu nga dzina ḽanga. Humbelani, ni ḓo fhiwa, uri dakalo ḽaṋu ḽi khunyelele.

₂₅“Tshifhinga tshoṱhe ndo vha ndi tshi ḓi amba na inwi nga zwifanyiso; hone hu khou ḓa tshifhinga tshine ndi tshi amba na inwi nga Mudzimu Khotsi nda ḓo tou phula, ndi si tsha amba nga zwifanyiso. ₂₆Maḓuvha eneo ni ḓo humbela Khotsi zwithu nga dzina ḽanga; a hu tsha ḓo vha Nṋe a no ni humbelela, ₂₇ngauri Khotsi Ene muṋe u a ni funa, vhunga na inwi no mpfuna na tenda na uri ndi bva ha Mudzimu. ₂₈Nṋe ndi tshi ḓa fhano shangoni ndo vha ndi tshi bva ha Khotsi; zwino ndi khou ṱuwa shangoni, ndi vhuelela ha Ene Khotsi.”

₂₉Ndi hone vhafunziwa vhawe vha tshi ri, “A vha vhoni-ha Vhafunzi, zwino vha vho tou bula; a vha tsha amba nga zwifanyiso. ₃₀Zwino ri vho zwi vhona uri vha ḓivha zwithu zwoṱhe; a vha vhuyi vha thoma u vhudziswa, ndi zwine ra tenda uri vha bva ha Mudzimu.”

₃₁Yesu a tshi vha fhindula a ri, “Ndi hone zwino no tenda? ₃₂Hu khou ḓa tshifhinga – na zwino tsho no ḓi swika – tshine noṱhe na ḓo balanganywa muṅwe na muṅwe a ya hawe, Nṋe na ntsia ndi ndoṱhe. Hone Nṋe a thi ndoṱhe, Khotsi anga u na Nṋe. ₃₃Ndi tshi ni vhudza hezwi zwithu ndi u itela uri ni vhe na mulalo nga u vha vhathihi na Nṋe. Shangoni ḽino ni ḓo tambudzwa, hone ni songo fhela mbilu; hufha Nṋe shango ndo ḽi kunda!”