JOSHUA 13

₁Joshua zwino o vha o no kalahesa. Muṋe washu a amba nae a ri, “Wo kalahesa, hone hu kha ḓi vha na shango ḽihulu ḽine ḽa kha ḓi fanela u dzhiwa: ₂shango ḽoṱhe ḽa Filista na Geshuru, ₃kathihi na shango ḽa Vhaavi u ya tshipembe. Ndi shango ḽine ḽa thoma mulambwanani wa Shihoro, masakhani na Egipita, u vhuya u swika masakhani na Ekroni thungo ya devhula, ḽo vha ḽi tshi pfi ndi ḽa Vhakanana; mahosi a Vhafilista o vha a tshi dzula Gaza na Ashidodo na Ashkeloni na Gathi na Ekroni. ₄Hu kha ḓi vha na shango ḽoṱhe ḽa Vhakanana u bva Ara, ḽe ḽa vha ḽi ḽa Vhasidoni, u vhuya u swika Afeke masakhani a Vhaamori; ₅shango ḽa Vhagebali; ḽoṱhe ḽa Libanoni u ya vhubvaḓuvha, u bva Baali Gadi tshipembe ha thavha ya Heremoni u swika Pharani ya Hamathi. ₆Hu katelwa na shango ḽoṱhe ḽa Vhasidoni, vhane vha dzula tshivhangani vhukati ha thavha dza Libanoni na Misirifotho Maimi. Vhathu vhoṱhe havho ndi ḓo vha thatha musi Vhaisraele vha tshi swika. U kovhekanye Vhaisraele iḽo shango nga mamvaṱe nga he nda u laya. ₇Zwino-ha, kovhekanya maṅwe matsinde maṱanu na maṋa shango heḽo, na hafu ya tsinde ḽa Manase, vha ḽi dzhie ḽi vhe ḽavho.”

₈Matsinde a Rubeni na Gadi na hafu ya tsinde ḽa Manase vho vha vho no ḓi wana shango ḽe Mushe muḓinḓa wa Muṋe washu a vha o vha ṋea; ho vha vhubvaḓuvha ha mulambo wa Jorodani. ₉Shango ḽavho ḽo vha ḽi tshi swika Aruere, lumemeni lwa govha ḽa Arinoni na muḓini u re vhukati ha govha ḽeneḽo, ḽa katela na muvhundu woṱhe u bva Medeba u swika Diboni, ₁₀ḽa swika na masakhani a Amoni, ḽa katela na miḓi yoṱhe ye ya vha i tshi vhuswa nga Sihoni khosi ya Vhaamori we a vha a tshi vhusa Hesheboni. ₁₁Ḽo vha ḽi tshi katela na Giliadi na madzingu a Geshuru na Maakha na thavha yoṱhe ya Heremoni na ḽoṱhe ḽa Bashani u vhuya u swika Salekha. ₁₂Ḽo vha ḽi tshi katela na muvhuso wa Ogo, ene wa u fhedzisela wa Vharefai, we a vha a tshi vhusa Ashtharotho na Edrei. Mushe o vha o kunda vhathu havho a vha thatha. ₁₃Hone Vhaisraele a vho ngo thatha vhathu vha Geshuru na Maakha; vho ḓi dzula kha ḽa Israele u swika na ṋamusi.

₁₄Tsinde ḽa Livi, Mushe o vha a songo vha fha shango. Vhone vho vha vho fanela u wana mukovhe wavho wa nduvho dza zwiḽiwa dzine dza ṋekedzwa Muṋe washu Mudzimu wa Israele kha aḽiṱari, nga he Muṋe washu a vhudza Mushe.

₁₅Vha miṱa ya tsinde la Rubeni, Mushe o vha ṋea kupiḓa kwa shango uri ḽi vhe ḽavho. ₁₆Shango ḽavho ḽo vha ḽi tshi swika Aruere lumemeni lwa govha ḽa Arinoni, na muḓini u re vhukati ha govha ḽeneḽo, ḽa katela na mivhundu yoṱhe yo monaho na Medeba. ₁₇Ḽo vha ḽi tshi katela na Hesheboni na miḓi yoṱhe i re muvhunduni wonoyo: Diboni na Zwikwara zwa Baali na Bethe Baali Mioni ₁₈na Jahatsi na Kedemotho na Mifaathi ₁₉na Kiriathaimi na Sibima na Tserethe Shahara tshivhangani tsha govhani ₂₀na Bethe Phioro na miedzi ya thavha ya Phisiga na Bethe Jeshimotho. ₂₁Ḽo vha ḽi tshi katela na miḓi yoṱhe i re mivhunduni ya muvhuso woṱhe wa Sihoni khosi ya Vhaamori, we a vha a tshi vhusa Hesheboni. Mushe o mu kunda, a kunda na vhavhusi vha Midiani: Evi na Rekeme na Tsuru na Huru na Reba. Vhoṱhe vho vhuya vha vhusa shango iḽo vhe magota a Sihoni. ₂₂Kha vhe vha vhulawa nga Vhaisraele ho vha hu na uḽa mubvumbi ane a pfi Biliamu ṅwana wa Bioro. ₂₃Mulambo wa Jorodani wo vha u mukano wa vhukovhela wa tsinde ḽa Rubeni. Heyo ndi miḓi na miḓana yo ṋewaho miṱa ya tsinde ḽa Rubeni uri i vhe yavho.

₂₄Miṱa ya tsinde ḽa Gadi, Mushe o i ṋea-vho tshipiḓa tsha shango uri ḽi vhe ḽavho. ₂₅Shango ḽavho ḽo vha ḽi tshi katela Jazere na miḓi yoṱhe ya Giliadi na hafu ya shango ḽa Amoni u swika Aruere, u livhana na Raba; ₂₆shango ḽavho ḽo vha ḽi tshi thoma Hesheboni ḽa swika tshikwarani tsha Mitsipha na Betonimu, u bva Mahanaimi u swika mukanoni wa Lodebara. ₂₇Govhani ḽa Jorodani ḽo vha ḽi tshi katela Bethe Haramu na Bethe Nimira na Sukotho na Tsafani, ndi tshipiḓa tsho salaho tsha muvhuso wa Sihoni khosi ya Hesheboni. Mukano wavho wa vhukovhela wo vha u mulambo wa Jorodani u swika dzivhani ḽa Khinirethe thungo ya devhula. ₂₈Heyo yo vha miḓi na miḓana yo ṋewaho miṱa ya tsinde ḽa Gadi uri ḽi vhe ḽavho.

₂₉Mushe o ṋea hafu ya tsinde ḽa Manase tshipiḓa tsha shango uri ḽi vhe ḽavho a ḽi kovhekanya a tshi ya nga miṱa yavho. ₃₀Shango ḽavho ḽo swika Mahanaimi ḽa katela ḽoṱhe ḽa Bashani, muvhuso woṱhe wa Ogo khosi ya Bashani khathihi na 60 a miḓana ya Jairi i re Bashani, ₃₁ḽa katela na hafu ya Giliadi, khathihi na Ashtharotho na Edrei, misanda ya muvhuso wa Ogo kha ḽa Bashani. Ḽoṱhe heḽo ḽo ṋewa hafu ya vhaḓuhulu vha Makhiri ṅwana wa Manase, zwi tshi tevhedza miṱa yavho.

₃₂Mushe o kovhekanya shango ḽa vhubvaḓuvha ha Jerikho na Jorodani nga u ralo musi e midavhini ya Muaba. ₃₃Huno tsinde ḽa Livi Mushe ho ngo vha ṋea shango. O vha vhudza uri mukovhe wavho ndi Muṋe washu Mudzimu wa Israele.