LUKASI 8

₁Ngavhuya Yesu a enda a tshi ḓivhadza mafhungo maḓifha a muvhuso wa Mudzimu miḓini na dziḓoroboni. O ralo e na vha 12 ₂khathihi na vhaṅwe vhasadzi vhe a pandela thuṅwa dza Saṱhane khavho, a ita na u vha fhodza vha tshi lwala; ndi Maria Magadalina we ha vhuya ha pandelwa thuṅwa ṱhanu na mbili khae, ₃na Johana musadzi wa Khuza gota ḽa Herude, na Susana, ha dovha ha vha na vhaṅwe vhanzhi vhe na vhone vha vha vha tshi farisa Yesu na vhafunziwa vhawe nga thundu dzavho.

₄Zwenezwo Yesu a tshi khou tshimbila nga u ralo a tevhelwa nga vhathu vhanzhi muḓini muṅwe na muṅwe, vha vhuya vha tou vha gogo ḽihulu. Vhenevho Yesu a vha funza nga tshifanyiso a ri, ₅“Ho vhuya ha vha na muṅwe munna we a bva a tshi yo zwala mbeu. A tshi khou zwala, iṅwe ya wela nḓilani ya kandekanywa, na zwiṋoni zwa i ḽa. ₆Iṅwe ya wela lukwarani; musi mutomba u tshi runga, wa ṋoka nge wa shaya murongwe. ₇Iṅwe ya wela mipfani, zwa aluwa zwoṱhe, hone mipfa ya pwanyeledza mutomba. ₈Hone iṅwe mbeu ya wela mavuni avhuḓi, ya aluwa ya pakata, iṅwe na iṅwe ya vha na thoro dza ḓana.” A tshi ralo a takusa ipfi a ri, “A na nḓevhe kha a ḓipfele!”

₉Vhafunziwa vha Yesu vha mu vhudzisa zwine itsho tshifanyiso tsha amba. ₁₀Ene a vha fhindula a ri, “Inwi no dzumbululelwa zwo dzumbamaho zwa muvhuso wa Mudzimu; hone kha vhaṅwe zwi tou ḓa nga zwifanyiso hu u itela uri

₁₁“Tshifanyiso itshi tshi amba hezwi: Mbeu ndi ipfi ḽa Mudzimu. ₁₂Yo welaho nḓilani zwi amba avho vhathu vhane vha ri vho pfa ipfi ḽa Mudzimu, Saṱhane a ḓa a tupula ipfi mbiluni dzavho uri vha sa ḓo ḽi tenda vha tshidzwa. ₁₃Yo welaho kha lukwara zwi amba avho vhane vha ri u pfa ipfi ḽa Mudzimu, vha ḽi ṱanganedza nga mbilu tshena, hone vhunga hu si na hune ḽa nga ṱoka midzi khavho, vha tou tenda tshifhinganyana; hu tshi ḓa tshifhinga tsha u lingwa nga Saṱhane vha a gunea. ₁₄Hune a tshi zwala ya wela mipfani zwi amba avho vhane vha ri vho pfa ipfi ḽa Mudzimu, zwi tshi ya phanḓa ḽa pwanyeledziwa nga u vhilaela zwa vhutshilo na lupfumo na madakalo a vhutshilo, vha si vhe na mitshelo. ₁₅Hune i tshi zwalwa ya wela mavuni avhuḓi zwi amba avho vhane vha ri u pfa ipfi ḽa Mudzimu nga mbilu nthihi yo ṱambaho, vha ḽi vhulunga vha sa fheli mbilu, vha vhuya vha aṋwa mitshelo.

₁₆“Ndi nnyi ane a ri o funga luvhone a lu tiba nga nkho kana a lu vhea fhasi ha mmbete naa? Ha lu vhei vhudzuloni halwo uri lu vhonetshele vha dzhenaho nḓuni? ₁₇A hu na tsho dzumbiwaho tshine tsha sa ḓo dzumbululwa, a hu na tshiphiri tshine tsha sa ḓo ḓivhiwa nga vhathu tsha bvela khagala.

₁₈“Sedzani-ha nḓila ine na thetshelesa ngayo: a re nazwo u ḓo dovha a engedzwa, a si na u ḓo dovha a dzhielwa na zwiṱukuṱuku zwine a ri u nazwo.”

₁₉Zwenezwo ha swika mme a Yesu na vharathu vhawe, hone vha si kone u swika khae nga u ḓalesa ha vhathu. ₂₀Ha swika ipfi khae ḽa uri, “Mme avho na vharathu vhavho vho ima afho nnḓa vha khou ṱoḓa u amba navho.”

₂₁Yesu a tshi fhindula a ri, “Mme anga na vharathu vhanga ndi avho vhane vha ri u pfa ipfi ḽa Mudzimu vha ita zwine ḽa amba.”

₂₂Ḽiṅwe ḓuvha Yesu a dzhena tshikepeni na vhafunziwa vhawe, a amba navho a ri, “Nga ri wetshele seli na luḽa lwa dzivha.” Vha takuwa. ₂₃Vha tshi khou wela Yesu a farwa nga khofhe. Ha vuwa ḓumbu ḽihulu henefho dzivhani, maḓi a thoma u ḓadza tshikepe, u fa na u tshila tsha vha tshithu tshithihi. ₂₄Vhafunziwa vha ḓa vha mu vusa vha ri, “Muṋe washu! Muṋe washu! Ndi hone ro lovha!” Yesu a vuwa a kaidza ḓumbu na magabelo a vhuhali ha mbo ḓi ri ṅo, ha dzika. ₂₅Ndi hone Yesu a tshi amba navho a ri, “Lutendo lwaṋu lu ngafhi?” Hone vhone vho vha vho farwa nga nyofho na ganuko vha thoma u vhudzisana nga tshavho vha ri, “Nṋa ndi muthu-ḓe uyu ane a ri u kaidza ḓumbu na magabelo zwa mu thetshelesa?”

₂₆Zwo no ralo vha wetshela shangoni ḽa Vhagerasini ḽo livhanaho na Galelia. ₂₇Musi Yesu a tshi tou bva tshikepeni, a ṱangana na muṅwe munna wa henefho muḓini we a vha e na thuṅwa dza Saṱhane. O vha o no ḓi vha maḓuvha a sa tsha vhuya a ambara zwiambaro, na hayani a si tsha dzula, a tshi dzula zwaloni. ₂₈A tshi vhona Yesu a zhamba, a wa nga magona phanḓa hawe, a ṱavha mukosi a ri, “Iwe Yesu Murwa wa Mudzimu wa ṱaḓuluṱaḓulu! U khou ṱoḓani kha nṋe? Ndi khou tou humbela nga zwanḓa zwivhili ndi ri u songo ntshengedza.” ₂₉A tshi ralo ndi nge Yesu a vha o no ri thuṅwa dzi bve khae. (Lwo vha lwo no ḓi vha lunzhi thuṅwa dzi tshi ri dzo vuwa a tou lindwa o vhoxwa zwanḓa na milenzhe nga tsimbi, hone ene a dzi ṱhukhukanya, thuṅwa dza mu livhisa sogani.) ₃₀Ndi hone Yesu a tshi mu vhudzisa a ri, “Ni pfi nnyi?” Ene a fhindula a ri, “Ndi pfi Mmbi.” A tshi ralo ndi nge thuṅwa dze dza vha dzi khae dza vha dzi nnzhi-nnzhi. ₃₁Ndi hone dzi tshi kwengweledza Yesu uri a si dzi thathele dindini.

₃₂Zwino henefho ho vha hu na sambi ḽihulu ḽa nguluvhe dzi tshi khou fundudza-fundudza bamani. Thuṅwa dza kwengweledza Yesu uri a dzi tendele dzi dzhene zwadzo kha idzo nguluvhe. Ene a dzi tendela. ₃₃Ndi hone dzi tshi mbo ḓi bva kha uyo munna dza dzhena kha nguluvhe, sambi ḽoṱhe ḽa mbo ḓi livha luwani, ḽa godimela dzivhani, ḽa nwela khothe.

₃₄Vhalisa vhadzo vha tshi zwi vhona vha shavha vha yo anḓadza mafhungo ayo muḓini na mivhunduni ya henefho. ₃₅Vhathu vha bva vha tshi yo vhona zwo iteaho. Vha tshi swika kha Yesu vha vhona uḽa munna we a bviswa thuṅwa o dzula henefho tsini ha Yesu, o ambara zwiambaro nahone o no vha muthu-muthu; vha farwa nga nyofho. ₃₆Vhe vha zwi vhona vha anetshela vhaṅwe uri uḽa munna we a vha e na thuṅwa o fhodzwa hani. ₃₇Hone vhathu vhoṱhe vha shango ḽa Vhagerasini vha mbo humbela Yesu uri a ṱuwe shangoni ḽavho, ngauri vho vha vho dzhenwa nga nyofho khulu. Ene a dzhena tshikepeni uri a humele murahu. ₃₈Zwino uḽa munna we a bviswa thuṅwa a ri, “Ndo vha ndi tshi ri ndi nga ṱuwa-vho navho.” Hone Yesu a mu dzivhisa a ri, ₃₉“Humelani kha vha haṋu, ni vha vhudze uri Mudzimu o ni tonda zwingafhani.” Uyo munna a ṱuwa, a enda a tshi ḓivhadza vhoṱhe afho muḓini zwe Yesu a mu itela.

₄₀Musi Yesu a tshi humela seli vhathu vha mu ṱanganedza vhunga vho vha vho dzula vho mu lindela. ₄₁Ndi hone hu tshi ḓa muhulwane wa sinagogo, we a vha a tshi pfi Jairosi, a wa nga magona phanḓa ha Yesu a mu humbela uri a ḓe nḓuni yawe, ₄₂ngauri ṅwana wawe muthihi fhedzi o vha a tshi khou ṱoḓou fa. Onoyo ṅwana o vha e musidzana wa miṅwaha ine ya nga swika 12.

Vhathu vha ṱuwa nae vha tshi tou mu pwanyeledza thungo dzoṱhe. ₄₃Zwino khavho ho vha hu na muṅwe musadzi we a vha o no fhedza miṅwaha ya 12 e na vhulwadze ha u ṱamba a sa gumi. [O vha o no tambisa tshelede yawe yoṱhe nga dziṅanga], hu si na na muthihi ane a kona u mu fhodza. ₄₄Uyo musadzi a ḓa nga murahu ha Yesu, a kwama lupendelo lwa nguvho yawe, u bva ha malofha ha mbo ḓi kaṱuwa na zwenezwo. ₄₅Yesu a vhudzisa a ri, “Ndi nnyi we a nkwama?” Vhoṱhe vha ḓilandulela. Pitrosi a ri, “Vhafunzi, hufha vho tou tangiwa nga vhathu vhanzhi-vhanzhi vha tshi khou vha pwanyeledza?” ₄₆Hone Yesu a ri, “Hu na we a nkwama; ndo pfa maanḓa anga a tshi bva a shuma.” ₄₇Musadzi uḽa a tshi vhona uri zwe a ita a zwo ngo dzumbama, a ḓa a tshi tou tetemela nga nyofho, a gwadama phanḓa hawe, a amba zwe a mu kwamela zwone vhathu vhoṱhe vha tshi zwi pfa; a amba na uri o mbo ḓi tou fholela henefho. ₄₈Ndi hone Yesu a tshi mu vhudza a ri, “Ṅwananga, lutendo lwaṋu lwo ni fhodza, tshimbilani zwaṋu no rudza mbilu.”

₄₉Musi Yesu a kha ḓi tou ralo ha mbo ḓi swika muḓinḓa a bvaho muḓini wa Jairosi, a ri, “Ṅwana wavho o ri sia, vha kha ḓi ṱolou dinelani Vhafunzi?” ₅₀Yesu a tshi pfa zwenezwo a ri, “Vha songo ofha tshithu, tshavho nga hu vhe u fulufhela Mudzimu; u ḓo vuwa.”

₅₁Musi vha tshi swika muḓini wa Jairosi, Yesu a si tendele muṅwe muthu a tshi dzhena nae nḓuni arali vhe si Pitrosi na Johanisi na Jakopo na vhone khotsi na mme a ṅwana. ₅₂A wana vhaṅwe vha tshi khou lila vha tshi ṱavha mukosi. Ene a amba navho a ri, “Fhumulani; ho ngo fa o tou eḓela.” ₅₃Hone vhone vha thoma u mu nzhonzhowedza, ngauri vho vha vha tshi zwi ḓivha uri o fa. ₅₄Yesu a mu fara nga tshanḓa a ri, “Musidzana, ndi ri vuwa!” ₅₅Muya wawe wa vhuya khae, a mbo ḓi vuwa na zwenezwo. Yesu a konou vha vhudza uri vha mu fhe zwiḽiwa. ₅₆Vhabebi vhawe vha akhamala. Yesu a vha laya a ri, “Vha songo vhuya vha zwi vhudza muthu.”