MATIOSI 6

₁“Ni vhone uri musi ni tshi bvisa zwifhiwa zwa vhashai ni si bvisele u vhonwa nga vhathu; arali ni tshi ita hezwo a ni tsha ḓo pfufhiwa nga Khotsi aṋu wa ṱaḓulu. ₂Iwe-ha u tshi tonda vhashai u songo thoma nga u lidza lufhalafhala sa zwine vhahoi vha ita musi vha tshi tonda vhashai sinagogoni dzavho na mikotoni. U tonda havho vhashai ndi u sokou itela u khoḓwa nga vhathu fhedzi. Zwino ipfani-ha: malamba avho vho no ḓi a wana. ₃Iwe-ha u tshi tonda vhashai, na tshanḓa tshau tshamonde tshi songo ḓivha zwi itwaho nga tshauḽa. ₄U tonde vhashai zwi sa vhonwi nga muthu. Ndi hone Khotsi au a vhonaho zwo dzumbamaho a tshi ḓo u pfufha.

₅“Na musi ni tshi rabela ni songo ita sa vhahoi vhane musi vha tshi rabela vha funa u ima sinagogoni na mikotoni uri vha vhonwe nga vhathu. Zwino ipfani-ha: malamba avho vho no ḓi a wana. ₆Iwe-ha u tshi rabela, dzhena nḓuni yau u vale muṋango u rabele Khotsi au a re ho dzumbamaho. Huno Khotsi au a vhonaho zwo dzumbamaho u ḓo u pfufha.

₇“Ni tshi rabela ni songo sokou andisa maipfi sa vhannḓa; vhone vha ri vha ḓo pfiwa nga u lapfisa thabelo. ₈Inwi-ha ni songo fana navho. Hufha Mudzimu Khotsi aṋu a tshi ḓivha zwine na lila ni sa athu na u mu humbela.

₉“Inwi-ha ni tshi rabela ni ri:

₁₄“Ndi uri arali ni tshi hangwela vhathu zwe vha ni khakhela, na inwi Khotsi aṋu wa ṱaḓulu u ḓo ni hangwela. ₁₅Hone arali ni sa hangweli vhaṅwe, Khotsi aṋu wa ṱaḓulu na Ene a nga si ni hangwele zwe na khakha.

₁₆“Musi ni tshi ḓidzima zwiḽiwa ni songo futa sa vhahoi. Vhone vha a sinyalala uri vhathu vha zwi vhone uri vha khou ḓidzima. Thetshelesani ndi ni vhudze: malamba avho vho no ḓi a wana. ₁₇Iwe-ha u tshi ḓidzima, ṱamba u ḓole ₁₈uri vhathu vha si kone u vhona uri u khou ḓidzima, zwi vhonwe nga Khotsi au a re ho dzumbamaho. Tenda Khotsi au a vhonaho zwo dzumbamaho a tshi ḓo u pfufha.

₁₉“Ni songo ḓikuvhanganyela lupfumo fhano fhasi, hune lwa lovha nga tsole na vhulali, mbava dza pwasha dza tswa, ₂₀ḓikuvhanganyeleni lupfumo ngei ṱaḓulu hune lu si lovhe nga tsole na vhulali, mbava dzi si pwashe dza tswa. ₂₁Ndi uri hune lupfumo lwau lwa vha hone, ndi hune mbilu yau ya vha hone.

₂₂“Maṱo ndi luvhone lwa muvhili woṱhe. Arali maṱo aṋu a sa lwali, na muvhili waṋu woṱhe u ḓo vha tshedzani. ₂₃Hone arali maṱo e si avhuḓi, izwo na muvhili woṱhe u ḓo vha swiswini. Zwino arali tshedza tshaṋu tsho no shanduka swiswi, ḽi ḓo vha swiswi ḽingafhani!

₂₄“A hu na ane a nga shumela vhaṋe vhavhili. A nga ḓo vhenga muṅwe a funa muṅwe; a pfa muṅwe, muṅwe a mu nyadza. A zwi tendi muthu a tshi shumela Mudzimu e phuli ya lupfumo lwa ḽino shango.

₂₅“Ndi zwone zwine nda ri ni songo ṱolou ḽa mbilu nga zwine na lila vhutshiloni haṋu na ri ni ḓo ḽani, ni ḓo nwani, ni ḓo ambarani? Kani vhutshilo a vhu fhiri zwiḽiwa? Muvhili a u fhiri zwiambaro kani? ₂₆Edzonu vhona zwiṋoni: a zwi zwali mbeu, a zwi na tshine zwa kaṋa, a zwi kuvhanganyeli maḓuluni, hone Khotsi aṋu wa ṱaḓulu u ḓi zwi ṋea zwiḽiwa. Inwi a ni zwi fhiri kule naa? ₂₇Ndi nnyi waṋu ane nga u ḽa mbilu hawe a nga lapfisa vhutshilo hawe na nga ḓuvha ḽithihi zwaḽo?

₂₈“Ni kha ḓi ḽelani mbilu nga zwa zwiambaro? Sedzani kualutshele kwa maluvha a phendephende: Ha shumi, ha luki tshithu. ₂₉Hone ndi a ni vhudza ndi ri: Solomoni na madzanga awe ho ngo vhuya a ḓiṱama u swika kha ḽiṅwe ḽao. ₃₀Arali hatsi vhune ṋamusi ha titima mudavhini matshelo ha vha ho no kudzwa tshivhasoni Mudzimu a tshi vhu ṱama nga u rali, inwi a nga kundwa ngani u ni ṱama? Fulufhelo ḽaṋu ḽo ṱukufhala hani. ₃₁Izwo ni songo tsha ṱolou ḽa mbilu na ri ri ḓo ḽani? ri ḓo nwani? ri ḓo ambarani? ₃₂Hezwo zwoṱhe ndi zwine zwa vhilaelwa nga vhannḓa. Hufha Khotsi aṋu wa ṱaḓulu a tshi zwi ḓivha uri hezwo zwoṱhe ni a zwi lila. ₃₃Tsha u thoma lusani u vhuswa nga Mudzimu na u ita zwine a funa, hezwo zwiṅwe zwoṱhe ni ḓo tou ingwa. ₃₄Izwo ni songo tsha ḽa mbilu nga zwa matshelo; ḽa matshelo ḽi ḓo ḓiḽela mbilu ḽone ḽiṋe; khombo yo livhana na musi wayo.