MATIOSI 9

₁Yesu a dzhena tshikepeni a wetshela seli na luḽa lwa dzivha, a swika muḓini wa hawe. ₂E henefho vhathu vha ḓisa munna o omaho miraḓo, o ladzwa kha hingo. Yesu a tshi vhona fulufhelo ḽavho a amba na uyo o omaho miraḓo a ri, “Rudzani mbilu ṅwananga, no hangwelwa vhutshinyi.” ₃Vhaṅwe vha vhaḓivhi vha Mulayo vha tshi zwi pfa vha ambela mbiluni dzavho vha ri, “Hoyu munna u khou tamba nga dzina ḽa Mudzimu.” ₄Yesu nga u ḓivha mihumbulo yavho a ri, “Khezwi ni tshi elekanya mavhi mbiluni dzaṋu? ₅Tshi leluwaho kha hezwi zwivhili ndi tshifhio? Ndi u ri, ‘No hangwelwa vhutshinyi haṋu,’ kana ndi u ri, ‘Takuwani ni tshimbile’? ₆Hone Nṋe ndi ḓo ni sumbedza uri Mubebwa-nga-muthu u na maanḓa a u hangwela muthu vhutshinyi fhano fhasi.” Ndi hone a tshi vhudza uḽa munna o omaho miraḓo a ri, “Takuwani zwaṋu ni hwale hingo ḽaṋu ni ye hayani.” ₇Uḽa munna a mbo ḓi takuwa a ya hayani. ₈Vhathu vho kuvhanganaho vha tshi zwi vhona vha ofha, vha renda Mudzimu we a ṋea muthu maanḓa mangafhongafho.

₉Yesu a tshi fhirela phanḓa a vhona muṅwe munna wa muthelisi a no pfi Matiosi o dzula ofisini yawe, a amba nae a ri, “Kha ri ṱuwe roṱhe ni vhe mufunziwa wanga.” A mbo ḓi takuwa a mu tevhela.

₁₀Zwino musi Yesu o dzula nḓuni ya Matiosi vha tshi khou ḽa, ha ḓa vhaṅwe vhathelisi vhanzhi na vhatshinyi, vha ḽa na Yesu na vhafunziwa vhawe. ₁₁Vhafarisei vha tshi zwi vhona vha vhudza vhafunziwa vhawe vha ri, “Nṋa mufunzi waṋu u itelani a tshi ḽa na vhathelisi na vhatshinyi?” ₁₂Yesu a tshi zwi pfa a vha fhindula a ri, “Vhathu vha sa lwali a vha lili ṅanga; ṅanga i lilwa nga vhalwadze. ₁₃Iyani ni yo guda uri zwi amba mini hu tshi pfi, ‘A thi ṱoḓi dzinduvho, ndi ṱoḓa muthu a tshi vha na mbilutshilidzi.’ Nṋe a tho ngo ḓela vhavhuya, ndo ḓela vhatshinyi.”

₁₄Ndi hone vhafunziwa vha Johanisi vha tshi ḓa ha Yesu vha ri, “Khezwi vhafunziwa vhavho vha sa ḓidzimi, ngeno riṋe na Vhafarisei ri tshi ṱolou ḓidzima?” ₁₅Yesu a vha fhindula a ri, “Nṋa ni vhona unga khonani dzi nga ḓa munyanyani wa mbingano dzi tshi ḓela u lila naa? Hufha mukwasha a tshee navho! Hone hu ḓo ḓa maḓuvha ane vha ḓo dzhielwa mukwasha wavho. Ndi hone vha tshi ḓo ḓidzima. ₁₆A hu na muthu ane a haswa tshiambaro tsha kale nga sila ḽiswa ḽi sa athu huma, ngauri ḽi tshi vho huma ḽi ḓo kherula na tshiambaro, buli ḽa endelela. ₁₇Nahone tuvhu ḽa waini a ḽi sheliwi mikhwamani ya mukumba wa kale, nga u ofha uri mikumba i nga balea musi ḽi tshi vhila, waini ya shuluwa, na mikhwama ya tshinyala. Tuvhu ḽi sheliwa mikhwamani miswa, zwa vhulungea zwoṱhe.”

₁₈Yesu a tshi kha ḓi amba eneo, muṅwe muhulwane a ḓa khae a mu gwadamela a ri, “Ṅwananga wa musidzana u kha ḓi bva u tshinyala. Naho zwo ralo, nga vha ḓe vha mu vhee zwanḓa; u ḓo dovha a tshila.” ₁₉Yesu a takuwa a ṱuwa nae e na vhafunziwa vhawe.

₂₀Vhe nḓilani ha ḓa musadzi we a vha o no fhedza miṅwaha ya 12 e na vhulwadze ha u ṱamba a sa gumi, a ḓa nga murahu ha Yesu a kwama shaphu ḽa nguvho yawe, ₂₁ngauri o vha o humbula a ri, “Nangwe nda tou kwama nguvho yawe zwayo, ndi ḓo fhola.” ₂₂Yesu a mbo ḓi rembuluwa a mu vhona a ri, “Rudzani mbilu ṅwananga; fulufhelo ḽaṋu ḽo ni tshidza.” Uḽa musadzi a mbo ḓi fhola na zwenezwo.

₂₃Zwino Yesu a tshi vho swika nḓuni ya uḽa muhulwane, a tshi vhona vhalidzi vha dziṋanga na vhathu vhoṱhe vho kuvhanganaho vha tshi khou ṱavha mikosi, ₂₄a amba navho a ri, “Ibvani zwaṋu; ṅwana ho ngo fa o tou eḓela.” Vhathu vha mu nzhonzhowedza. ₂₅Hone Yesu a vha thathela nnḓa vhoṱhe, a dzhena nḓuni a fara tshanḓa tsha musidzana uḽa o faho, musidzana a dovha a tshila. ₂₆Zwe Yesu a ita zwa pfala shangoni ḽeneḽo ḽoṱhe.

₂₇Yesu a tshi fhirela phanḓa a tevhelwa nga vhanna vhavhili vha mabofu vha tshi khou ṱavha mukosi vha tshi ri, “Murwa Dafita, a ri khathutshelwi-vho na?” ₂₈Musi a tshi dzhena nḓuni aḽa mabofu a sendela. Yesu a vha vhudzisa a ri, “Nṋa ni a tenda uri ndi na maanḓa a u ni fhodza?” Vha fhindula vha ri, “Ri a tenda Muṋe washu.” ₂₉Ndi hone Yesu a tshi kwama maṱo avho a ri, “Nga hu itee zwenezwo zwine na fulufhela.” ₃₀Maṱo avho a mbo ḓi vhona. Ndi hone Yesu a tshi vha laya o tou halifha a ri, “Ni khou vhona: hezwi zwi songo vhuya zwa ḓivhiwa nga muthu na muthihi!” ₃₁Hone vhone vho ri u bva henefho vha mbo ḓi yo anḓadza mafhungo ayo shangoni ḽeneḽo ḽoṱhe.

₃₂Musi vhaḽa vha tshi khou ṱuwa ha ḓiswa ha Yesu tshimuma tshe tsha vha tshi na thuṅwa ya Saṱhane. ₃₃A i pandela, tshimuma tsha mbo ḓi amba. Vhathu vha kanuka vha ri, “A hu athu vhuya ha vhonwa zwi no nga hezwi kha ḽa Israele.”

₃₄Hone Vhafarisei vha ri, “U pandela thuṅwa nga maanḓa e a ṋewa nga khosi yadzo.”

₃₅Yesu a mbo tshimbila na miḓi yoṱhe na dziḓorobo, a tshi enda a tshi funza sinagogoni, a tshi ḓivhadza mafhungo maḓifha a muvhuso wa Mudzimu, a tshi fhodza malwadze oṱhe na maṱungu oṱhe. ₃₆A tshi vhona magogo a vhathu a vha pfela vhuṱungu, ngauri vho vha vha tshi fana na nngu dzi si na mulisa, dzo no hanganea dzo ṱovhowa. ₃₇Ndi hone a tshi vhudza vhafunziwa vhawe a ri, “Khaṋo ndi khulu, vhakaṋi ndi vha si gathi. ₃₈Humbelani-ha Muṋe wa tsimu uri a rume vhakaṋi tsimuni yawe.”