MARKOSI 11

₁Musi vha tshi vho sendela Jerusalema, vhó no swika Bethefage na Bethania, Thavhani ya Miolivi, Yesu a mbo ḓi ruma vhafunziwa vhavhili ₂a vha laya a ri, “Iyani muḓini u re hafho phanḓa. Hu ḓo ri ni tshi kha ḓi tou dzhena khawo, na wana donngana yo hungwaho i sa athu vhuya ya namelwa. Ni i hungulule ni i ḓise fhano. ₃Arali na vhudziswa uri ni khou zwi itelani, ni ri, ‘I khou ṱoḓwa nga muṋe wayo; u ḓo i vhuisa hu si kale.’ ” ₄Nangoho vha ya vha wana donngana i mukotoni, yo hungwa tsini ha vothi ḽa nnḓu, vha i hungulula. ₅Vhaṅwe vho imaho henefho vha vha vhudzisa vha ri, “Ni khou ita zwithu-ḓe ni tshi hungulula iyo donngana?” ₆Vhone vha fhindula nga he Yesu a vha vhudza ngaho, avho vhanna vha vha litsha vha ṱuwa nayo. ₇Vha tshi swikisa iyo donngana ha Yesu vha kapea zwiambaro khayo, Ene a namela. ₈Mavhuthu a ala zwiambaro zwao gondoni, vhaṅwe vha tshi khou rema matavhi a miri masimuni, vha tshi a adza-vho gondoni. ₉Vhathu vhe vha vha vhe phanḓa hawe na vhe vha vha vhe murahu vha thoma u huvha mihuvho vha ri,

₁₁Yesu a tshi dzhena Jerusalema a fhirela thembeleni, a sedza zwoṱhe; hone vhunga ḓuvha ḽo vha ḽo no ḓi ṱuwesa, a bva a ya Bethania na vha 12.

₁₂Nga matshelo musi vha tshi khou vhuya Bethania, Yesu a farwa nga nḓala. ₁₃A vhona fhaḽa kulenyana hu na muhuyu, wo tou swifhala. A mbo ḓi ya khawo a tshi khou ṱoḓa mahuyu, hone a tshi swika a vhona e maṱari fhedzi, vhunga iṱali tsho vha tshi si tshifhinga tsha mahuyu. ₁₄Yesu a teketela uyo muhuyu a ri, “A hu tsha ḓo dovha ha ḽiwa fuyu ḽau lini na lini!” A tshi ralo vhafunziwa vhawe vho vha vho ḓi thetshelesa.

₁₅Musi vha tshi swika Jerusalema, Yesu a ya thembeleni, a thoma u pandela vhoṱhe vhe vha vha vha tshi khou renga na vhe vha vha vha tshi khou rengisa zwithu zwavho henefho, a mbo thenukanya ṱafula dza vhatshintshi vha tshelede na zwidulo zwa vharengisi vha maivha, ₁₆a sa tendele na muthu na muthihi a tshi hwala tshithu a fhira nga muṱani wa thembele. ₁₇O no ralo a konou funza vhathu a ri, “Nṋa a ho ngo ṅwalwa Maṅwaloni ha pfi, ‘Nnḓu yanga i ḓo pfi nnḓu ya thabelo ya tshakha dzoṱhe’ naa? Zwino inwi no no i shandula ‘bako ḽa mavemu.’ ”

₁₈Ayo mafhungo a swika nḓevheni dza vhotshifhe vhahulwane na vhaḓivhi vha Mulayo, vha thoma u ṱoḓa nḓila ya u vhulaha Yesu; ngauri vho vha vha tshi mu ofha nge vha vhona vhathu vhanzhi vha tshi kanuka pfunzo yawe.

₁₉Nga madekwana Yesu na vhafunziwa vhawe vha ṱuwa afho muḓini.

₂₀Nga matshelo hu tshee nga matshelonitsheloni, vha tshi khou fhira nga yeneyo nḓila vha vhona uḽa muhuyu wo no fa woṱhe u bva midzini. ₂₁Pitrosi a tshi elelwa zwiḽa zwa mulovha a amba na Yesu a ri, “Kha vha vhone Vhafunzi, uḽa muri we vha u teketela wo puta.” ₂₂Yesu a amba navho a ri, “Ni a vhona, arali ni tshi fulufhela Mudzimu ₂₃ni sa timatimi mbiluni dzaṋu, ni tshi tou fulufhela uri zwine na amba zwi ḓo itea, ni nga amba na hetshi tshikwara, na ri, ‘Takuwa u ḓipose lwanzheni!’ zwa itea. ₂₄Ndi zwone zwine nda ni vhudza uri musi ni tshi humbela tshithu nga thabelo, fulufhelani uri no no ḓi tshi wana. Ni ḓo vhona ni tshi ṋewa tshiṅwe na tshiṅwe. ₂₅Musi no ima ni tshi khou rabela, vhathu vhoṱhe vhe na vha no vha fara nga mbilu ni vha hangwele zwoṱhe zwe vha ni tshinya; ndi hone na Khotsi aṋu wa ngei ṱaḓulu a tshi ḓo ni hangwela vhutshinyi haṋu.” [ ₂₆Hone arali inwi ni sa vha hangweli, Khotsi aṋu wa ngei ṱaḓulu na Ene ha nga ni hangweli vhutshinyi haṋu.]

₂₇Vha dovha vha dzhena Jerusalema. Huno Yesu a tshi khou ḓitshimbilela thembeleni, vhotshifhe vhahulwane na vhaḓivhi vha Mulayo na vhahulwane vha lushaka vha ḓa khae ₂₈vha mu vhudzisa vha ri, “Nṋa ni tshi ita nga u ralo zwi bva kha nnyi? Ndi nnyi o ni fhaho maanḓa a u zwi ita?” ₂₉Yesu a vha fhindula a ri, “Litshani ndi thome u ni vhudzisa mbudziso nthihi fhedzi. Arali na fhindula ndi hone ndi tshi ḓo ni vhudza uri zwi bva kha nnyi ndi tshi ita nga u ralo. ₃₀Edzonu mmbudza: Zwiḽa Johanisi a tshi lovhedza zwo vha zwi tshi bva kha nnyi? Kha vhathu kana kha Mudzimu? Mphinduleni.” ₃₁Vhone vha thoma u a suka nga tshavho vha ri, “Nṋa ri nga tou ri mini? Arali ra fhindula ra ri, ‘Kha Mudzimu,’ u ḓo ri, ‘Zwino-ha na kundwa ngani u tenda zwe a amba?’ ₃₂Hu ḓi nga arali ra ri, ‘Kha vhathu ...’ ” – vha dovha vha ofha u ralo nga u ofha vhathu, ngauri muṅwe na muṅwe o vha a tshi ḓivha Johanisi e muporofita. ₃₃Ndi zwe vha tshi fhindula Yesu vha sokou ri, “A ri ḓivhi.” A konou ri, “Izwo-ha na Nṋe a thi nga ambi uri ndi tshi ita hezwi zwithu zwi bva kha nnyi!”