VHAFILIPI 4

₁Zwino-ha vha hashu, ndi ni funa hani, ndo ni ṱuvha hani, ni ntakadza hani; tshiala tshanga ndi inwi. Zwenezwo-ha vhafunwa, imani no khwaṱha ni vha Muṋe washu.

₂Inwi Iodia na Sintike, ndi khou ni kwengweledza ndi ri: anḓanani nga tshaṋu vhunga noṱhe ni vha Muṋe washu. ₃Na inwi mushumi nga nṋe a fulufhedzeaho, ndi ni humbela uri ni farise vhasadzi havho. Vho ḓidina vhe na nṋe na Klementsi na vhaṅwe vhashumisani na riṋe ri tshi anḓadza mafhungo maḓifha. Avho madzina avho a buguni yo ṅwalwaho maḽaifa a vhutshilo.

₄Vhunga ni vha Muṋe washu ndi ri: dzulani no takala! Ndi a dovha nda tou khwaṱhisa nda ri: takalani nandi! ₅Vhathu vhoṱhe kha vha ni vhone ni na vhuthu. Muṋe washu u ḓo swika hu si kale. ₆Hu songo vha na tshithu na tshithihi tshine tsha ni ḽisa mbilu; zwoṱhe zwine na lila ni vhudze Mudzimu nga thabelo, ni sa hangwi u livhuha. ₇Mulalo wa Mudzimu u sa ṱalukanywi nga muthu u ḓo linda mbilu dzaṋu na mihumbulo yaṋu uri ni dzule ni vha Khristo Yesu.

₈Vha hashu, tsho salaho ndi ri: mihumbulo yaṋu kha i livhe kha zwi re zwa ngoho fhedzi na kha zwi re na tshileme na kha zwo teaho na kha zwi si tshika na kha zwi tamisaho na kha zwi khoḓeaho – zwoṱhe zwi no nga sa hezwo, zwo fanelaho na zwi takadzaho fhedzi. ₉Ni tevhedze zwoṱhe zwe nda ni funza na ndaela dze nda ni siela na zwoṱhe zwe na mpfa ndi tshi amba na zwe na mmbona ndi tshi ita. Ndi hone Mudzimu Ṋemulalo a tshi ḓo vha na inwi.

₁₀Muṋe washu o takadza hani mbilu yanga ndi tshi vho vhona zwino ni tshi vusulusa u nndondola. U ralo a si uri no vha ni sa nndondi lini, no vha ni tshi tou shaya tshifhinga tsha u zwi ita. ₁₁Hafhu ndi tshi ralo a si uri ndi khou shaya lini; nṋe ndo no ḓiḓowedza u fushea nga zwine nda vha nazwo. ₁₂Hu vhushai, hu u vha na zwinzhi-zwinzhi, zwoṱhe ndo zwi ḓowela. Ndo no kwangwala kha zwoṱhe: hu u ḽa nda fura, hu u ṱwa na nḓala, hu u wana zwinzhi lwa u tou kalula, hu u shaya, ₁₃Muṋe washu u mpha maanḓa nda kona zwoṱhe hezwo. ₁₄Naho zwo ralo no ita zwone na mpfarisa kha vhuleme hanga.

₁₅Inwi vhaṋe Vhafilipi ni tou zwi ḓivha zwavhuḓi uri hezwiḽa ndi tshi kha ḓi tou thoma u ḓivhadza mafhungo maḓifha, ndo ri u bva ngeo Makedonia hu si vhe na tshiṅwe tshivhidzo tshe tsha ntikedza; ndi inwi fhedzi vhe na vha ni tshi ntikedza kha mbuelo yanga na tshinyalelo yanga. ₁₆Zwiḽa ndi Thesalonika ndi tshi shaya no mpfarisa na ḓi dovha. ₁₇A si uri ndi takadzwa nga zwifhiwa lini, tshine tsha ntakadza ndi u vhona mitshelo hei, ngauri yone i dovha u pfumisa inwi. ₁₈Zwino vhuṱanzi ha zwoṱhe zwe na nṋea asuho: zwo lifha mulandu zwa dovha zwa sala. Tshee Ephafrodithosi a nnḓisela zwifhiwa zwaṋu ndo no vha na zwinzhi; zwi nga nduvho yo fhiswaho i nukhelelaho i takadzaho Mudzimu. ₁₉Lupfumo lune Mudzimu wanga a ri ṋea nga Khristo Yesu a lu gumi; u ḓo ni ṋea zwoṱhe zwine na lila lwa u tou pfuka ndinganyo. ₂₀Vhugala ndi ha Ene Mudzimu Khotsi ashu lini na lini. Amen.

₂₁Inwi vhakhethwa vha Mudzimu nga Khristo Yesu ndi ri ni vhe hone noṱhe. Vhakhriste vhane nda vha navho fhano na vhone vha ri ni vhe hone. ₂₂Litshani ndi tou ri vhakhethwa vhoṱhe vha Mudzimu ngeno vha ri ni vhe hone, zwihuluhulu avha vha dzulaho pfamoni ya Khisara.

₂₃Ngavhe Muṋe washu Yesu Khristo a tshi tonda mimuya yaṋu noṱhe nga vhuthu nandi!