MIRERO 30

U ri:

Mudzimu, ndo ḓinetisa,

ndo ḓinetisa nda vhuya nda kulea nungo.

₂Nṋe a thi ngi muthu, ndi tou nga phukha;

ndi shaya ṱhalukanyo ya muthu.

₃A tho ngo guda vhuṱali nda swika

hune nda ḓivha Ene Mukhethwa.

₄Ndi nnyi we a gonya makoleni a dovha a tsela fhasi?

Ndi nnyi we a puta muya nga zwanḓa?

Ndi nnyi we a putela maḓi mahulu nga nguvho yawe?

Ndi nnyi we a tea migumo ya ḽifhasi?

Dzina ḽawe ndi nnyi?

Murwa wawe u pfi nnyi?

Ane a zwi ḓivha nga a mmbudze!

₅Maipfi oṱhe a Mudzimu o ḓi wanala e a ngoho;

ndi tshiṱangu tsha vhane vha dzumbama ngae.

₆U songo engedza maipfi awe,

a sa ḓo u kaidza,

wa vhonala uri u mudzia-u-zwifha.

₇Muṋe washu,

ndi humbela zwithu zwivhili fhedzi,

u songo nnzima zwone ndi tshi kha ḓi tshila:

₈Itou nnyilisa vhufhura na mazwifhi;

u songo mpha vhushai kana lupfumo,

u mphe zwiḽiwa zwanga zwo nnyeḓanaho fhedzi,

₉ndi sa ḓo vha na zwinzhisa nda vho u ṱamba,

nda vho ri, “Yahavee ndi nnyi?”

kana nda vha mushai nda vho tswa,

u ralo nda vha ndo nyadzisa dzina ḽa Mudzimu wanga.

₁₀U songo sasaladza mushumi u tshi vhudza muṋe wawe,

a sa ḓo u teketela wa vho zwi lifha.

₁₁Hu na vhane vha teketela vhokhotsi avho,

vha si ambe vhomme avho zwavhuḓi;

₁₂vha vhona unga vho kuna,

ngeno vho kumala;

₁₃vha dzula vha tshi ḓihudza,

vha sedza vhaṅwe nga lunyadzo;

₁₄maṋo avho ndi mapanga,

ṱhaha dzavho dzo khuba phanga;

vha ḽa vhashai fhano fhasi,

vha fhedza vhaheḓana vhukati ha vhathu.

₁₅Gulula ḽi na vhana vhavhili vha vhasidzana,

vha pfi Mphe na Mphe.

Hu na zwithu zwiraru zwi sa furi,

na tsha vhuṋa tshi sa vhuyi tsha ri,

“Zwo eḓana.”

₁₆Ndi tshalo,

ndi thumbu ya muumba,

ndi shango, a ḽi furi maḓi,

ndi mulilo,

a u vhuyi wa ri, “Zwo eḓana!”

₁₇Iṱo ḽi no sinyedza khotsi,

ḽa nyadza ndayo dza mme,

ḽi ḓo nongolwa nga mahunguvhu,

ḽi ḓo ḽiwa nga maanga.

₁₈Hu na zwithu zwiraru zwine zwa nkanukisa,

na tsha vhuṋa tshine nda si tshi ṱalukanye:

₁₉Ndi nḓila ya goni ḽi tshi fhufha makoleni,

ndi nḓila ya ṋowa luwani,

ndi nḓila ya tshikepe lwanzheni luhulu,

ndi nḓila ya munna a tshi funana na musidzana.

₂₀Maitele a musadzi wa phombwe khea:

U ri u ita vhupombwe a ṱamba,

a ri, “A tho ngo tshinya tshithu!” –

zwa nga u ḽa zwiḽiwa wa phumula milomo.

₂₁Hu na zwithu zwiraru zwi no dzinginyisa shango,

na tsha vhuṋa tshi sa konḓelelei:

₂₂ndi phuli i tshi vho vha khosi,

ndi tsilu ḽi tshi ḽa ḽa fura,

₂₃ndi musadzi a sa funwi a tshi vho vhingwa,

ndi phuli ya musidzana i tshi vho vha mufumakadzi.

₂₄Hu na zwithu zwiṋa zwiṱuku fhano shangoni,

hone zwi na vhuṱali vhuhulu:

₂₅ndi vhusunzi, zwikhokhonono zwi si na nungo,

hone vhu kuvhanganya zwiḽiwa zwaho tshilimo;

₂₆ndi mbila, zwipuka zwi si na nungo,

hone dzi fhaṱa mahaya adzo nngwani;

₂₇ndi nzie, a dzi na khosi,

hone dzi fhufha dzo ita lutsinga dzo tevhekana;

₂₈ndi tswina,

u nga ḓi i fara nga tshanḓa,

hone i dzula na pfamoni dza mahosi.

₂₉Hu na zwithu zwiraru zwine zwa tamisa zwi tshi tshimbila,

na tsha vhuṋa tshine tsha tshimbila tshihulwane:

₃₀ndi ndau,

tshone tshivhanda tsha maanḓa,

tshi sa ofhi tshithu;

₃₁ndi mukukulume u no tshimbila wo ragalala;

ndi mbokoṱo;

ndi khosi yo tangwa nga mmbi yayo.

₃₂Arali wo ḓiita tsilu nga u ḓihudza,

kana wo tanda ḽi sa fukwi,

ḓibomodze mulomo!

₃₃Wa phophisa mafhi hu sala makheṱhe;

wa rwa muṅwe ningo u bva mikota;

sa zwenezwo wa ṱunga muthu, hu vuwa nndwa.