DZIPHISALEMA 105

₁Livhuhani Muṋe washu,

mu rabeleni,

ḓivhadzani dzitshakha mishumo yawe!

₂Mu imbeleni,

mu rendeni nga dziphisalema,

aneani mishumo yawe i kanukisaho!

₃Zuwani dzina ḽawe ḽikhethwa;

mbilu dza vhane vha mu ṱoḓa nga dzi takale.

₄Ṱoḓani Muṋe washu, u na maanḓa,

lusani u dzula nae misi yoṱhe.

₅Elelwani maḓembe e a ita,

na zwiga zwawe,

na zwe a amba a tshi haṱula,

₆inwi vhaḓuhulu vha Abrahamu mulanda wawe,

vhana vha Jakopo munangiwa wawe.

₇Ndi Ene Mudzimu Muṋe washu,

muvhuso wawe u ṱanganya ḽifhasi.

₈Ha hangwi mulanga wawe na kathihi,

zwe a fulufhedzisa zwi dzula zwo ralo,

ha vhuya ha fhira mirafho ya zwigidi.

₉Ndi mulanga we a vhofha na Abrahamu,

a fulufhedzisa Isaka nga muano,

₁₀a zwi khwaṱhisa a zwi ita mulayo misi ya Jakopo,

wa vha mulanga wa lini na lini we a vhofha na Israele,

₁₁a tshi ri,

“Inwi ndi ḓo ni ṋea shango ḽa Kanana,

ḽa vha ifa ḽaṋu ḽe nda ni kovhela.”

₁₂Zwiḽa vha tshi kha ḓi vha vhathu vha si gathi,

vhe vhaṱuku sa muroho,

vhe vhatsinda shangoni ḽeneḽo,

₁₃vho tendeleka na dzitshakha,

vha mona na mivhuso,

₁₄a si tende na muthihi a tshi vha kandeledza,

a kaidza mahosi a tshi itela vhone,

₁₅a ri, “Ni songo kwama vhe nda vha shululela Muya wanga,

ni songo huvhadza vhaporofita vhanga.”

₁₆O wisa nḓala shangoni,

vha gotsha ḓula.

₁₇O vha o no ḓi rangisa Josefa phanḓa,

a rengiswa a vha phuli.

₁₈Vho mu vhofha milenzhe nga dzigeḓane,

vha mu tshipa mukulo nga tsimbi,

₁₉ha vhuya ha itea zwe a porofita,

ipfi ḽa Muṋe washu ḽa sumba uri o ima ngohoni.

₂₀Khosi yo ri a vhofhololwe,

a vhofhololwa nga muvhusi wa dzitshakha,

₂₁a mu ita mukoma wa nnḓu yawe,

a langa thundu yawe yoṱhe,

₂₂vhakoma vhawe a vha langa nga hune a funa,

a funza vhahulwane vhuṱali.

₂₃Zwenezwo na Vhaisraele vha pfulutshela Egipita,

Jakopo a vha ṱhunḓu shangoni ḽa Hamu.

₂₄Muṋe washu a andisa vhathu vhawe,

vha anda u fhira maswina avho;

₂₅a vhuya a shandula mbilu dzavho,

vha vhenga vhathu vhawe,

vha itela vhalanda vhawe vhukwila.

₂₆Ndi hone a tshi ruma Mushe muḓinḓa wawe,

na Aroni we a mu nanga,

₂₇vha sumbedza Vhaegipita zwiga

nga maḓembe e a amba,

vha ita zwimangadzo shangoni ḽa Hamu:

₂₈A ḓisa swiswi,

shango ḽa swifhala ḽe nzwii,

vhone vha si vhuye vha tenda zwe a amba;

₂₉a shandukisa maḓi a vha malofha,

khovhe dzavho dza fa;

₃₀shango ḽavho ḽa ḓala zwiḓula,

dza dzhena na pfamoni dza musanda;

₃₁a amba,

ha ḓa guma ḽa phuvhe,

na vhunyunyu, ha ḓadza shango;

₃₂a vha nisela tshifhango,

a ḓisa phenyo dza vhonetshela shango ḽoṱhe;

₃₃a moḓisa minḓirivhe na mihuyu yavho,

miri ya shango ḽavho a i vunḓekanya;

₃₄a amba ha wa magerere,

ha ḓa vhuukhula vhu si na mbalo,

₃₅dza ḽa miri yoṱhe ya shango,

dza fhedza khaṋo yavho;

₃₆a fhedza nga u vhulaha matanzhe oṱhe shangoni ḽavho,

yone mitshelo ya u ranga ya vhaṱhannga vhavho.

₃₇O vhofholola Vhaisraele,

vha pfuluwa vho hwala siliva na musuku,

hu si vhe na tsaleli na nthihi;

₃₈Vhaegipita vha takalela u ṱuwa havho nge vha vha vha tshi vha ofhesa.

₃₉Muṋe washu a vha tsireledza nga gole,

vhusiku a vha vhonetshela nga mulilo.

₄₀Vha mu humbela a vha ḓisela dzikhwali,

a vha fusha nga vhuswa vhu bvaho ṱaḓulu;

₄₁a fhandula tombo, maḓi a gubunyea,

ha ela mulambo phangani.

₄₂A elelwa mulanga wawe mukhethwa

we a vhofha na Abrahamu mulanda wawe.

₄₃O endedza vhathu vhawe nga dakalo,

vhanangiwa vhawe vha enda vha tshi fhululedza.

₄₄A vha ṋea mashango a dzitshakha,

vha vha maḽaifa a zwe vhaṅwe vha zwi bvela biko.

₄₅Hezwo o zwi itela uri vha nambatele ndaela dzawe,

vha vhulunge milayo yawe.

Haleluya,

nga hu rendwe Muṋe washu!