DZIPHISALEMA 107

₁Livhuhani Muṋe washu, u na vhuthu,

lufuno lwawe a lu dzinginyei lini na lini.

₂Vho tshidzwaho nga Muṋe washu nga vha ralo;

o vha vhofholola zwanḓani zwa maswina,

₃a vha vhuisa hayani vha tshi bva mashangoni asili,

vhubvaḓuvha na vhukovhela,

devhula na tshipembe.

₄Vhaṅwe vho tendeleka phangani na masogani,

vha sa wani nḓila ya u ya muḓini hu no dzula vhathu,

₅vha farwa nga nḓala na ḓora, vha ṋoka.

₆Vho vhidzelela Muṋe washu vhe khomboni,

a vha tshidza kha zwi konḓaho,

₇a vha endedza nḓilani yo touho tswititi,

a vha swikisa muḓini hu no dzula vhathu.

₈Nga vha livhuhe lufuno lwa Muṋe washu

lu sa dzinginyei,

na mishumo yawe i mangadzaho ye a itela vhathu.

₉O vha dzimula ḓora,

vha na nḓala a vha fusha nga zwithu zwavhuḓi.

₁₀Vhaṅwe vho dzula swiswini ho tou nzwii,

zwivhotshwa zwi tshi teta zwo vhoxwa nga dzigeḓane,

₁₁nge vha lwa na milayo ya Mudzimu,

vha nyadza nyeletshedzo ya Waṱaḓuluṱaḓulu;

₁₂a mbo lemedza mbilu dzavho nga u vha konḓisela vhutshilo,

vha wa ha si vhe na a vha vusaho;

₁₃vha vhidzelela Muṋe washu vhe khomboni,

a vha tshidza kha zwi konḓaho,

₁₄a vha bvisa swiswini ho tou nzwii,

a khathula dzigeḓane dzo vha vhofhaho.

₁₅Nga vha livhuhe

lufuno lwa Muṋe washu

lu sa dzinginyei

na mishumo yawe i mangadzaho ye a itela vhathu.

₁₆O pwashekanya mahothi a musinaseṱha,

a vunḓekanya mabaphathi a tsimbi

e a vha o vha pata.

₁₇Vhaṅwe vho tsilufhala vha shandukela Mudzimu,

a vha tambudzela milandu yavho,

₁₈vha nengwa zwiḽiwa zwoṱhe vha ṱoḓou fa;

₁₉vha vhidzelela Muṋe washu vhe khomboni,

a vha tshidza kha zwi konḓaho;

₂₀a vha fhodza nga ipfi ḽawe,

a vha tshidza lufuni.

₂₁Nga vha livhuhe lufuno lwa Muṋe washu

lu sa dzinginyei

na mishumo yawe i mangadzaho ye a itela vhathu.

₂₂Nga vha mu livhuhe nga u mu ṋekedza zwiṱhavhelo,

vha anḓadze mishumo yawe nga mifhululu.

₂₃Vhaṅwe vha enda lwanzheni nga zwikepe,

vhavhambadzi vha tshimbila maḓini mahulu.

₂₄Ndi hone he vha vhona mishumo ya Muṋe washu,

vha vhona zwimangadzo zwawe mativhani.

₂₅O ri u amba ḓumbu ḽa vuwa,

ḽa takusa magabelo a lwanzhe;

₂₆zwikepe zwa rahiswa nṱha zwa swika makoleni,

zwa dovha zwa tsela fhasi tivhani,

vha kulea nungo nga nyofho.

₂₇Zwa goba-goba zwa pepeleka unga vhathu vho kambiwaho,

maano avho oṱhe a dzima;

₂₈vha vhidzelela Muṋe washu vhe khomboni,

a vha ṋula kha zwi konḓaho.

₂₉A dzikisa ḓumbu he dzokoto,

magabelo a lwanzhe e tshete,

₃₀ha dzika, vha takala,

a vha endedza vha swika hune vha ya.

₃₁Nga vha livhuhe lufuno lwa Muṋe washu

lu sa dzinginyei,

na mishumo yawe i mangadzaho ye a itela vhathu,

₃₂vha mu hulise vhathu vho kuvhangana,

vha mu rende khoroni ya vhahulwane.

₃₃U shandukisa milambo ya vha phanga,

zwisima zwa maḓi zwa xa,

₃₄tsimu yo nonelaho ya bva

nga mulandu wa vhavhi vho dzulaho henefho.

₃₅U shandukisa phanga ya vha mihuvhi ya maḓi,

mavuni o omaho ha phulea zwisima zwi elaho;

₃₆henefho a vhea vha ṋokaho nga nḓala,

vha fhaṱa muḓi vha dzula khawo,

₃₇vha lima masimu,

vha ṱavha minḓirivhe,

vha wana khaṋo khulu;

₃₈a vha shudufhadza vha ḓi anda vha tshi ya,

na thakha yavho i si fhungudzee.

₃₉Huno musi vha tshi fhungudzea,

vha tshi vho shaya nungo nga u kandeledzwa

na dzikhombo na maṱungu,

₄₀a nyadzisa vhaḓivhalea,

a vha balanganya vha sokou tendeleka sogani,

₄₁a takusa vhashai vha bva maṱunguni avho,

miṱa yavho ya anda unga maṱambi.

₄₂Vha sí na vhufhura vha tshi zwi vhona vha a takala,

vhavhi zwi tshi vha somela.

₄₃Wa vhuṱali nga a zwi dzhiele nzhele,

a vhone zwine Muṋe washu a ita nga lufuno lwawe lu sa dzinginyei.