DZIPHISALEMA 83

₁Yawee, Mudzimu,

u songo sokou fhumula!

U songo sokou ṱanzwa maṱo wa lavhelesa.

₂Mudzimu,

vhona maswina au o halifha,

vha u vhengaho vho imisa dziṱhoho.

₃Vha lukela vhathu vhau vhunwa,

vha langana vhavhavhalelwa vhau.

₄Vha ri, “Kha ri ḽe lushaka lwoṱhe nga pfumo,

dzina ḽa Israele ḽi sa tsha ḓo vhidzwa.”

₅Vha u itela tshimbevha vho khwaṱhisa,

vho vhofha mulanga wa u lwa na Iwe.

₆Ndi Edomo na Vhaishmaele,

ndi Muaba na Vhahagara,

₇ndi Gebala na Amoni na Amaleke,

ndi Filista na Vhatiro,

₈hu ḓi nga Vhaashuru,

na vhone vha ngomu,

vha tikedza vhana vha Loto.

₉Vha ite zwe wa ita Vhamidiani,

zwe wa ita Sisera na Jabini

mulamboni wa Kishoni,

₁₀vhe vha lozwiwa Endoro,

vha vha manyoro a mavu.

₁₁Vhahulwane vhavho

vha ite zwe wa ita Orebe na Ziebe,

vhakololo vhavho vhoṱhe

u vha ite sa Zebakha na Tsalimunna,

₁₂vhe vha ri,

“Nga ri dzhie pfulo ya Mudzimu i vhe yashu.”

₁₃Yawee, Mudzimu wanga,

vha ite unga mbeu ya luguli,

vha nge mungu u hwalwaho nga muya,

₁₄vha fhise vha nge ḓaka ḽi tshi swa nga mulilo,

u nge khavhu i tshi fhisa dzithavha.

₁₅Vha sale murahu nga ḓumbu ḽau,

u vha ofhise nga tshiḓumbumukwe.

₁₆Yawee Muṋe washu,

nga vha tou niwa nga ṱhoni,

vha vhuye vha u ṱoḓe!

₁₇Vha shonise vha ofhe tshoṱhe,

vha lovhe vho shona!

₁₈Ndi hone vha tshi ḓo ḓivha uri u pfi Muṋe washu,

Waṱaḓuluṱaḓulu, Muṋe wa ḽifhasi ḽoṱhe,

ndi Iwe u woṱhe.