SIRAKHA 11

₁Mushai a na vhuṱali

ha khothi muthu,

u dzula na vhahulwane.

₂U songo khoḓa muthu nga u vhona lunako lwawe,

kana wa nyadza a songo nakaho.

₃ṋotshi ndi ṱhukhusa kha zwithu zwi fhufhaho,

hone i kaṋa zwi ḓifhaho u fhira zwoṱhe.

₄Vhathu vha tshi u hulisa u songo ḓihudza,

ngauri mishumo ya Muṋe washu i a kanukisa,

yo ro dzumbelwa vhathu.

₅Mahosi manzhi o fhedza nga u tou bwekeṱe mavuni,

vhe vha si vhuye vha humbulelwa

vha sala vha tshi ambara khare ya vhuhosi.

₆Ndi vhaḓivhalea vhanzhi

vhe vha fhedza nga u nyadziwa tshoṱhe,

vhahulwane vha kumedzwa zwanḓani zwa maswina.

₇Tshiṱhavhakhomu vhudzisa,

u sa ḓo ṱhavha na i si na lufu,

thoma u sedzuluse,

u konou sasaladza.

₈U songo fhindula u sa athu pfesesa,

nahone u songo dzhena muthu haṋwani.

₉U songo ṱaṱisana na muthu kha mafhungo a si au,

u songo dzhenelela nndwani ya vhavhi.

₁₀ṅwananga, u songo ḓihwesa mishumo minzhi;

u ḓo farekanea wa tambula.

Nangwe wa pandamedza lupfumo, u nga si lu fare,

nangwe wa shavha nga u gidima, u nga si ponyoke.

₁₁Muthu a nga ḓi shumesa,

a kakarika, a si awele,

mishumo ya ḓi engedzea i si fhele.

₁₂Muṅwe u fara yawe nḓila e muhoṱa,

a sa koni tshithu,

ha na tshawe, o pfuma vhushai fhedzi,

hone maṱo a Muṋe washu a mu sedza a mu takalela, a mu lamulela,

₁₃a takusa ṱhoho yawe, a mu hulisa, vhoṱhe vha kanuka.

₁₄Zwivhuya na zwi vhavhaho, vhutshilo na lufu, vhushai na lupfumo,

zwoṱhe zwi bva kha Muṋe washu.

₁₅[Vhuṱali na ṱhalukanyo na nḓivho ya mafhungo,

lufuno na nḓila mbuya zwi bva kha Muṋe washu.

₁₆Vhukhakhi na swiswi

zwo vhumbwa na vhavhi u bebwani havho,

vhuvhi vhu ḓi aluwa na vhaitazwivhi.]

₁₇Tshifhiwa tsha Muṋe washu tshi ḓi dzula tshi na vha mu ofhaho,

u ḓi vha endedza, ngauri u a vha takalela;

mashudu a bvaho khae a ita uri zwi ḓi vha nakela.

₁₈Vhaṅwe vha pfuma nga vhutshivha na u dzima vhaṅwe,

huno pfufho ye vha kovhelwa ngeyi:

₁₉Musi vha tshi ri,

“Ndi hone ndo awela,

zwino ndi ḓo ḓiphiṋa nga thundu yanga,”

a vha ḓivhi uri zwi ḓo ya thambo naa,

vha vhuya vha fa,

vha zwi siela vhaṅwe.

₂₀ṅwananga, farelela mushumo wau u shume wone,

u kalahe u tshi khou shuma mushumo wonoyo.

₂₁U songo tama zwe vhavhi vha zwi kona,

tshau fulufhela Muṋe washu, u ḓi shuma zwithu zwau;

Muṋe washu a zwi mu konḓeli u pfumisa mushai kathihi fhedzi.

₂₂Mashudu a Mudzimu ndi mukovhe wa vha mu ofhaho,

hu si kale mashudu awe a aṋwa mitshelo.

₂₃U songo ri, “Ndi lilani?

Misi i ḓaho ndi kha ḓi ḓo wana mini?”

₂₄U songo ri, “A thi ṱoḓi tsha muthu;

ndi nga welwa nga khombo-ḓe zwino?”

₂₅Musi wa mashudu u hangwisa muthu khombo,

musi wa khombo u hangwisa muthu mashudu.

₂₆Naho zwo ralo

Muṋe washu a zwi mu konḓeli u pfufha muthu musi wa lufu a tshi tevhedza zwe a ita.

₂₇Muthu a vhuya a tambula tshifhinganyana,

u hangwa madakalo a mulovha,

musi wa lufu mishumo yawe i a dzumbuluwa.

₂₈U songo ri muthu u na mashudu a sa athu fa;

u ḓihwa nga kufele kwawe.

₂₉U songo ḓisa muṅwe na muṅwe muḓini wau,

zwikwekwe zwa wa vhumbulu a zwi fheli.

₃₀Mbilu ya muḓihudzi i nga khwali yó fashwa mutevhani;

u sedza khombo yau unga ṱholi,

₃₁u dzula a tshi u linda,

a shanda zwivhuya zwa vha zwivhi,

zwe iwe wa nakisa ene u a sola.

₃₂Muvhi u lalela muthu a shulula malofha

u ḓi nga ṱhase nthihi i tshi funga masimbe manzhi.

₃₃Thanyela muthu muvhi na vhúnwa hawe,

a sa ḓo u ḓodza tshika dzi sa ṱanzwei.

₃₄Wa swielela mutsinda u ḓo u vusela vilinga,

wa sala wo luṱana na vha muṱa wau.