SIRAKHA 2

₁Ṅwananga, arali u tshi tama u shumela Muṋe washu,

ḓilugisele milingo.

₂Mbilu yau i songo vha na vhufhura, u si dzinginyee,

u songo tshenuwa musi wa khombo.

₃Mu nambatele, u songo mu ṱutshela, ndi hone u tshi ḓo fa wo huliswa.

₄ṱanganedza zwoṱhe zwine zwa u wela,

arali u muheḓana, wa ṱangana na zwi ḓaḓisaho, u songo fhela mbilu.

₅Hufha musuku u tshi bviswa manyelo nga mulilo,

nga u ralo vho fanelaho vha kuniswa ṋanḓoni ya u ṱukufhadzwa.

₆Fulufhela Mudzimu, u ḓo u tika,

nḓila dzau nga dzi tou tswititi, u lavhelele Ene.

₇Iwe ane wa ofha Muṋe washu, lindela khathutshelo yawe,

u songo pambuwa u sa ḓo wa.

₈Iwe ane wa ofha Muṋe washu, mu fulufhele;

a u nga kundwi u wana pfufho yau.

₉Iwe ane wa ofha Muṋe washu,

fulufhela zwivhuya zwine a ḓo u ṋea:

ḽone dakalo ḽi sa fheli na vhuthu hawe.

₁₀Sedza mirafho yo fhiraho kale, u gude ngayo:

we a vhuya a fulufhela Muṋe washu a shoniswa ndi nnyi?

We a fungelela u ofha Muṋe washu a vho ṱutshelwa ndi nnyi?

We a mu vhidzelela a si londiwe ndi nnyi?

₁₁Muṋe washu u na tshilidzi na khathutshelo,

u ri hangwela vhuvhi hashu a ri tshidza musi zwo vhifha.

₁₂Mbilu dza nyofho

na zwanḓa zwi bvafhaho zwi ḓo zwi vhona,

khathihi na muvhi a faraho nḓila mbili!

₁₃Ni ḓo zwi vhona inwi no kuleaho nungo ni si na lutendo, a ni nga tsireledzwi!

₁₄Ni ḓo zwi vhona inwi no kuleaho miraḓo!

Musi Muṋe washu a tshi ḓa u ni haṱula ni ḓo itani?

₁₅Vhane vha ofha Muṋe washu a vha nyadzi maipfi awe,

vhane vha mu funa vha tshimbila nḓilani dzawe.

₁₆Vhane vha ofha Muṋe washu vha ḓidinela u mu takadza,

vhane vha mu funa vha ḓiphiṋa nga Mulayo wawe.

₁₇Vhane vha ofha Muṋe washu vha dzula vho mu lindela, vha ḓiṱukufhadza phanḓa hawe.

₁₈Nga ri wele zwanḓani zwa Muṋe washu,

ri songo wela zwanḓani zwa vhathu;

a si vhurena hawe fhedzi ho hulaho, ho hula na khathutshelo yawe.