SIRAKHA 22

₁Mubva u nga tombo

ḽi re matopeni;

vhoṱhe vha a kanuka vha tshi vhona u shona hawe.

₂Mubva u nga bumbulu ḽa vhutoko;

ane a vhuya a mu kwama u fhufhura zwanḓa.

₃ṅwana a si na mulayo u shonisa khotsi awe,

zwihulu arali e musidzana.

₄ṅwananyana wa ṱhalukanyo u wana munna,

a sa shoni ene u ḽisa khotsi awe mbilu.

₅ṅwananyana o bvaho mvumbo u shonisa khotsi na mme;

vhoṱhe vhuvhili havho vha ḓo mu ṱamba.

₆U kaidza muthu nga tshifhinga tshi si tshone

zwi nga u pembela hu tshi swiṱwa muthu,

hone ṱhamu na ndayo ndi vhuṱali misi yoṱhe.

₉U funza tsilu zwi nga u mometshedza khali i na mutwe;

zwi nga u vusa muthu o tou mbwanda nga khofhe.

₁₀Zwi ḓi nga u amba na muthu o eḓela;

musi wo no fhedza ḽi ḓo ri, “Ndi mini?”

₁₁Lilela mufu; tshedza tshawe tsho dzima;

lilela tsilu; mihumbulo yawe yo dzima.

Mufu mu lilelenyana; o awela,

hone vhutshilo ha tsilu vhu fhirwa nga lufu.

₁₂Mufu u lilelwa maḓuvha maṱanu na mavhili,

hone tsilu na muvhi vha lilelwa vhutshilo havho hoṱhe.

₁₃Tsilu u songo ambesa naḽo; u tinye danana;

u vhone ḽi sa ḓo u wedza khomboni,

wa shatwa tshika musi ḽi tshi ḓiukhutha;

ḽi furalele,

ndi hone u tshi ḓo rudza mbilu,

wa si tsha netiswa nga vhutsilu haḽo.

₁₄Tshi lemelaho u fhira mutobvu ndi mini?

Dzina ḽatsho ḽi pfi “Tsilu”.

₁₅Muṱavha na muṋo na mutobvu zwi a hwalea u fhira tsilu.

₁₆Zwe wa vhofha wo ranga u elekanya

zwi nga si dzinginyee musi wa zwi ofhisaho,

u ḓi nga luvhalelo lwo semendelwa nnḓuni

lu sa nga dzinginyiswi nga mudzinginyo wa shango.

₁₇Muhumbulo wo tikwaho nga ṱhalukanyo yo dzikaho,

u fana na luvhondo lu suvhelelaho lwo fhomiwa nga phomo.

₁₈Mbilu ya tsilu ḽe ḽa ḓishushedza nga mihumbulo yaḽo,

i nga si imedzane na zwi ofhisaho zwifhio na zwifhio,

u ḓi nga zwitombwana

zwo dzulaho muṱumbani hu re khagala

zwi sa litshi u wa musi ḓumbu ḽi tshi tita.

₁₉Wa kombodza ḽiṱo hu rotha miṱodzi;

wa vaya mbilu hu dzumbuluwa zwi re ngomu.

₂₀Wa posa zwiṋoni nga matombo u a zwi ṱuṱurusa;

wa sema khonani wo tshinya vhukonani.

₂₁Naho wa angaladzela khonani pfumo,

u songo ṱovhowa, zwi nga tandululwa.

₂₂Arali wo ḽela khonani vhuhali,

u songo ḽa mbilu, ni nga pfumedzana.

Hone wa mu sema nga lunyadzo,

kana wa dzumbulula zwidzumbe, kana wa mu shandukela

izwo a zwi na tshipfumelo.

₂₃Konana na muthu a tshi kha ḓi shaya,

wa ḓo konou ḓiphiṋa nae musi o no pfuma.

Ima nae musi wa khombo,

uri u vho ḓo kovhekana nae ifa ḽawe.

₂₄Vhutsi ha ṋanḓo vhu ṱula khavhu;

tsemano i ṱula u shulula malofha.

₂₅Thi nga shoni u swielela khonani, thi nga mu dzumbami.

₂₆Huno arali a nkhuvhadza,

vhoṱhe vhane vha zwi pfa vha ḓo ima kule.

₂₇Ndi nnyi a no ḓo vhea mulindi wa mulomo wanga?

Ndi nnyi ane a ḓo u shatela uri u si mpiringedze,

lulimi lwanga lu si nndozwe?