SIRAKHA 23

₁Muṋe washu, Khotsi anga,

Muṋe wa vhutshilo hanga,

u songo nndaṱedza zwa mpiringedza.

₂Ndi nnyi ane a nga nyambudza mihumbulo yanga,

mbilu yanga a i laṱisa ya ṱalifha?

Vhuvhi ha mbilu yanga u songo vhu tsinyela ḽiṱo,

ndi sa ḓo dzula ndi tshi khakha,

₃vhutshinyi hanga vhu sa ḓo anda,

vhuvhi hanga ha vho ḓalesa,

nda vho ḓo kundwa nga vha mmbengaho,

maswina anga a fhululedza.

₄Muṋe washu, Khotsi anga,

Mudzimu wa vhutshilo hanga,

u songo tenda maṱo anga a tshi ḓihudza;

₅thatha vivho mbiluni yanga.

₆U songo litsha nyemulo dza ṋama dzi tshi mmbusa,

u songo nkumedza nyemulo dzi shonisaho.

₇Vhananga,

thetshelesani ndi tshi ni laya;

a no thetshelesa ndayo dzanga ha nga fashiwi.

₈Muvhi u fashwa nga lulimi lwawe,

munyefuli na muḓikukumusi,

vhuvhili havho vha fashwa nga zwenezwo.

₉U songo vha na dzema ḽa u ana

kana wa ḓowela u tamba nga Dzina ḽikhethwa;

₁₀Muthu a no endela u ana nga Dzina ḽikhethwa,

a nga si kundwe u tshinya,

u ḓi nga phuli ine ya dzula yo vhewa liṱo

i sa nga kundwi madidedzo.

₁₁Muthu ane a anzela u ana o ḓala vhuvhi;

ṱhamu a i nga ṱutsheli muṱa wawe.

Arali a ana a khakha,

vhutshinyi vhu nṱha ha ṱhoho yawe;

arali o sokou ana a sa londi,

ndi hone o khakha luvhili.

Arali a anela mazwifhi ha ṱambi mulandu,

khombo a dzi nga ṱutsheli vha muṱa wawe.

₁₂Hu na maambele ane a nga lufu,

hone a songo vhuya a pfala kha vhaḓuhulu vha Jakopo.

Vha ofhaho Mudzimu vho dzula vho a landula;

a vha vhumbuluwi vhuvhini.

₁₃U songo ḓowela maṱamba;

u nga bula maipfi o vhifhaho.

₁₄Dzula u tshi elelwa khotsi au na mme au

musi wo dzula na vhaḓivhalea,

u sa ḓo ri u navho wa ḓihangwa,

wa ḓinyadzisa vha tshi u pfa,

wa vho ri,

“Ngavhe ndi songo vhuya nda bebwa!”

wa teketela ḓuvha ḽe wa bebwa ngaḽo.

₁₅Muthu o no vhaho na dzema ḽa maṱamba,

a nga si tsha zwi laṱa vhutshilo hawe hoṱhe.

₁₆Hu na tshakha mbili dza vhathu – aiwa, ndi tharu –

dzi no tshinya dza dovha,

dza hovha mbiti dza Mudzimu.

₁₇Nyemulo dzi duga sa mulilo;

a dzi dzimei,

hu vhuya ha fhelela khuni;

a no emula shaka ḽawe ḽa malofha

ha pfeleli a sa athu swa a fhelela.

Bongwe ḽi pfa maswa oṱhe a tshi ḓifha;

ha pfeleli a sa athu fa.

₁₈Zwi ḓi nga munna

ane a fhura musadzi wawe a ya kha vhaṅwe:

U ri, “Ndi nga vhonwa nga nnyi?

Ndi swiswini, mbondo dzo ntsireledza,

a thi vhonwi nga muthu, ndi ofhani?

Waṱaḓuluṱaḓulu ha humbuli zwe nda tshinya.”

₁₉Onoyo u ofha maṱo a vhathu fhedzi.

Ha ṱalukanyi uri maṱo a Muṋe washu

a penya u fhira ḓuvha lwa maḓana a maḓana,

a sedza ḽiga ḽiṅwe na ḽiṅwe ḽine muthu a kanda,

a vhona na fhethu ho dzumbamaho.

₂₀O dzula o ḓivha zwoṱhe zwi sa athu vha hone,

na ṋamusi zwó no vhumbiwa u kha ḓi zwi ḓivha.

₂₁Munna o raloho u ḓo ṱaniwa mikotoni ya muḓi,

a farwa á songo humbula.

₂₂Musadzi

a sa fulufhedzei kha munna wawe

a mu bebela muḽaifa wa mutsinda, na ene o tou ralo.

₂₃O thoma nga u nyadza mulayo wa Waṱaḓuluṱaḓulu,

a ita vhufhura na munna muṅwe,

a fhedza a ita vhupombwe,

a beba vhana na munna muṅwe.

₂₄Musadzi o raloho u ḓo khwikhwidzwa phanḓa ha tshivhidzo,

a vhudziswa vhubvo ha dzikhangamutupo.

₂₅Vhana vhawe a vha nga ṱoki midzi;

matavhi awe ha nga aṋwi mitshelo.

₂₆Vhane vha mu humbula vha ḓo mu teketela;

samba ḽawe ḽi nga si thuthiwe.

₂₇Vhane vha sala ó no fa vha ḓo zwi ḓivha,

uri a hu na tshi fhiraho u ofha Muṋe washu,

a hu na tshi ḓifhaho sa u tevhedza milayo yawe.