SIRAKHA 28

₁Vhalifhedzi

vha ḓo lifhedzwa

nga Muṋe washu;

u dzula o ṅwala vhutshinyi ha vhathu.

₂Hangwela muthu zwe a u khakhela,

ndi hone u tshi ḓo ri u tshi rabela,

vhutshinyi hau ha hangwelwa-vho.

₃Muthu a nga fara muṅwe nga mbilu,

a humbela u khathutshelwa nga Muṋe washu naa?

₄Wa sa khathutshela vhaṅwe,

iwe u nga humbela khangwelo hani-hani?

₅Arali u muthu wa ṋama,

wa fara muṅwe nga mbilu,

iwe u ḓo hangwelwa nga nnyi?

₆Elelwa lufu lwo u lindelaho

u litshe u vhenga vhaṅwe;

a u nga fi-vho wa sina?

Tevhedza milayo ya Mudzimu!

₇Humbula milayo,

u songo vhenga muthu nga iwe;

humbula mulanga wa Waṱaḓuluṱaḓulu,

milandu u i tsinyele iṱo.

₈Tinya mifhirifhiri,

ndi hone vhuvhi hau vhu tshi ḓo vha vhu si gathi;

muthu wa mbiti u levhela vhathu.

₉Muvhi u luṱanya dzikhonani,

a zwala u sa pfana kha vha tshilaho nga mulalo.

₁₀Khuni dza vha nnzhi,

mulilo u hudza khavhu;

nndwa yá tswuka, i ṱanganya shango.

Munna wa nungo khulu u sinyuwa zwihulu;

wa lupfumo luhulu u na mbiti khulu.

₁₁Phambano i sa lengi i funga mulilo;

nndwa i sa lengi i vhanga u shuluwa ha malofha.

₁₂Wa vhudzedza ṱhase i a duga;

wa i pfela mare i a dzima;

zwoṱhe vhuvhili hazwo u zwi ita nga mulomo wau.

₁₃Nga hu teketelwe tshiisaphungo

na wa muya wa murwelahoṱhe;

vho lozwa vhanzhi vha tshilaho nga mulalo.

₁₄Lulimi lu dzhenelelaho mafhungoni a vhaṅwe

lwo no luṱanya vhanzhi,

lwa vha ita dzitshavhi vhukati ha dzitshakha.

Lu ita uri miḓi

yo tingeledzwaho nga mitsheṱo i fhalale,

lwa phusukanya nnḓu dza vhaḓivhalea.

₁₅Lwo no fhiriṱanya vhanna

na vhafumakadzi vhavho vha fulufhedzeaho,

lwa vha ṱangula mitshelo ye vha i shumela.

₁₆Muthu a no lu thetshelesa ha rudzi mbilu,

ha tsha vhuya a dzula nga mulalo.

₁₇U rwiwa nga tshimebi zwi a pundisa,

hone u rwiwa nga lulimi zwi pwasha marambo.

₁₈Vhanzhi vho no ḽiwa nga pfumo,

hone vha fhirwa nga vho lozwiwaho nga lulimi.

₁₉Mashudu muthu o pilelwaho kha lulimi,

a songo pfaho vhuṱungu ha mbiti dzalwo,

a songo hwalaho dzhogo yalwo,

a songo vhoxwaho nga khotho dzalwo;

₂₀dzhogo yalwo ndi ya tsimbi,

khotho dzalwo ndi dza musinasetha!

₂₁Lufu lu vhangwaho nga lulimi lu a ofhisa,

na vhudzulavhafu vhu khwiṋe.

₂₂Vhavhuya lu nga si ṱoke midzi khavho,

lu nga si vha fhise nga khavhu yalwo.

₂₃Hone vha ṱutshelaho Muṋe washu vha ḓo wela khunḓani yalwo;

lu ḓo vha fhisa lwa si dzime!

Lu ḓo vha fhufhela unga ndau,

lwa vha thathekanya unga nngwe.

₂₄Fhaṱeledza tsimu yau ya minḓirivhe nga luhura lwa mipfa!

Shatela siliva na musuku wau!

₂₅Ela maipfi au u sa athu amba,

u kwee mahothi a tsimbi mulomoni wau.

₂₆U vhone u sa ḓo redza nga lulimi lwau,

wa wela zwanḓani zwa vho u lalelaho.