SIRAKHA 29

₁Muthu ane a hadzima muṅwe

tshithu

u ita vhuthu;

u farisa muṅwe ndi u khunyeledza milayo.

₂Hadzima muṅwe tshithu musi a tshi tshi lila;

nahone u si lenge u mu lifhela tshe wa pamba khae.

₃Khunyeledza zwe wa mu fulufhedzisa, u si mu shandukele,

ndi hone u tshi ḓo wana zwine wa zwi lila misi yoṱhe.

₄Vhathu vhanzhi vha vhona u hadzima hu u renga,

vha shonisa avho vhe vha vha farisa.

₅Musi a tshi pamba

u kuvhatedza tshanḓa tsha muhadzimi,

a sekenisa ipfi

a tshi amba nga lupfumo lwa muṋei,

hone musi wa u lifha u a lenga, a lapfisa maḓuvha,

a lifha nga maipfi a sa pfali, a ri tshifhinga a si tshone.

₆Naho muhadzimi

a tou kona u vhuiselwa hafu zwayo, u ḓo vhona e mashudu.

Zwa sa ralo,

mupambi u ḓo vha o mu fhura mali yawe,

a vho vha swina ḽawe zwi songo fanela;

mupambi a vho mu lifhela nga u mu teketela na maṱamba,

a vho mu nyadza vhudzuloni ha u mu hulisa.

₇Vhanzhi vha hana u hadzima muthu thundu,

vha sa itwi nga vhutshivha,

vha tou ofha u lovha thundu yavho vha sa vhuelwi nga tshithu.

₈Nangwe zwo ralo,

mushai u songo mu fhelela mbilu,

u songo lenga u mu ṋea zwifhiwa.

₉Tevhedza mulayo u tonde vhashai;

musi vha tshi lila u songo vha humisa vha si na tshe vha fara.

₁₀Tshinya mali yau

nga u i ṋea wa hau kana khonani yau,

u songo i dzumba fhasi ha tombo ya lovha.

₁₁Shumisa lupfumo lwau

u tshi tevhedza mulayo wa Waṱaḓuluṱaḓulu,

ndi hone zwi tshi ḓo u vhuedza u fhira musuku.

₁₂Zwisiku zwau u zwi ḓadze zwifhiwa zwa u ṋea vhashai;

izwo zwi ḓo u lamukisa khomboni dzoṱhe.

₁₃Zwi ḓo u lwela na maswina au,

u fhira tshiṱangu tshidenya na pfumo ḽa tshiinga.

₁₄Muthu muvhuya u ḓo ḓivhofha u lifha mulandu wa muṅwe,

hone muthu a sa shoni u ḓo hana.

₁₅U songo hangwa vhuthu ha mutikedzi wau,

ngauri u ṋekedza vhutshilo hawe a tshi itela iwe.

₁₆Muvhi u tshinya thundu

ya we a ḓivhofha u lifha mulandu wawe,

a sa livhuhi u ḓo hangwa we a mu lamukisa.

₁₇U ḓivhofha u lifha mulandu wa muṅwe zwo shaisa vhapfumi vhanzhi,

zwa vha gabisa unga magabelo a lwanzhe;

₁₈zwo isa vhaḓivhalea vhuthubwani, vha tendeleka na tshakha.

₁₉Muvhi we a ṱavhanyedza

u ḓivhofha u lifha mulandu wa muṅwe

a tshi ri u ḓo vhuelwa nga zwinzhi,

u ḓo ṱavhanya u lifhiswa.

₂₀Ndi zwone,

ḓivhofhe u lifha mulandu wa muṅwe arali u tshi nga kona,

hone u vhone u sa ḓo wela khomboni yeneyo.

₂₁Zwililelwa zwa vhutshilo ndi maḓi na vhuswa na zwifuko,

nnḓu na yone, ya u pila zwidzumbe zwau.

₂₂Ndi khwiṋe u vha mushai

wo pilwa nga ṱhanga ya mushasha wau,

u fhira u ḽa mapfura nḓuni ya muthu muṅwe.

₂₃Fushea nga zwine wa vha nazwo zwi si gathi kana zwinzhi,

u nga si pfe vha muṱa wau vha tshi gungula.

₂₄Vhutshilo vhu ṱungufhadzaho ndi ha u tendeleka na miḓi;

a u vhuyi wa amba tshithu ngauri u mueni.

₂₅A si hau,

nangwe wa kanzwa vhathu nga zwinwiwa a u livhuhiwi,

wa dovha wa pfa na maipfi a u vhavha hu tshi pfi,

₂₆“Iḓa hafha iwe mutsinda, adzela ḓafula!

Mphe zwiḽiwa zwine wa vha nazwo ndi ḽe!”

₂₇“Iwe mutsinda ṱuwa u sendelele muhulisea!

Murathu wanga u ḓa u dala; ndi ṱoḓa nnḓu yanga!”

₂₈Zwithu zwine zwa vhavha zwi tshi itwa muthu ngezwi:

ndi u swielelwa nga vha no gungula,

wa semiwa wa nga wo ḽa mulandu wa muthu.