Muḓivhi wa Maṅwalo
1Zwino muthu a no ḓikumedza
u guda mulayo
wa Waṱaḓuluṱaḓulu
ndi muṅwe-vho!
Ene u londolosa vhuṱali ha vha kale,
a sedzulusa vhuporofita.
2U vhulunga nyambo ya vhathu vha bvumo,
ndi mukoni wa mirero.
3U dzumbulula zwifanyiso zwo dzumbamaho,
a linga u ṱalutshedza mirero.
4U shumela vhahulwane,
a konana na vhavhusi.
U endela mashango asili,
a guda vhuvhuya na vhuvhi ha vhathu.
5U fhindutshela u amba na Muṋe washu Muvhumbi wawe,
a rabela Waṱaḓuluṱaḓulu,
a humbela khangwelo ya vhutshinyi hawe.
6Zwino arali Muṋe washu Ramaanḓaoṱhe a tshi zwi funa,
muthu uyo u ḓo ḓadzwa muya wa ṱhalukanyo.
U ḓo bula maipfi awe a vhuṱali,
a rabela a tshi livhuha Muṋe washu.
7Zwine a zwi lwela na zwine a funzwa a zwi nga solisei,
u ḓo elekanya khundaṱhalukanyo dza Muṋe washu.
8U ḓo dzumbulula vhuṱali musi a tshi funza,
a ṱongisa Mulayo wa mulanga wa Muṋe washu.
9ṱhalukanyo yawe i ḓo khoḓwa nga vhanzhi,
bvumo ḽawe a ḽi nga thuthiwi.
U ḓo dzula a tshi humbulwa,
dzina ḽawe ḽi ḓo ḓihwa nga mirafho na mirafho.
10Vhuṱali hawe vhu ḓo ḓivhadzwa
nga dzitshakha,
tshivhidzoni a khoḓwa nga nyimbo.
11Arali a lalama,
dzina ḽawe ḽi ḓo vha na vhugala u fhira ḽa vhaṅwe vha tshigidi,
naho a fa u ḓo fa o rudza mbilu.
Nga ri rende Mudzimu!
12Ndi kha ḓi vha na zwe nda elekanya u zwi amba,
uri ndi penye sa ṅwedzi wo ḓalaho!
13Inwi vhananga vha fulufhedzeaho, thetshelesani!
Ni ḓo fhufhumisa unga dzuvha
ḽi melaho tsini na mulambwana wa maḓi a elelaho.
14Ni ḓo nukhelela sa zwioro zwa thabelo,
na fhufhumisa unga phendephende.
Fhululedzani Mudzimu,
ni livhuhe Muṋe washu ni tshi itela zwoṱhe zwe a ita.
15ḓivhadzani vhuhulu ha dzina ḽawe!
ṱavhani mukosi ni mu rende nga nyimbo ni tshi lidza haripa.
Imbani nga dakalo ni tshi ri,
16“Mishumo ya Muṋe washu ndi yavhuḓi hani!
Zwine a ri zwi itee,
zwi itea nga tshifhinga tshawe.”
Hu songo vha na ane a vhudzisa a ri,
“Itshi ndi mini?”
“Tshiḽa tsho itelwani?”
Zwoṱhe zwine Mudzimu a laya zwi itea nga tshifhinga tshazwo.
17Mudzimu a tou amba, maḓi a kuvhangana a takuwa,
a tou amba fhedzi
ha mbo ḓi vha na zwisiku zwa maḓi.
18Mudzimu o tou amba,
ha itea zwine a funa;
arali a tshi funa u ri tshidza, a hu na ane
a nga vhetshela maanḓa awe mukano.
19Mishumo ya vhathu yoṱhe u a i vhona,
a hu na tshi no mu dzumbama.
20U vhona vha mirafho na mirafho,
tsha kale na kale na lini na lini,
a hu na tshi no itea á songo tshi lavhelela.
21Hu songo vha na a no vhudzisa a ri, “Itshi ndi mini?” “Itsho tsho itelwani?”
Tshiṅwe na tshiṅwe tsho sikelwa mushumo watsho.
22Mashudu a Mudzimu a tibedza shango unga mulambo,
a nonisa mavu a ḽifhasi unga mulambo wó ḓala,
23u ḓi nga ifa ḽa dzitshakha dzi mbiti dzawe.
Zwi nga zwiḽa
a tshi shandukisa maḓi avhuḓi a vha isha ḽa muṋo.
24Vha mu ofhaho vha pfa nḓila dzawe dzi tshi tshimbilea,
hone vhavhi dzi a vha piringedza.
25Tsha kale na kale
zwivhuya zwo sikelwa vhavhuya,
zwivhi zwa sikelwa vhatshinyi.
26Zwililelwa zwihulwane zwa vhathu zwa u tshila ngazwo
ndi maḓi na mulilo,
na tsimbi na muṋo,
na vhukhopfu ha thoro,
na mukhaha na ṋotshi,
na tuvhu ḽa nḓirivhe
na mapfura na zwifuko.
27Zwoṱhe izwo zwi tonda vhavhuya,
kha vhavhi zwa shanduka zwa vha vhaisa.
28Hu na maḓumbu
e Mudzimu a vusela u lifhedza vhathu,
musi a tshi tita ndi ṱhamu dzawe;
nga ḓuvha ḽa khaṱhulo a a vhudzula a dzikisa mbiti dza Muvhumbi wao.
29Mulilo na tshifhango, nḓala na mpfu,
zwoṱhe izwo zwo itelwa u lifhedza vhathu.
30Zwivhanda zwo semaho maṋo
na dziphephenu na mavuluvulu,
na pfumo ḽi lifhedzaho ndi zwa u lozwa vhavhi.
31Zwoṱhe izwo zwi takalela u ita zwine Mudzimu a zwi laya,
zwi dzula zwo lindela zwi tshi ṱoḓea;
a zwi nyadzi ndaela yawe musi wayo.
32Ndi zwenezwo zwe nda ḓiimisela zwone
u bva tshee nda thoma u elekanya,
nda ṅwala mafhungo anga aya nda ri:
33Mishumo ya Muṋe washu yoṱhe ndi yavhuḓi,
u ri ṋea zwoṱhe zwine ra zwi lila nga tshifhinga tshazwo.
34Hu songo vha na a no ri,
“Itshi tsho vhifha u fhira itsho”;
zwoṱhe ndi zwavhuḓi nga tshifhinga tshazwo.
35Zwenezwo rendani Muṋe washu zwi tshi bva mbiluni,
na nga ipfi ḽaṋu,
livhuhani dzina ḽa Muṋe washu.
