SIRAKHA 4

₁ṅwananga, u songo dzima mushai zwine a fanela u tshila ngazwo.

u songo tamusa muheḓana zwiḽiwa wa si tsha mu ṋea.

₂U songo ṋaṋisa u tambula ha muthu a re na nḓala,

a re khomboni u songo mu litsha a ṱovhowa.

₃U songo khokhovhedza o ṱungufhalaho,

u tshi ṋea muhumbeli u songo lenga.

₄U songo landula muhumbeli a tambulaho,

mushai u songo mu furalela.

₅Muhumbeli u songo mu tsinyela ḽiṱo,

u songo ita uri muthu a sale a tshi u teketela;

₆arali a u teketela ó dinalea,

Muvhumbi wawe u ḓo pfa maipfi awe.

₇Ita uri tshivhidzo tshi u fune;

muḓivhalea u mu khothe.

₈Mushai u mu thetshelese,

a tshi u resha u mu bvumele nga vhulenda.

₉Lamukisa mukandeledzwa zwanḓani zwa mukandeledzi,

u tshi haṱula mulandu u songo ṱalula.

₁₀Vha si na khotsi u nge khotsi avho,

mme avho u vha farise u nge u munna wavho;

ndi hone Waṱaḓuluṱaḓulu a tshi ḓo u fara sa ṅwana wawe, a u funa u fhira mme au.

₁₁Vhuṱali vhu laya vhana vhaho,

vhane vha vhu ṱoḓa vhu a vha vhavhalela.

₁₂A no vhu funa u funa vhutshilo,

vhane vha bubela u vhu ṱoḓa vha ḓo pembela.

₁₃A na vhuṱali ifa ḽawe ndi khuliso,

Muṋe washu u ḓo shudufhadza hoṱhe hune a ya.

₁₄Vhane vha vhu shumela vha shumela Ene Mukhethwa,

Muṋe washu u funa vhane vha vhu funa.

₁₅Ane a vhu thetshelesa u vhusa dzitshakha,

ane a vhu kolongonyela nḓevhe u dzula ho dzumbamaho.

₁₆Arali a tshi vhu fulufhedza u ḓo vhu wana,

na vha lutsinga lwawe vhu ḓo vha ifa ḽavho.

₁₇Naho vhu tshi nga thoma u mu endedza nḓilani dza magombikwa,

ha mu dzhenisa nyofho ha mu kula nungo, ha mu linga ha mu laṱisa

ha vhuya ha vhona vhu tshi mu fulufhedza tshoṱhe,

ha mu linga nga nḓila nnzhi,

₁₈vhu ḓo sala vhu tshi vhuelela khae

ha vho mu endedza kha nḓilatswititi,

ha mu dzumbululela zwidzumbe zwaho.

₁₉Hone arali a pambuwa nḓilani,

vhu ḓo mu ṱutshela ha mu litsha a ḓilozwa.

₂₀Ivha na vhusedzi misi yoṱhe,

u ḓilinde u si tshinye,

u sa ḓo sala wo shona nga zwiito zwau.

₂₁Hafhu hu na ṱhoni dzo hwalaho vhutshinyi,

ha vha na ṱhoni dzi huliseaho, dzo fanelaho.

₂₂U songo ḓihaṱula lwa u ḓilaṱa,

u songo tenda ṱhoni dzo kalulaho dzi tshi u lozwa.

₂₃U songo litsha u amba nga tshifhinga tsho fanelaho,

u songo dzumbela vhathu vhuṱali hau;

₂₄vhuṱali vhu ḓihwa nga zwine wa amba;

maipfi au a sumbedza uri wo funzwa u gumafhi.

₂₅U songo vhuya wa hanedza ngoho;

ndi khwiṋe u tenda arali u sa ḓivhi.

₂₆U songo shona u tenda mulandu wau,

wa nga u khou tala u tshi gonya na lutsinga lwa mulambo.

₂₇U songo luvhelela tsilu;

u songo imelela vhaḓivhalea tsengoni.

₂₈U lwele ngoho nangwe wa pfi u i fele,

Mudzimu Muṋe washu u ḓo u lwela.

₂₉Mulomo a u ḓalelwi nga mulambo.

₃₀Hayani u songo ḓiita ndau

kana wa sumbedza nyofho kha vhalanda vhau.

₃₁U songo ṱoḓesa u fhiwa,

wa ita vhutshivha musi u tshi fanela u ṋea vhaṅwe.