ḓuvha
1Lutombo lu dzula lu tshi penya,
lwo naka hani!
Ndi bono ḽa vhugala ḽa ḽiṱaḓulu.
2ḓuvha ḽi tshi bvisa mulomo ḽi ḓivhadza ḽa ri,
“Mishumo ya Waṱaḓuluṱaḓulu i mangadza hani!”
3Masiari tshivhangalala ḽi omisa mavu,
ane a nga konḓelela u fhisa haḽo ndi nnyi?
4Riṋe vhathu ri vhudzedza ṋanḓo uri i fhise,
hone ḓuvha ḽi funga dzithavha nga maṱalazaza aḽo,
dza fhisa dza fhira ṋanḓo kararu.
ḽi vhudzedza mulilo ḽa bvisa ṱhase,
tshedza tshaḽo tsha kombodza maṱo.
5Vhukuma Muṋe washu o ḽi vhumbaho ndi muhulwane,
a tshi ḽi ruma
ḽi ṱavhanya ḽe nḓilani yaḽo longondo.
ṅwedzi lutomboni
6Muṋe washu o vhumba na ṅwedzi;
a u fhidzi u ela zwifhinga zwi shandukaho,
wa vha tshiga tshazwo tsha lini na lini.
7Ri ḓivha ngazwo maḓuvha a vhuṱambo;
ndi luvhone lu no ḓi fa lu nḓilani yalwo.
8Vhunga dzina ḽawo ḽi tshi amba,
ṅwedzi muṅwe na muṅwe u dovha wa dzula.
Tshanduko iyo i mangadza hani!
Ndi tsumbanḓila ya mara a dziṋaledzi u tshi penya lutomboni.
ṋaledzi
9Vhugala ha dziṋaledzi vhu nakisa lutombo;
ndi khare i penyaho ya Muṋe wa ḽiṱaḓulu.
10Dzi ima henefho vhuimoni
he Ene Mukhethwa a dzi vhea;
a dzi kumedzi, a dzi fari khofhe.
Musengavhadzimu
11Sedzani musengavhadzimu ni rende Muvhumbi wawo:
Wo naka hani! U penya hani!
12U nakisa maṱaḓulu nga vhugala hawo;
vhura hawo ho khothwa nga tshanḓa tsha Waṱaḓuluṱaḓulu.
Zwimangadzo zwa tsiko
13Mudzimu a tou amba hu wa gabugu;
a ri, “Penya!” lupenyo lwe “vhenge”.
14Zwi ḓi nga a tshi vula zwisiku zwa makole,
a fhufha a nga zwiṋoni.
15Maanḓa awe mahulu a kuvhanganya makole,
a wisa matombo a tshifhango.
17aMubvumo wawe u tshi ri “ngindii”
ḽifhasi ḽi songololwa sa tshikole tshi tshi beba.
16Thavha dzi ri u mu vhona dza dzinginyea.
A tshi bvelela thavha dzi a dzinginyea,
musi a tshi zwi funa muya wa Tshipembe u a vhudzula.
Muya wa Tshipembe u vhudzula nge a bvisa ipfi ḽawe,
17bna maḓumbu a Devhula na tshiḓumbumukwe.
18U hasha gabugu unga zwiṋoni zwi tshi phaphulana,
ya wela fhasi unga lutsinga lwa nzie dzi tshi kavha,
u tsa hayo hu nga magerere a tshi tsela fhasi.
Maṱo a kanuka lunako lwa vhutshena hayo,
muhumbulo u akhamadzwa nga kuwele kwayo.
19U hasha mahaḓa fhasi unga muthu a tshi shulula muṋo,
mahaḓa a khaṱha unga mipfa kha lutavhi.
20U ḓisa muya wa Devhula u rotholaho,
mihuvhi ya maḓi ya shanduka magwada a mahaḓa,
a khaṱhisa maisha oṱhe a maḓi,
zwa nga o ambadza mihuvhi tshipilakhana tsha tsimbi.
21Muya u gotsha dzithavha, u fhisa soga,
wa putisa hatsi vhutete ha nga ho swa nga mulilo.
22A dovha a ruma makole zwoṱhe zwa mbo ḓi vuwa,
ha wa ṅwando wa rothodza shango ḽo swaho.
23O dzikisa dzivha ḽihulu nga ṱhalukanyo yawe,
a zwala zwiṱangadzime lwanzheni.
24Vha endaho lwanzheni vha anea khombo dzalwo,
ri tshi zwi pfa ri a akhamala,
25ngauri na hone hu na zwi kanukisaho zwi sa athu vhonwa,
phukha dza tshakha-tshakha
na mabuka mahulu a lwanzheni.
26Ndi Ene
a no sumbedza muḓinḓa wawe nḓila a swika vhuimangalavha;
zwithu zwoṱhe zwi farekanywa nga ipfi ḽawe.
27Ri nga dovha ra amba maṅwe manzhi ra ḓi ṱahedza.
Ipfi ḽa u fhedzisela nga ḽi tou ri,
“Mudzimu ndi Ene zwoṱhe kha zwoṱhe.”
28Nungo dza u mu renda
ri ḓo dzi wanafhi?
Hufha e Ene Muhulwanesa,
ú fhira mishumo yawe yoṱhe.
29Vhukuma Muṋe washu u a ofhisa,
vhuhulwane hawe vhu a ri akhamadza
nungo dzawe dzi a mangadza.
30Hulisani Muṋe washu
nga thendo dzaṋu
naho a tshi dzi fhira kule.
Vusani nungo dzaṋu ni mu hulise;
ni songo neta, ni ḓo ḓi ṱahedza.
31Ndi nnyi we a vhuya a mu vhona
hune a nga ṱalutshedza
uri Mudzimu ndi nnyi?
Ndi nnyi ane a nga kona u mu renda
a si ṱahedze?
32Hu tshee ho sala zwinzhi
zwi no fhira izwi,
zwo ri dzumbamaho;
zwe ra zwi vhona
zwi tshee zwiṱukuṱuku.
33Muṋe washu ndi Ene
o vhumbaho zwithu zwoṱhe,
vhane vha mu ofha a vha ṋea vhuṱali.
