SIRAKHA 44

₁Zwino nga ri khoḓe

vhanna vhaḽa vha bvumo,

vhomakhulukuku washu

vha tshi ya nga mirafho yavho.

₂Muṋe washu o vha ṋea vhugala vhunzhi,

a ṱana vhuhulwane hawe u bva kale na kale.

₃Vhaṅwe vho vhusa mivhuso yavho,

tshakha dzoṱhe dza renda maanḓa avho.

Vhaṅwe ndi vhaeletshedzi vha ṱhalukanyo,

vhaṋwe vha porofita maipfi a Mudzimu.

₄Vhaṅwe vha sumbedza lushaka nḓila

nga u ṱalukanya kuhumbulele kwa vhathu,

na nga vhuṱali ha maipfi a u laya vhathu.

₅Ndi vhasiki vha dziphisalema

na vha nyimbo dza u anea mishumo ya vhahali.

₆Ndi vhapfumi na vha maanḓa

vha no tshila nga mulalo mahayani avho.

₇Vhoṱhe avho

vho vha vha tshi huliswa nga murole wavho,

vha vha tsumbo yavhuḓi misi yavho.

₈Vhaṅwe vhavho vha tshi fa vho sia dzina ḽihulu;

na ṋamusi mishumo yavho i kha ḓi imbiwa.

₉Huno hu na vhaṅwe vha sa humbulwi; vho ri u fa vha lovha tshoṱhe.

Ndi tshifa vha songo vhuya vha vha hone,

na vhana vhavho vho salaho vho tou ralo.

₁₀Hone ri ḓo amba vhanna vha bvumo fhedzi,

vhe zwivhuya zwavho zwa si hangwiwe.

₁₁Ifa ḽavho ḽihulu ndi vhana na vhaḓuhulu

vhe Muṋe washu a vha fulufhedzisa.

₁₂Vhana vhavho vha tshee vho ima,

na vhaḓuhulu zwi ḓi vha nakela hu tshi itelwa vhone.

₁₃A vha nga shai vhaḓuhulu lini na lini,

vhugala havho vhu nga si thuthiwe.

₁₄Vho swiṱwa nga mulalo; dzina ḽavho a ḽi fi lini na lini.

₁₅Tshakha dzi ḓo amba vhuṱali havho,

tshivhidzo tsha imba thendo dzavho.

₁₆Enokho o takadza Muṋe washu,

a takulelwa ṱaḓulu,

uri mirafho i no ḓo tevhela i kande ṋayoni dzawe i shanduke.

₁₇Nua o vhonala e muvhuya o khunyelelaho,

misi ya khaṱhulo ya muḓalo wa maḓi o vha ene muḽaifa wa Mudzimu,

uri nga ene hu vhe na tsalela dza vhathu ḽifhasini,

o ri u sumbedzwa tshiga muḓalo wa maḓi wa fhela.

₁₈Mudzimu o vhofha nae mulanga wa lini na lini

uri zwivhumbwa zwoṱhe zwi si tsha ḓo lozwiwa nga muḓalo wa maḓi.

₁₉Abrahamu o vha makhulukuku wa tshakha nnzhi;

a hu na muṅwe we a nga ene nga vhugala.

₂₀O tevhedza mulayo wa Waṱaḓuluṱaḓulu,

a vhofha mulanga nae,

a u pfumbisa nga u fumba muvhilini,

musi a tshi lingiwa a wanala a tshi fhulufhedzea.

₂₁Ndi zwe Muṋe washu a mu fulufhedzisa nga muano,

a ri u ḓo shudufhadza tshakha dzoṱhe nga vha lutsinga lwawe,

a ri u ḓo mu andisa unga thoro dza buse,

a hulisa vha lutsinga lwawe u swika kha dziṋaledzi,

a vha ṋea shango ḽa vha ifa ḽavho

u bva lwanzheni u swika lwanzheni,

u bva Yufuratha u swika migumoni ya ḽifhasi.

₂₂Isaka na ene

Mudzimu o dovha a mu fulufhedzisa zwenezwo

zwi tshi itelwa Abrahamu khotsi awe.

Mulanga we Mudzimu a vhofha na vhokhotsi awe wa ḓi isa phanḓa,

mashudu a dzula kha ṱhoho ya Jakopo.

₂₃Mudzimu a khwaṱhisedza uri ndi ene tanzhe,

a mu ṋea shango ḽa vha ifa ḽawe,

a vhetshela matsinde a vhathu vhawe mikano,

a ṋea matsinde a fumi na mavhili mikovhe yavho.