Lwendo lwa Thobiasi a tshi yo vhinga Sara
Ndayo ya khotsi a Thobiasi
1Musi wonoyo Thobithi a elelwa siliva ye a i sia na Gabaele muḓini wa Ragese kha ḽa Media, a humbula a ri, 2“Zwino vhunga ndo humbela u fa, khezwi ndi sa vhidzi murwa wanga Thobiasi nda mu vhudza zwa siliva yanga ndi sa athu fa?” 3Ndi hone a tshi vhidza murwa wawe Thobiasi; a tshi swika a mu vhudza a ri, “Ṅwananga, musi ndi tshi fa u ntswiṱe zwavhuḓi. Hulisa mme au, u songo vha ṱutshela vha tshi kha ḓi tshila. U ite zwine zwa vha takadza, nahone u songo vhaisa mbilu yavho na kathihi. 4Elelwa ṅwananga, uri mme au vho tambula hani vha tshi itela iwe musi u tshee muvhilini wavho. Musi vha tshi fa u vha swiṱe tsini na nṋe tshaloni tshine nṋe nda ḓo swiṱwa khatsho.
5“Maḓuvha oṱhe a vhutshilo hau ṅwananga, mbilu yau i dzule i kha Mudzimu, u songo tshinya nga khole kana wa pfuka milayo yawe. U shume mishumo mivhuya maḓuvha oṱhe a vhutshilo hau, u songo tshimbila nḓilani dza u tshinya. 6Ndi uri arali u tshi ita zwi re zwone misi yoṱhe ya vhutshilo hau, zwi ḓo u nakela mishumoni yau yoṱhe, u ḓi nga vhoṱhe vha no ita zwivhuya.
7“Zwine wa vha nazwo u kovhele vhashai u sa gunguli. U tshi vhona vhashai, u songo tsinya iṱo; na Mudzimu a tshi u vhona ha nga tsinyi iṱo. 8Ṅwananga, ṋea zwifhiwa zwi tshi elana na zwine wa vha nazwo. Arali u na lupfumo luhulu, ṱusa zwifhiwa kha zwinzhi zwine wa vha nazwo. Arali u na zwi si gathi, u songo shona u ṱusa-vho kha zwenezwo. 9U tshi fha nga u ralo u ḓo vha u tshi khou fhahea, wa ḓo ri u pfa nḓala wa fhahulula. 10U ṋea vhashai zwifhiwa zwi tshidza muthu lufuni, a si sunguvhele swiswini. 11Vhoṱhe vhane vha ṋea vhashai zwifhiwa vha khou ṋekedza nduvho i takadzaho Waṱaḓuluṱaḓulu.
12“U tinye vhupombwe, tshihulwane u dzee mufumakadzi wa lutsinga lwa vhomakhulukuku wau. U songo dzea mutsinda ane a si vhe wa tsinde ḽa khotsi au; hufha riṋe ri vha lutsinga lwa vhaporofita. Mutukana wanga, dzula u tshi elelwa Nua, Abrahamu, Isaka na Jakopo, vhone vhokhotsi ashu vha kale; vhoṱhe vho dzea vhafumakadzi kha mashaka avho, mashudu avho o pfukela na kha vhana. Shango ḽi ḓo vha ifa ḽa vhaḓuhulu vhavho. 13Zwenezwo ṅwananga, funa mashaka au. U songo ḓihudza wa nyadza mashaka au, vhatuka na vhasidzana vha vhathu vha hau, wa hana u ḓidzetshela mufumakadzi khavho; lunyadzo lwonolwo lu na ndozwo na vilinga. Vhusaphe vhu vhanga vhushai ha beba mutshinyalo.
14“Malamba a muthu ufhio na ufhio ane a u shumela u songo dzula nao ḽa vhuya ḽa tsha, ṱavhanya u mu holela. Arali u tshi shumela Mudzimu, pfufho yau u ḓo i wana. U songo wela zwithu nṱha; u ḓilange kha maitele au. 15U songo ita muṅwe zwine iwe muṋe wa zwi sanda. U songo nwa lwa u kambiwa, u songo vha tshamasosa.
16“Vhuswa hau u ṅwatele vha re na nḓala, vha na tsiku u vha shavhedze. Zwine wa sia u ṋee vhashai u sa gunguli. 17U vhe mapakulile wa zwiḽiwa na waini musi hu tshi swiṱwa muvhuya, hone u songo zwi kovhela vhavhi.
18“Tenda u eletshedzwa nga muthu muṅwe na muṅwe wa vhuṱali, u songo nyadza nyeletshedzo ine ya nga u farisa. 19Renda Mudzimu Muṋe washu misi yoṱhe, u mu humbele a u endedze, u swike he wa livha hone. Ndi uri vhuṱali a ho ngo ṋewa lushaka luṅwe na luṅwe, lutamo lwa zwivhuya ndi tshifhiwa tsha Muṋe washu. Muṋe washu u a hulisa muthu nga hune a funa kana a mu posa fhasi-fhasi vhudzulavhafu. Zwino ṅwananga, u vhulunge ndayo dzanga mbiluni yau, dzi songo vhuya dza bva mihumbuloni yau.
20“Zwino ṅwananga, thetshelesa ndi u vhudze: ndo sia mangwende a fumi a siliva na Gabaele murwa wa Gabri muḓini wa Ragese kha ḽa Media. 21U songo ḽa mbilu nga vhushai hashu ṅwananga. U ḓo vha mupfumi arali u tshi ofha Mudzimu, wa tinya vhuvhi, wa ita zwine zwa takadza Mudzimu Muṋe washu.”
