VHUṰALI 10

₁Vhuṱali ho tsireledza

khotsi wa u thoma fhano shangoni

we a vhumbiwa e eṱhe.

Ndi hone he ha mu vusa o wa,

₂ha mu ṋea maanḓa a u vhusa zwithu zwoṱhe.

₃Hone musi Kaini, munna muvhi,

a tshi vhu ṱutshela ó sinyuwa,

o lovha nge a vhulaha murathu wawe nga mbiti.

₄Musi ḽifhasi ḽo ḓala maḓi nga mulandu wa muvhi onoyo

vhuṱali ha dovha ha ḽi tshidza

hó hwala Nua, munna muvhuya, nga gungwa ḽa thanda zwayo.

₅Musi tshakha dzoṱhe nga shango dzo vilingana

nga u mbwandamela vhuvhini,

ndi vhuṱali he ha nanga Abrahamu, munna muvhuya,

ha mu vhulunga uri a si khakhe maṱoni a Mudzimu,

ha mu khwaṱhisa

uri a si pfele murwa wawe vhuṱungu.

₆Musi vhavhi vha tshi khou lozwiwa,

ndi hone vhuṱali he ha lamukisa Loto, munna muvhuya,

a tinya mulilo we wa nela Miḓi Miṱanu.

₇Vhuṱanzi ha vhuvhi havho vhu tshee hone;

phanga i kha ḓi dubisa vhutsi,

zwimela zwi aṋwa mitshelo i sa vhibvi,

na phuphu ya muṋo i tshee yo ima henefho

tshi tshihumbudzo tsha muthu a sa tendi.

₈Vhenevho nga u nyadza vhuṱali

vho shaiswa mashudu a u ḓivha zwi re zwone,

vha dovha vha sia ḽifhasi

tsha vha tshihumbudzo tsha vhutsilu havho

uri vhutshinyi havho vhu si dzumbee.

₉Hone vhuṱali, vhane vha vhu shumela ho vha lamukisa khomboni.

₁₀Musi Jakobo, munna muvhuya,

a tshi shavha mbiti dza mukomana wawe,

ndi hone he ha mu endedza nḓilani dze dza tou tswititi,

ha mu sumbedza muvhuso wa Mudzimu,

ha mu ṋea nḓivho ya zwithu zwikhethwa,

ha ita uri zwine a shuma zwi mu nakele,

ha andisa mitshelo ya zwa biko ḽawe.

₁₁Vhuṱali ho ima nae,

ha mu pfumisa, ha mu tsireledza

musi vhakandeledzi vhawe vha tshi ita vhutshivha.

₁₂Vhuṱali ho mu tsireledza kha maswina awe,

ha mu tinyisa khunḓa dze vha vea,

ha ita uri a lwe tsimbe khulu a kunde,

uri a ḓivhe uri u luvha Mudzimu hu na maanḓa a no fhira zwoṱhe.

₁₃Vhuṱali a ho ngo ṱutshela Josefa,

munna muvhuya, musi o rengiswa;

ho mu lamukisa vhuvhini.

₁₄Ho mu fhelekedza a tshi poswa dindini,

ha si mu litshe musi o vhoxwa,

ha vhuya ha mu ṋea luḓo lwa vhuhosi,

a vho vhusa vhakandeledzi vhawe,

ha vha u dzumbulula vhe vha mu pomoka uri vha a zwifha,

ene ha mu ṋea khuliso ya lini na lini.

₁₅Vhathu vhakhethwa,

lushaka lu si na mulandu,

ndi hone vhuṱali ho vha tshidzaho

kha lushaka lwe lwa vha kandeledza.

₁₆Vhuṱali ho dzhena muyani wa Mushe, muḓinḓa wa Muṋe washu,

ha imedzana na mahosi a ofhisaho nga zwiga na zwimangadzo.

₁₇Vhuṱali ho ṋea vhakhethwa vha Mudzimu malamba a mishumo yavho,

ha vha tshimbidza gondoni ḽi mangadzaho,

ha vha murunzi wavho masiari na ṋaledzi vhusiku.

₁₈Vhuṱali ho vha wedza Lwanzhe Lutswuku,

ha vha pfukisa mativha a maḓi,

₁₉huno ha tiba maswina avho,

ha konou vha pfela nnḓa ha mativha a lwanzhe.

₂₀Zwenezwo vhavhuya vha ṱangula vhavhi.

Muṋe washu, dzina ḽau ḽikhethwa vho ḽi imbela nyimbo,

tshanḓa tshau tshi vha tsireledzaho vha tshi renda mazha,

₂₁nge vhuṱali ha vula milomo ya zwimuma,

ha ita uri ndimi dza dzitshetshe

dzi ambe zwi pfalaho.