VHUṰALI 15

₁Hone Iwe Mudzimu washu u na vhuthu,

u a fulufhedzea, a u fheli mbilu,

u vhusa zwoṱhe nga khathutshelo.

₂Nangwe ra tshinya, ri vhathu vhau,

hufha ri tshi tenda maanḓa au.

Hone a ri nga tshinyi;

ri ḓivha uri ri vhau.

₃Vhukuma u ḓivha Iwe

ndi hone vhuvhuya ho fhelelaho,

u ḓivha maanḓa au ndi wone mudzi wa u sa fa.

₄Riṋe a ro ngo xedzwa

nga zwifanyiso zwo vhaḓiwaho

nga vhutsila vhuvhi ha vhathu,

a ro ngo xedzwa nga mushumo wa vhafhomi u sa aṋwi mitshelo,

kana nga zwifanyiso zwo fhomiwaho nga mivhalavhala.

₅Tsilu ḽi tshi zwi vhona ḽi a zwi ṱuvha,

ḽa tama tshivhumbeo tshi sa tshili tsha tshifanyiso tsho faho.

₆Vhane vha zwi ita,

na vhane vha zwi ṱuvha,

na vhane vha zwi luvha

vhoṱhe ndi vhafuni vha vhuvhi;

vha fanela u wana zwenezwo zwe vha zwi lavhelela.

₇Nga ri dzou vhona muvhumbi wa khali:

u shisha mabiko a tshi suka vumba,

a tshi vhumba midzio ine ra shuma ngayo.

U vhumba midzio i no shuma zwo kunaho,

vumba ḽi tshee ḽeneḽo,

a dovha a vhumba ngaḽo zwi no shuma zwa tshika.

Muvhumbi wa vumba

ndi ene a no elekanya

uri mudzio muṅwe na muṅwe u ḓo shuma zwifhio.

₈U dovha a ḓinetisela zwi si zwone

a tshi vhumba mudzimu u si na mushumo

nga vumba ḽeneḽo ḽithihi.

Munna uyo a si kale

ó vhumbwa nga mavu ene muṋe,

nahone hu si kale u ḓo dovha a vha mavu

musi a tshi pfi a vhuise vhutshilo he a vha o hadzimiwa.

₉Naho zwo ralo ha vhilaeli nga zwauri u ḓo fa,

kana nga vhupfufhi ha vhutshilo hawe;

tshawe ndi u pikisana na vhafuli

vha musuku na siliva,

na u edzisa vhavhumbi vha musinasetha,

a ṱongisa midzimu yawe ya zwifanyiso.

₁₀Mbilu yawe ndi milora,

zwe a lavhelela zwi fhirwa nga matope,

vhutshilo hawe vhu fhirwa nga vumba;

₁₁ngauri

a tshi elekanya Muvhumbi wawe

we a mu vhudzulela muya u tshilaho

a mu ṋea vhutshilo,

o shanda mihumbulo,

₁₂a dovha a khakha

nga u sedza vhutshilo hashu u mutambo,

tshifhinga tshine ra tshila a vhona

vhu vhushavhi vhune muthu a bindula.

U ri,

“Nangwe nda bindula nga vhufhura,

tenda ndi tshi ḽa vhuswa.”

₁₃Vhukuma u a zwi ḓivha u fhira vhaṅwe vhoṱhe

uri u khou tshinya

musi a tshi dzhia mavu

a vhumba midzio i pwasheaho na midzimu ya zwifanyiso.

₁₄Vhutsilu vhu ṱungufhadzaho

vhu no fhirwa na nga muhumbulo wa lushie,

ndi ha maswina a vhathu vhau vho vha itaho dziphuli.

₁₅Vhone vho dzhia midzimu

ya zwifanyiso ya dzitshakha dzoṱhe

vha ri ndi midzimu.

Midzimu iyo i na maṱo a sa vhoni,

i na ningo dzi sa femi,

i na nḓevhe dzi sa pfi,

i na minwe i sa phuphuledzi,

i na milenzhe i sa tshimbili.

₁₆Ndi uri zwo itwa nga muthu,

zwo vhumbiwa nga we a tou hadzimiwa muya.

Vhukuma muthu a nga kona hani

u vhumba mudzimu une wa fana nae?

₁₇Ene ndi muthu a faho,

u vhumba tshithu tsho faho

nga minwe yawe i nyadzaho Mudzimu.

Ene u kha ḓi fhira zwithu zwine a zwi luvha,

ngauri ene o vhuya a tshila,

zwone zwi dzula zwo fa.

₁₈Vha dovha vha phapha mbulu kha iṅwe

nga u ṱana vhutsilu havho

vha tshi luvha zwone zwipuka zwi nengisesaho

₁₉zwi si na na lunako na luṱukuṱuku

arali lunako lu lwone

lu tamisaho kha dziphukha,

zwipuka zwi songo khoḓwaho nga Mudzimu,

zwi si na mashudu awe.