VHUṰALI 19

₁Hone vhavhi, mbiti

a dzo ngo vha khathutshela,

a dzo ngo vha humela dza vhuya dza vuledza,

ngauri Mudzimu o dzula o ḓivha zwine vha ḓo ita.

₂O dzula o zwi ḓivha uri

vha ḓo thoma vha tendela Vhaheberu uri vha pfuluwe,

vha ita na u vha thatha,

hone vha ḓo dovha vha rembulusa mbilu dzavho,

vha vha tevhelela.

₃Vho vha vha tshee mushumoni wa maitele a u swiṱa vhafu,

vha tshi khou lila zwaloni zwa vhafu,

vha mbo ḓi dovha

vha elekanya zwa vhuḓabaḓaba,

avho vhe vha vha ṱuwisa

vhó tou vha luvhelela uri vha ṱuwe,

vha vho vha tevhelela

zwa nga ndi phuli dzo shavhaho.

₄Vha tshi kalula nga u ralo

vho ṱuṱuwedzwa

nga zwe Mudzimu a vha livhanya nazwo,

a vha hangwisa zwe zwa no ḓi vha wela,

uri vha wane ṱhamu yo vha fanelaho,

vhuṱungu havho vhu ṱhaphuwe,

vha wane ṱhamu nthihi yo vha salelaho.

₅Vho wana vhathu vhau

vhó fara lwendo vhá songo humbula,

na vhone vhaṋe vha welwa nga lufu lu sa ngi lwa vhaṅwe.

₆Vhukuma tsiko yoṱhe yo pfa ndayo dzau,

ya nga i khou dovha u vhumbwa nga huswa,

zwi tshi itelwa uri vhana vhau

vha vhulungee vha si huvhadzwe.

₇Mishasha yo vha yo tibedzwa nga gole,

he ha vha hu na lwanzhe

ha vhonala

hu tshi ṱoṱomowa shango ḽo omaho:

Lwanzhe Lutswuku lwa vha gondo ḽi tshimbileaho,

he ha vha hu na magabelo ha vha govha ḽi re na hatsi.

₈Henefho ha pfuka lushaka lwoṱhe

lwó pilelwa nga tshanḓa tshau,

vha tshi khou sedza zwimangadzo tshiṅwe izwo.

₉Vho vha vha tshi nga dzibere dzi tshi khou fula,

vha khana unga dzingwana,

vha tshi renda Iwe,

Muṋe washu, Mutshidzi wavho.

₁₀Vho vha vha tshi kha ḓi elelwa

zwe vha itwa musi vhe dziṱhunḓu:

shango ḽi tshi ṱanza vhunyunyu

ḽa si tsha dzwala dziphukha,

milambo i tshi ṱanza zwiḓula zwi si na mbalo,

ya si tsha ḓisa dzikhovhe.

₁₁Ngavhuya vha ita na u vhona zwiṋoni

zwi tshi bvelela nga nḓila ntswa;

Vhaisraele vha dzikhusha

vha humbela zwiḽiwa zwa madzanga;

₁₂khwali dza mbo ḓi kavha fhasi dzi tshi bva lwanzheni uri vha ḽe vha fure.

₁₃Hone vhavhi vha welwa nga khombo,

naho vho ranga u tsivhudzwa

nga mithathabo i nisaho tshifhango.

Vhukuma

vho tambulela vhutshinyi havho zwó fanela,

nge vha vhengesa ṱhunḓu dzavho.

₁₄Ndi zwone, ho ḓi vha na vhaṅwe

vhe vha hana u swielela vhatsinda,

hone Vhaegipita vho dzhia vhaeni vho vha tondaho vha vha ita dziphuli.

₁₅Zwi si izwo fhedzi;

vhatshinyi vho ṱanganedza vhatsinda nga mipama,

nahone

vha nga si kundwe u ṱungufhadzwa,

₁₆hone Vhaegipita

vho thoma u vha ṱanganedza

nga u vha itela vhuṱambo,

vha fhedza nga u vha kandeledza

nga u vha shumisa mishumo i konḓaho, naho zwino

vho vha vho no vha na pfanelo

dza vhadzulapo dzi fanaho na dzavho.

₁₇Ndi zwe vha ḓo pofuliswa,

u ḓi nga vhaḽa vhe vha edzisa u pwasha vothi ḽa Loto muvhuya,

vha tibwa nga swiswi,

muṅwe na muṅwe a tou phuphuledza

a tshi ṱoḓa muṋango wa nnḓu yawe.

₁₈Mudzimu o shandukisa zwilidzo zwa zwivhumbi,

unga thale dza haripa

dzi tshi lidza luimbo luswa,

ngeno u elela ha luimbo hu sa tumuwi.

Huno ndi zwenezwo zwe zwa itea misi ya Mupfuluwo:

₁₉Zwivhumbwa zwa shango

zwo shandukiswa zwa vha zwa maḓini,

zwine zwa tala zwa ya shangoni.

₂₀Mulilo u maḓini wo ḓi duga,

maḓi a hangwa tsiko yao ya u dzima mulilo.

₂₁Khavhu na dzone dza si fhise ṋama

ya phukha dzi si na nungo

dze dza tshimbila ngomu hadzo;

na zwiḽiwa zwa ḽiṱaḓulu

zwi no ṋoka sa mahaḓa khavhu a dzo ngo zwi ṋokisa.

₂₂Ndi zwone Muṋe washu,

wo hulisa vhathu vhau

wa vha ṋea vhugala nga nḓila dzoṱhe;

a wo ngo vhuya wa vha ṅaledza,

wo ḓi ima navho misi yoṱhe, hoṱhe-hoṱhe.