VHUṰALI 3

₁Huno mimuya ya vhavhuya

i tshanḓani tsha Mudzimu,

a hu na u teta hu no ḓo vha kwama.

₂Maṱoni a matsilu vha nga vho fa,

u ṱuwa havho ha vhonwa

unga ndi u welwa nga khombo,

₃u ri ṱutshela havho ha pfi ndi u lozwiwa tshoṱhe,

mathina vha awela nga mulalo.

₄Nangwe maṱoni a vhathu ho vha hu u vha laṱisa,

hone vho vha vho lavhelela u sa fa.

₅Vho nyambudzwanyana,

vha ḓo shudufhadzwa zwihulu;

Mudzimu o vha a tshi vha linga,

a wana vho fanela u dzula nae.

₆O vha linga unga musuku u ṋanḓoni,

a vha ṱanganedza sa zwiṱhavhelo zwi fhiswaho.

₇Musi vha tshi haṱulwa

vha ḓo pembela

vha penya nga vhugala,

vha thamuwa unga ṱhase tshigutheni tsha ṱanga.

₈Vha ḓo haṱula dzitshakha,

vha vhusa mavhuthu,

Muṋe washu a vha khosi yavho lini na lini.

₉Vhane vha mu fulufhela

vha ḓo ṱalukanya ngoho,

vha fulufhedzeaho

vha ḓo dzula nae nga lufuno,

ngauri vhuthu na tshilidzi

zwo lindela vhakhethwa vhawe, u lamulela vhanangiwa vhawe.

₁₀Hone vha no nyadza Mudzimu

vha ḓo wana ṱhamu

yo fanelaho mihumbulo yavho,

vhunga vho nyadza vhavhuya,

vha shandukela Muṋe washu.

₁₁Ndi zwone,

ane a nyadza vhuṱali na ndayo u a ṱungufhadza.

Zwe vha lavhelela a vha nga zwi wani,

u ḓinetisa havho a hu aṋwi mitshelo,

zwe vha shuma a zwi vhuedzi tshithu.

₁₂Vhafumakadzi vhavho ndi mahwarahwara,

vhana vhavho a vha ḓivhalekani,

mbebo yavho yo shashata.

₁₃Musadzi wa muumba u na mashudu arali a sa solisei,

á songo dzheniswa nḓuni nga munna muṅwe;

u ḓo aṋwa mitshelo

musi Mudzimu a tshi ṱola mimuya.

₁₄Mashudu na muluvhedzwa

we tshanḓa tshawe tsha si tshinye,

we a si khakhele Muṋe washu nga mihumbulo;

u ḓo pfufhelwa u fulufhedzea hawe,

a wana ifa ḽi takadzaho

thembeleni ya Muṋe washu.

₁₅Mutshelo wa mushumi wa biko

ndi wa vhugala,

mudzi wa ṱhalukanyo a u sini.

₁₆Hone vhana vha dziphombwe

a vha nga lumi luṱanga,

o bebwaho nga vhupombwe u ḓo ngalangala.

₁₇Nangwe vha lalama vha ḓo nyadzea,

u lalama havho ha fhedza nga u sa huliswa;

₁₈nangwe vha fa vha tshee nga havho, a vha na tshine vha nga fulufhela

kana tshine tsha vha khuthadza musi wa khaṱhulo;

₁₉murafho muvhi wo lalelwa nga tshiṱuhu.