VHUṰALI 4

₁Ndi khwiṋe u shaya mbebo u muvhuya,

ngauri vhuvhuya hau a vhu nga fi,

vhu ḓo ḓi humbulwa,

vhu ḓihwa nga Mudzimu na vhathu.

₂Musi vhu hone vhathu vha a vhu edzisa,

musi ho ṱuwa vha a vhu ṱulutshela;

vhu ḓala muḓalo

hó ambara tshiala tsha u kunda lini na lini;

ho lwela miṅene yo kunaho,

ha vhonala ho kunda.

₃Hone mbebo ya vha nyadzaho Mudzimu

na u anda háyo i ḓo vha mahandana;

maḓadzwane avho a si a vhukuma,

ha nga ṱoki midzi,

ha nga fareleli a khwaṱha.

₄Nangwe matavhi ao a ṱuma lurere tshifhinganyana,

ha na midzi,

a ḓo dzinginyiswa nga muya,

a tupulwa nga maḓumbu a tshi tita.

₅Thavhi dzao dzi ḓo swaruwa dzi tshee thethe,

mitshelo yao i si ḽiwe, e magaga,

i si vhe na mushumo.

₆Ndi zwone,

vhana vho bebwaho nga vhupombwe,

musi Mudzimu a tshi vha sengisa

vha ṋea vhuṱanzi ha vhuvhi ha vhabebi.

₇Muvhuya nangwe a si lalame, u ḓo awedzwa.

₈Vhulala vhu huliseaho a si u bebwa kale,

u vhona makole manzhi

a si hone vhutshilo vhukuma;

₉a hu aluwi muthu, hu aluwa mbilu,

vhutshilo vhu sa solisei ndi hone u lalama.

₁₀O takadza Mudzimu, a funiwa,

a takulelwa ḽiṱaḓulu uri a si tsha dzula na vhavhi,

₁₁a dzhavhulwa a ṱuwiswa,

uri vhuvhi vhu si xedze muhumbulo wawe

kana vhufhura ha kunga muya wawe.

₁₂Ndi uri madzanga a vhuvhi

a tsira zwi re zwivhuya,

mudzunguluwo wa nyemulo

u pambusa muhumbulo wa a si na maano.

₁₃Ho ngo lenga u vha o khunyelelaho; ndi hone u lalama hawe.

₁₄Muya wawe

wo vha u tshi takadza Muṋe washu,

ndi zwe a ṱavhanya a ṱuwa

uri a si tsha vhona vhuvhi ho mu tangaho.

Hone vhathu vho zwi vhona

vha si zwi ṱalukanye.

A vha koni u zwi vhona

₁₅uri vhanangiwa vha Mudzimu

vha ḓo vhona vhuthu hawe na tshilidzi,

na uri u lamulela vhakhethwa vhawe.

₁₆Vhukuma muvhuya o faho

u laṱa vhavhi vha no kha ḓi tshila;

a re muvhuya o khunyelelaho a tshee nga hawe

u laṱa o lalamaho vhuvhini.

₁₇Avho vhavhi vha vhona lufu lwa muṱali, vha si ṱalukanye

zwe Muṋe washu a mu vhetshela zwone,

na uri ndi mini o mu isa ho tsireledzeaho.

₁₈Vha a zwi vhona, vha mu nyadza,

hone Muṋe washu u a vha sea.

₁₉Hu si kale vha ḓo vha zwitumbu zwi nyadzeaho,

vha nyadziwa lu sa gumi vhe vhukati ha vhafu.

Mudzimu u ḓo vha rambaladza

vha shuvhama fhasi vho akhamala,

a vha dzinginyisa u swika nga miteo yavho;

vha ḓo nga phanga i sa medzi tshithu,

vha dziḓa vha si tsha humbulwa.

₂₀Musi milandu yavho i tshi vhalwa vha ḓo ḓa vha tshi ofha,

vhuvhi havho vhu ḓo livhana navho

ha vha pomoka.