ZAKARIA 12

₁Malaedzwa-nga-Mudzimu: Ngeḽi ipfi ḽa Muṋe washu ḽine ḽa amba Israele.

Hu amba Muṋe washu, Ene we a ṱharamudza lutombo, a tea ḽifhasi, a vhumba muya wa muthu ngomu hawe, u ri, ₂“Vhonani, Jerusalema ndi ḓo u ita tshinwelo tshi no ḓo kamba tshakha dzoṱhe dzo u tangaho. Hu ḓo ri hu tshi govhelwa Jerusalema, na miḓi ya Juda ya diwa.

₃“Musi wonoyo, Jerusalema ndi ḓo u ita tombo ḽine ḽa ḓo takulwa nga tshakha dzoṱhe. Vhoṱhe vhane vha linga u ḽi takula vha ḓo ḓihuvhadza nga maanḓa.” (Tshakha dzoṱhe dzi ḓo vha dzo kuvhanganela u lwa naḽo). ₄Musi wonoyo ndi ḓo rwa dzibere dzoṱhe dza hanganea, vhanameli vhadzo nda vha dzhenisa tshipengo. Hone vha Juda ndi ḓo vha sedza nga vhuthu. Bere dza vhathu vha dzitshakha ndi ḓo dzi swingisa. ₅Ndi hone vha mitupo ya Juda vha tshi ḓo amba nga mbilu vha ri, “Nungo dza vhadzulapo vha Jerusalema dzi bva kha Yahavee Mulangazwoṱhe Mudzimu wavho, dzi fhira dzanga.”

₆“Musi wonoyo vha mitupo ya Juda ndi ḓo vha ita unga khali ya mulilo une wa fhisa dzanda ḽa khuni, vha ḓo nga mulilo une wa fhisa maṱanga, vha ḓo fhisa tshakha dzo vha tangaho matungo oṱhe. Jerusalema u ḓo ima fhethu hawo u sa dzinginyei.”

₇Muṋe washu u ḓo ranga nga u lamukisa vhudzulo ha Juda uri khuliso ya muṱa wa Dafita na ya vhadzulapo vha Jerusalema i si fhire ya Juda. ₈Musi wonoyo Muṋe washu u ḓo tsireledza vhadzulapo vha Jerusalema, ane a shaya nungo khavho u ḓo vha na nungo dzi no nga dza Dafita, vha muṱa wa Dafita vha ḓo nga vharuṅwa vha Mudzimu, vha ḓo nga Muruṅwa wa Muṋe washu o vha rangaho phanḓa. ₉Musi wonoyo ndi ḓo lozwa tshakha dzoṱhe dzine dza ḓa u lwa na Jerusalema.

₁₀“Hone vha muṱa wa Dafita na vhadzulapo vha Jerusalema ndi ḓo vha shululela muya wa vhulenda na u ḓivhuedza. Vha ḓo nṱoḓa vha tshi ḓisolela zwiḽa zwe vha runga muḓinḓa wanga a fa, vha mu lilela unga muthu a tshi lilela ṅwana muthihi fhedzi wa mutuka, vha vusa tshililo zwa nga muthu a tshi lilela ṅwana wa tanzhe. ₁₁Musi wonoyo hu ḓo vha na tshililo tshihulu kha ḽa Juda, zwa nga musi hu tshi lilelwa Hadada Rimoni govhani ḽa Megido. ₁₂Vhathu vha shango vha ḓo lila zwi tshi ya nga mitupo yavho, vha lutsinga lwa Dafita vha ḓo vha vhe thungo, na vhasadzi vhavho vhe nga tshavho; vha lutsinga lwa Nathani vhe thungo, na vhasadzi vhavho vhe nga tshavho; ₁₃vha lutsinga lwa Livi vhe thungo, na vhasadzi vhavho vhe nga tshavho; vha lutsinga lwa Shimei vhe thungo, na vhasadzi vhavho vhe nga tshavho. ₁₄Vha tsinga dzoṱhe dzo salaho vha ḓo lila zwi tshi ya nga mitupo na vhasadzi vhavho vhe nga tshavho.”