ZAKARIA 2

₁Nda dovha nda lavhelesa, nda vhona munna o fara muelo nga tshanḓa! ₂Nda mu vhudzisa nda ri, “Vha khou ya ngafhi?”

Ene a fhindula a ri, “Ndi khou ya u ela Jerusalema, ndi ṱoḓa u wana vhunavha hawo na vhuphara hawo.”

₃Ndi hone muruṅwa we a vha a tshi khou amba na nṋe a tshi bvelela, ha ḓa muṅwe muruṅwa u mu ṱanganedza. ₄Uḽa wa u ranga a vhudza wa vhuvhili a ri, “Gidima u yo vhudza uyo muṱhannga o faraho muelo u ri, ‘Jerusalema u ḓo vha muḓi u si na mitsheṱo, nga u anda ha vhathu na thakha ngomu hawo. ₅Nṋe muṋe ndi ḓo vha mutsheṱo wa mulilo wo monaho nawo, nda vha lupenyo lwawo ngomu hawo.’ ”

₆Muṋe washu u ri, “Iḓani! Iḓani! Shavhani ni ṱuwe shangoni ḽa devhula, na khuḓani nṋa dza shango he nda ni balanganyela hone! Hu amba Nṋe Yahavee. ₇Vhuya! Ponyoka u shavhele Tsioni, iwe u dzulaho Babele!” ₈Muṋe washu Mulangazwoṱhe we a nthuma uri ndi thube vhugala ha dzitshakha u ri, “Ane a vhuya a ni kwama o nndonga munwe iṱoni.” A tshi amba tshakha dze dza ni ṱangula, u ri, ₉“Vhukuma ndi ḓo angaladza tshanḓa tshanga nda vha rwa, vha vhuya vha ṱangulwa na nga phuli dzavho.” Ndi hone ni tshi ḓo ḓivha uri ndi muruṅwa wa Muṋe washu Mulangazwoṱhe.

₁₀Muṋe washu u ri, “Iwe Ṅwananyana Tsioni, ṱavha mukosi u takale. Nṋe ndi khou ḓa, ndi ḓo dzula na inwi. ₁₁Tshakha nnzhi musi wonoyo dzi ḓo ḓibaḓekanya na Nṋe, dza vha vhathu vhanga. Ndi ḓo dzula na inwi.”

Ndi hone ni tshi ḓo zwi ḓivha uri Muṋe washu Mulangazwoṱhe o nthuma ha inwi. ₁₂Muṋe washu u ḓo dzhia Juda wa vha mukovhe wawe shangoni ḽikhethwa, Jerusalema wa dovha wa vha muḓi une a u funesa. ₁₃Fhumulani phanḓa ha Muṋe washu inwi vhathu noṱhe vha ḽifhasi, ngauri u khou ḓa a tshi bva vhudzuloni hawe vhukhethwa.