Eyokuqala yokumkani 1

₁KEKALOKU ukumkani u‐Davide ebemdala, ekolisile ukuba nemihla; baye bemgubungela ngengubo, kodwa bekungeko kufudumala kuye. ₂Zaza izicaka zake zati kuye: Makufunelwe inkosi yam ukumkani intombi, intombi ipela, eya kuma ebusweni bokumkani, ibe likolwanekazi lake; mailale esifubeni sako, ize ifudumale inkosi yam ukumkani. ₃Basuka bafuna intombi entle kuyo yonke imida yakwa‐Sirayeli, bamfumana u‐Abishage um‐Shunemekazi, bamzisa kukumkani. ₄Yaye intombi leyo ibintle kunene, yaba likolwanekazi lokumkani, yamonga; kodwa ukumkani wabengayazi.

₅Wandula u‐Adonija unyana ka‐Hagiti wazipakamisa, esiti: Mna ndoba ngukumkani; waza wazilungisela inqwelo nabakweli bamahashe, namadoda angamashumi mahlanu abaleke pambi kwake. ₆Kekaloku uyise ebengambindisanga emihleni yake ngokuti: Yinina ukuba wenje njalo? Yena naye ebemhle kakulu isimilo sake, wati unina wamzala emva kwo‐Abasalome. ₇Waza wacebisana no‐Jowabi unyana ka‐Tseruya, no‐Abiyatare umperisite; ababenceda, belandela u‐Adonija. ₈Kodwa u‐Tsadoki umperisite, no‐Benaya unyana ka‐Yoyada, no‐Natane umprofite, no‐Shimehi, no‐Rehi, namagoṙa abengaka‐Davide, bebengeko no‐Adonija. ₉Waza u‐Adonija wabinga igusha, nenkabi, nenkomo ezityetyisiweyo, ngasetyeni le‐Zohelete, elingasemtonjeni we‐Rogele, wamema bonke abazalwana bake, onyana bokumkani, nawo onke amadoda akwa‐Juda, izicaka zokumkani: ₁₀kodwa u‐Natane umprofite, no‐Benaya, namagoṙa, no‐Solomone umzalwana wake, akabamema.

₁₁Wandula wateta u‐Natane ku‐Batesheba unina ka‐Solomone, esiti: Akuvile na okokuba u‐Adonija unyana ka‐Hagiti ungukumkani, inkosi yetu u‐Davide ingakwazi nje? ₁₂Ngako kaloku yiza ke, makendikunike icebo, ukuba usindise ubomi bako, nobomi bonyana wako u‐Solomone. ₁₃Hamba uye ungene kukumkani u‐Davide, uti kuye: Akufunganga na wena, nkosi yam, kumkani! kwisicakakazi sako, ngokuti: Ngenyaniso u‐Solomone unyana wako woba ngukumkani emva kwam, waeya kuhlala yena pezu kweterone yam? kunganina ngoko ukuba u‐Adonija ungukumkani? ₁₄Bona ke, nxa usateta kona nokumkani, sendiya kungena mna emva kwako, ndiwaqinise amazwi ako.

₁₅Waza u‐Batesheba wangena kukumkani enkambilini: kekaloku ukumkani ebemdala kakulu; wati u‐Abishage um‐Shunemekazi wamonga ukumkani. ₁₆Watoba pantsi u‐Batesheba, waziqubuda pambi kwokumkani. Waza wati ukumkani: Ufuna nto nina? ₁₇Wayesiti kuye: Nkosi yam! wena wamfunga uyehova, utixo wako, kwisicakakazi sako, ngokuti: Ngenyaniso u‐Solomone unyana wako woba ngukumkani emva kwam, waeya kuhlala yena pezu kweterone yam! ₁₈Kanti kaloku, nanku u‐Adonija engukumkani; kanti kaloku, nkosi yam, kumkani! akukwazi: ₁₉kanjalo ubingile inkabi, nenkomo ezityetyisiweyo, negusha ngento eninzi, wamema bonke onyana bokumkani, no‐Abiyatare umperisite, no‐Jowabi inkosi yomkosi; kodwa u‐Solomone isicaka sako akammemanga. ₂₀Nawe, nkosi yam, kumkani! amehlo o‐Sirayeli bonke angakuwe, ukuba ubaxelele ungubanina oya kuhlala pezu kweterone yenkosi yam ukumkani emva kwayo. ₂₁Okanye kuya kuti, nxa inkosi yam ukumkani iya kulala noyise bayo, mna nonyana wam u‐Solomone soba ngaboni.

₂₂Kekaloku bona ke, nxa asateta nokumkani, wangena no‐Natane umprofite. ₂₃Kwaxelwa ke kukumkani, kusitwa: Nanku u‐Natane umprofite. Waza wangena ebusweni bokumkani, wazitoba pambi kwokumkani ngobuso bake ngasemhlabeni. ₂₄Wayesiti u‐Natane: Nkosi yam, kumkani! utshilo na wena ukuti: u‐Adonija woba ngukumkani emva kwam, waeya kuhlala yena pezu kweterone yam? ₂₅Ngokuba ehlile namhla, waya wabinga inkabi, nenkomo ezityetyisiweyo, negusha ngento eninzi, wamema bonke onyana bokumkani, nenkosi zomkosi, no‐Abiyatare umperisite: kanjalo, bona ke, bayadla bayasela nokusela pambi kwake, bati: Makapile ukumkani u‐Adonija! ₂₆Kodwa mna, mna sicaka sako, no‐Tsadoki umperisite, no‐Benaya unyana ka‐Yoyada, no‐Solomone isicaka sako, akasimemanga. ₂₇Kanene lento yenziwe yinkosi yam ukumkani na, ungasazisanga ke isicaka sako ungubanina oya kuhlala pezu kweterone yenkosi yam ukumkani emva kwayo?

₂₈Wapendula ukumkani u‐Davide, wati: Ndibizele u‐Batesheba. Waza wangena ebusweni bokumkani, wema pambi kwokumkani. ₂₉Wandula wafunga ukumkani, wati: Ehleli nje uyehova, okululeyo umpefumlo wam kulo lwonke uxinezeko; ₃₀ngenyaniso, njengokuba bendikufungela uyehova, utixo wo‐Sirayeli, ndisiti: Ngenyaniso u‐Solomone unyana wako woba ngukumkani emva kwam, waeya kuhlala yena pezu kweterone yam esikundleni sam; ngenyaniso ndiya kwenje njalo namhla nje. ₃₁Waza u‐Batesheba watoba ngobuso ngasemhlabeni, waziqubuda pambi kwokumkani, wati: Maipile inkosi yam ukumkani u‐Davide kude kube ngunapakade!

₃₂Wayesiti ukumkani u‐Davide: Ndibizele u‐Tsadoki umperisite, no‐Natane umprofite, no‐Benaya unyana ka‐Yoyada. Baza bangena ebusweni bokumkani. ₃₃Waza ukumkani wati kubo: Zitabateni nani izicaka zenkosi yenu, nikwelise u‐Solomone unyana wam pezu kweqwaṙaṙa elilelam, nihle naye ngase‐Gihone; ₃₄mabati u‐Tsadoki umperisite, no‐Natane umprofite, bamtambise kona abe ngukumkani pezu kwo‐Sirayeli; nize nivutele ngexilongo, niti: Makapile ukumkani u‐Solomone! ₃₅Niya kwandula ninyuke emva kwake, ukuba eze ahlale pezu kweterone yam; ngokuba yena eya kuba ngukumkani esikundleni sam; kanjalo yena ndimmisele ukuba abe yinkosi pezu kwo‐Sirayeli napezu kwo‐Juda. ₃₆Waza u‐Benaya unyana ka‐Yoyada wapendula ukumkani, wati: Amene; wanga angatsho njalo uyehova, utixo wenkosi yam ukumkani! ₃₇Njengokuba uyehova ebeko nenkosi yam ukumkani, kwa njalo makabeko no‐Solomone; neterone yake ayenze nkulu pezu kweterone yenkosi yam ukumkani u‐Davide.

₃₈Wandula wehla u‐Tsadoki umperisite, no‐Natane umprofite, no‐Benaya unyana ka‐Yoyada, naba‐Kereti, naba‐Peleti, bamkwelisa u‐Solomone pezu kwalo iqwaṙaṙa lokumkani u‐Davide, bamkokela ngase‐Gihone. ₃₉Waye u‐Tsadoki umperisite watabata upondo lweoli ententeni, wamtambisa u‐Solomone. Baza bavutela ngexilongo, bati bonke abantu: Makapile ukumkani u‐Solomone! ₄₀Basuka bonke abantu benyuka emva kwake, bati abantu kanjalo baloza ngemilozi, bavuya ngovuyo olukulu, wada waṙazuka umhlaba ngentlokoma yabo.

₄₁Kekaloku weva u‐Adonija, nabo bonke abamenywa ababenaye, nxa bebegqibile ukudla. Weva no‐Jowabi intlokoma yexilongo, wati: Inganina lengxokozelo yesixeko sinempitimpiti? ₄₂Nxa asateta, bona ke, u‐Jonatane, unyana ka‐Abiyatare umperisite, wafika; waza wati u‐Adonija: Ngena, ngokuba wena uyindoda etembekileyo, uya kushumayela indaba ezilungileyo. ₄₃Wapendula u‐Jonatane wati ku‐Adonija: Okunene inkosi yetu, ukumkani u‐Davide, imenzile u‐Solomone abe ngukumkani; ₄₄waye ukumkani etumile naye, u‐Tsadoki umperisite, no‐Natane umprofite, no‐Benaya unyana ka‐Yoyada, naba‐Kereti, naba‐Peleti, abamkwelisile pezu kwalo iqwaṙaṙa lokumkani; ₄₅kanjalo u‐Tsadoki umperisite, no‐Natane umprofite, bamtambisile abe ngukumkani e‐Gihone; benyukile kwa kona bevuya, sada sazanyazanyiswa isixeko: yiyo ingxokozelo eniyivileyo: ₄₆nakanjako u‐Solomone uhleli pezu kweterone yobukumkani. ₄₇Ewe kanjako zeza izicaka zokumkani ukutamsanqelisa inkosi yetu, ukumkani u‐Davide, zisiti: Igama lika‐Solomone makalenze utixo lilungile pezu kwegama lako, neterone yake ayenze nkulu pezu kweterone yako. Waza ukumkani wazitoba pezu kwomandlalo. ₄₈Kananjalo watsho ukumkani ukuti: Makabongwe uyehova, utixo wo‐Sirayeli, ondinikileyo namhla ohleliyo pezu kweterone yam, amehlo am ebonile nje!

₄₉Baza bankwantya bonke abamenywa ababekuye u‐Adonija, besuka, bahamba abanye ngabanye ngendlela yabo. ₅₀Woyika no‐Adonija ngenxa ka‐Solomone, wesuka, wahamba, waya wabambelela ezimpondweni zesibingelo. ₅₁Kwaza kwashunyayelwa ku‐Solomone, kusitwa: Nankuya u‐Adonija esoyika ukumkani u‐Solomone; ngokuba, bona ke, selebambile impondo zesibingelo, esiti: Makandifungele namhla nje ukumkani u‐Solomone, ukuba akayi kufisa isicaka sake ngeṙele. ₅₂Wayesiti u‐Solomone: Ukuba uya kwenza njengendoda etembekileyo, akuyi kuwa nalunye lwenwele zake ngasemhlabeni; kodwa ukuba inkohlakalo iya kufunyanwa kuye, uya kwandula afe. ₅₃Watuma ke u‐Solomone, baza bamhlisa esibingelweni. Wasuka weza, wazitoba pambi kwokumkani u‐Solomone. Wati u‐Solomone kuye: Yiya endlwini yako.