1Waza wafika e‐Derebe nase‐Lisitira: kekaloku bona ke, umdisipile otile ebekona, ogama lingu‐Timote, unyana womfazi otile obengum‐Judakazi okoliweyo, nowoyise obengum‐Girike; 2obenqi̔nelwa kakuhle ngabazalwana abebese‐Lisitira nase‐Koniyume. 3Yena lo u‐Paulusi watanda ukuba apume aye naye; waza wamtabata wamalusa, ngenxa yama‐Juda abekuzo ezondawo; ngokuba onke ebemazi uyise ukuba ungum‐Girike. 4Bati ke nxa bebezicanda izixeko, babanikela imiteto ebekugwetyiwe ngayo ngabapostile nabadala abebese‐Yerusaleme, ukuba bayibambe. 5Kwa nje ke iṙemente zibe ziqiniswa elukolweni, zamana zisanda inani lazo imihla ngemihla.
6Kekaloku bakuba bebecandile i‐Firijiya nelizwe le‐Galati, besalelwa ngumoya oyingcwele ukuteta ilizwi e‐Asiya, 7bati bakufika e‐Misiya, balinga ukuya e‐Bitiniya; kanti umoya akabavumela. 8Baza bedlula e‐Misiya behla beza e‐Tirowa. 9Kwaza kwabonakala umboniso ku‐Paulusi ebusuku: Kwaye kumi indoda etile yase‐Masedoniya, imbongoza, isiti nokuti: Wela uze e‐Masedoniya, usisize. 10Xeshekweni ke abebonile umboniso lowo, sati kwa oko safuna ukumka siye e‐Masedoniya, siqonda ngawo ukuba inkosi isibizele ukushumayela ivangeli kubo.
11Ngako sindulukile nje e‐Tirowa, sati ngqo ukuselishela e‐Samotirase, nangomhla olandelayo e‐Neyapolise. 12Saza sisuka kona saya e‐Filipi, esisixeko esikulu sesosahlulo sase‐Masedoniya, siyikoloni. Saye sibe sihlala kwesisixeko imihla etile: 13sati ke ngomhla wesabata sapuma saya pandle kwesixeko ngasemlanjeni, apo bekulisiko ukuba kutandazwe kona; saza sahlala pantsi, sateta kuwo amankazana abebutene ndawonye. 14Kwaye kusiva inkazana etile egama lingu‐Lidiya, umtengisikazi wezivato ezibomvu wasesixekweni se‐Tiyatira, ebibedesha utixo; entliziyo yayivulayo inkosi, ukuba inyamekele izinto ezibe zitetwa ngu‐Paulusi. 15Yati yona yakuba ibapitizeshiwe, nendlu yayo, yasibongoza, isiti: Ukuba nigwebile ukuti ndinyanisekile kwinkosi, ngenani endlwini yam, nihlale kona. Yaza yasiqu̔ba.
16Kwaye kute, nxa sibe sisiya endaweni yokutandaza, isicakazana esitile sinomoya wokulaula sasikaulela, esasisenzela inkosi zaso inzuzo enkulu ngokulaula. 17Sona salandela u‐Paulusi nati, sadanduluka, sisiti: Ababantu bazizicaka zikatixo opezu konke, ezisishumayezayo indlela yosindiso. 18Oku ke sasikwenza imihla yamininzi. Kodwa u‐Paulusi, ebindekile nje, wajika wati kumoya lowo: Ndiyakuyalela egameni lika‐Yesu Kristu ukuba upume kuso. Waza wapuma kwa ngeloxeshana.
19Kekaloku inkosi zaso zakubona ukuba itemba lenzuzo yazo limkile, zabamba u‐Paulusi no‐Silasi, zabar̔olela endaweni yentengo pambi kwabapati. 20Zaza zibangenisile emagoseni zati: Ababantu bayakataza isixeko setu kakulu, bengama‐Juda nje; 21abati bashumayele amasiko ekungavunyelwa tina ukuba siwamkele nokuba siwenze, singama‐Roma nje. 22Saza isihlwele sabasukela kunye; ati amagosa ebahlutile ingubo ngokuṙazula, axela ukuba mababetwe ngentonga. 23Baza bakuba bebenzele imivimbo emininzi babaposela entolongweni, bayalela umlindi wentolongo ukuba abagcine ngokuqinisekileyo: 24owati esamkele isiyalelo esinjalo, wabaposela entolongweni yapakati, waqinisa inyawo zabo emtini.
25Kekaloku pakati kwobusuku u‐Paulusi no‐Silasi bebetandaza, bavuma amaculo kutixo: baye ke ababanjwa bebapulapula. 26Kwaza kwabako ngokwalama isingcangcazelo somhlaba esikulu, yada yazanyazanyiswa imisekelo yentolongo: zasuka zavuleka ingcango kwa oko zonke, nezinxibo zabo bonke zatukululeka. 27Wati umlindi wentolongo evukile ebutongweni bake, ebona ukuba ingcango zentolongo zivulekile, war̔ola isiṙele, waza kuzibulala, eba ababanjwa besabile. 28Kodwa u‐Paulusi wamemeza ngelizwi elikulu, esiti: Ungazenzakalisi; ngokuba silapa kwa sonke. 29Waza wabiza isibane, watsibela pakati, waba engcangcazela, wawa pantsi pambi kwo‐Paulusi no‐Silasi, 30wabakokela ngapandle, wati: Zinkosi! ndifanele ukwenza nto nina ukuze ndisindiswe? 31Bati ke bona: Kolwa kuyo inkosi u‐Yesu Kristu, wauya kusindiswa wena nendlu yako. 32Baza bateta kuye ilizwi lenkosi, nakubo bonke abebesendlwini yake. 33Waza wabatabata naye ngelona ixeshana lobusuku, wahlanza imivimbo yabo, wabapitizeshwa yena nabo bonke abake kwa oko. 34Wati kanjalo akuba ebanyusele endlwini yake, wababekela ukutya, wagcoba ukuba ekoliwe kutixo, kunye nayo yonke indlu yake.
35Kekaloku kwakuba kusile, amagosa lawo atuma imisila, esiti: Bakulule abantu abo. 36Waza umlindi wentolongo wamtyela u‐Paulusi lamazwi, wati: Amagosa atumile ukuti manikululwe; ngako kaloku pumani, nihambe ngoxolo. 37Kodwa u‐Paulusi wati kuyo: Asityabula ekuhleni singagwetywanga, singabantu abangama‐Roma, asiposela entolongweni: kekaloku ngoku ayasiku̔pa ngasese na? hai kambe; makeze wona ngokwawo asikapele ngapandle. 38Yati imisila yaxela lamazwi kumagosa: aza oyika akuva ukuba bangama‐Roma, 39eza ababongoza, abakapela ngapandle, abatandaza ukuba mabemke esixekweni. 40Bapuma ke entolongweni, baza bangena endlwini ka‐Lidiya: baza bakuba bebebonile abazalwana, babonwabisa, bemka.
