U‐Jobi 7

₁Akuko na ukulwa emntwini pezu kwomhlaba? nemihla yake ayinjengemihla yomqashwa na? ₂Njengokuba ikoboka linxamela amatunzi, nanjengokuba umqashwa elinda umvuzo wake; ₃kwa njalo ndabelwe inyanga zobubi, ndimiselwe ubusuku bendiniso. ₄Nxa ndilele pantsi, sendisiti: Ndiya kuvuka ninina, bumke ubusuku? kanjalo ndincanyiswa kukuzamazama kude kuse. ₅Inyama yam yambatiswe impetu namagada otuli; intlonze yam ishwabene, iyanyibilika. ₆Imihla yam igqitisile ngokubaleka isilukiso somluki; iyapeliswa lingeko itemba. ₇Kumbula ukuba ubomi bam bungumoya; alisayi kubuya iliso lam libone ukulunga. ₈Iliso lalowo undikangeleyo alisayi kundibona; awako amehlo oba pezu kwam, koko ndingayi kubako. ₉Ilifu liyapela, liti shwaka; kwa njalo lowo ohlelayo ehadesi akayi kunyuka kona. ₁₀Akasayi kubuyela kanjako endlwini yake; nendawo yake ayisayi kubuya yazane naye.

₁₁Noko andiyi kubamba umlomo wam; ndiya kuteta eluxinezekweni lwomoya wam; ndokalaza ebuṙaṙeni bompefumlo wam. ₁₂Ndilulwandle, ndingumnenga kusinina, lento ubekileyo pezu kwam umlindo? ₁₃Ndakuti: Kwonditutuzela isilili sam, wosidambisa isikalazo sam umandlalo wam; ₁₄wandule ukunditusa ngamapupa, nokundoyikisa ngemiboniso: ₁₅ude umpefumlo wam uqashe ukuṙwishwa, ewe ukufa ngapezu kwamatambo am. ₁₆Ndiwadelile; andiyi kudla ubomi ngonapakade; ndiyeke, ngokuba imihla yam iyinto engendawo.

₁₇Uyinto nina umntu, ukuba umenze mkulu, nokuba umbekele intliziyo yako? ₁₈ukuba umohlwaye imiso yonke, umlinge amaxanyana onke? ₁₉Kwoba kade kangakananina ukuba akuyi kujika kum, nokuba akuyi kundiyeka ndide ndiginye amate am? ₂₀Ndonile; ndiyenza nto nina kuwe noko, wena mlindi wabantu? kunganina ukuba undibekile ndibe yinto yokuwelwa kuwe, ndide ndibe ngumtwalo kwa kum? ₂₁Kunganina kanjalo ukuba ungaxoleli isigqito sam, uyisuse inkohlakalo yam? ngokuba kaloku ndiya kulala elutulini; wondifuna kusasa, koko ndingayi kubako.