Imibalo 32

₁KEKALOKU usapo luka‐Rubene nosapo luka‐Gadi lwalunenkomo ezininzi, into eninzi kakulu: lwati lwakubona ilizwe lase‐Yahezere, nelizwe le‐Gileyadi, ukuba, bona ke, londawo iyindawo yenkomo; ₂lwandula lweza usapo luka‐Gadi nosapo luka‐Rubene, lwatsho ku‐Mosesi, naku‐Elezari umperisite, nakuzo inkosi zentlanganiso, ukuti: ₃i‐Hatarote, ne‐Dibone, ne‐Yahezere, ne‐Nimra, ne‐Heshebone, ne‐Elehale, ne‐Sebame, ne‐Nebo, ne‐Behoni; ₄elozwe owalibetayo uyehova pambi kwayo intlanganiso yo‐Sirayeli, lilizwe lenkomo; kanjalo izicaka zako zinenkomo. ₅Lwalekela lwati: Ukuba sifumene ufefe emehlweni ako, makunikwe elilizwe kwizicaka zako libe yimfuyo, uze ungasiwezi i‐Yoredane.

₆Koko u‐Mosesi wati elusatsheni luka‐Gadi naselusatsheni luka‐Rubene: Kanene abazalwana benu boya emfazweni na, nihlale apa nina? ₇Yinina ukuba nindwebise intliziyo yosapo luka‐Sirayeli, ukuze lungaweli ukuya kwelozwe uyehova ulupile lona? ₈Benje njalo ke oyihlo benu, okuya ndabasusayo e‐Kadeshe‐baneha ukuya kukangela ilizwe. ₉Nxa bebenyukile kwada kwasentilini ye‐Shekole, balikangela elozwe, baza bandwebisa intliziyo yosapo luka‐Sirayeli, ukuze lungayi kwelozwe abelupile lona uyehova. ₁₀Yandula yavuta ingqumbo kayehova ngomhla lowo, wayefunga ngokuti: ₁₁Ngenyaniso lamadoda abepuma e‐Jipete, aminyaka ingamashumi mabini napezulu ubudala bawo, akasayi kubona elozwe endifungile ngalo ku‐Abrahame, ku‐Yisake, naku‐Yakobi; ngokuba engakolisanga ukundilandela: ₁₂kupela ngu‐Kalebi unyana ka‐Jefune um‐Kenazi, no‐Yoshuwa unyana ka‐Nune; ngokuba bekolisile bona ukulandela uyehova. ₁₃Kwa njalo ingqumbo kayehova yavuta ngako‐Sirayeli, waza wabadungudelisa entlango iminyaka yamashumi mane, kwada kwagqityelwa sonke esosizukulwana esibe senzile okukohlakeleyo emehlweni kayehova. ₁₄Kekaloku nanku nina nivukile esikundleni soyihlo benu, isihlwele sabantu abonayo, ukuba kube kusandiswa ubushushu bengqumbo kayehova ngako‐Sirayeli. ₁₅Xeshekweni nibuyayo emva kwake, uya kwandula apinde kanjako ukubasalisa entlango; naniya kutshabalalisa bonke abantu aba.

₁₆Lwaza lwasondela kuye, lwati: Izibaya zegusha sozakela inkomo zetu, nezixeko sozakela abantwana betu: ₁₇kodwa tina siya kukauleza ukuxo̔ba, siye pambi kwosapo luka‐Sirayeli, kude kube kokuya siluzisileyo endaweni yalo; kanti abantwana betu baya kuhlala ezixekweni ezinqatyisiweyo, ngenxa yabemi belizwe. ₁₈Asiyi kubuyela ezindlwini zetu, lungekazamkelelanga usapo luka‐Sirayeli olunye ngolunye ilifa lalo. ₁₉Ngokuba singayi kulamkela lifa tina ndawonye nalo pesheya kwe‐Yoredane, nangasele: ngokuba ilifa letu lize kuti nganeno kwe‐Yoredane ngasempumalanga.

₂₀Wandula wati u‐Mosesi kulo: Ukuba niya kuyenza lento, — ukuba noya nixo̔bile pambi kwoyehova emfazweni, ₂₁bati bonke abaxo̔bileyo pakati kwenu bawele i‐Yoredane pambi kwoyehova, ade agqogqe intshaba zake pambi kwake, ₂₂liti nelizwe leyiswe pambi kwoyehova: noti kamva nibuye ke, nibe ningenatyala ebusweni bukayehova nasebusweni bo‐Sirayeli; nelilizwe lona loba yimfuyo kuni ebusweni bukayehova. ₂₃Kanti ukuba aniyi kwenje njalo, bona ke, nonile ngakuye uyehova: kodwa yazini isono senu ukuba sonifumana. ₂₄Zakeleni izixeko ngenxa yabantwana benu, nezibaya ngenxa yegusha zenu; nize nenze ngako okupumileyo emlonyeni wenu.

₂₅Lwaza usapo luka‐Gadi nosapo luka‐Rubene lwateta ku‐Mosesi, lusiti: Izicaka zako ziya kwenza njengokuyalela kwenkosi yam. ₂₆Abantwana betu, abafazi betu, inkomo zetu, nazo zonke izilo zetu, zoba kona apo ezixekweni zase‐Gileyadi; ₂₇kanti izicaka zako ziya kuwela, zonke zixo̔bele ukulwa, pambi kwoyehova ukuya emfazweni, njengokuba inkosi yam itshilo.

₂₈Waza u‐Mosesi wayalela ngalo u‐Elezari umperisite, no‐Yoshuwa unyana ka‐Nune, nabazintloko zendlu zoyise zezizwe zalo usapo luka‐Sirayeli: ₂₉waye u‐Mosesi esiti kubo: Ukuba usapo luka‐Gadi nosapo luka‐Rubene luya kuwela nani i‐Yoredane, lwonke luxo̔bele imfazwe, pambi kwoyehova, nokuba liya kweyiswa ilizwe pambi kwenu; niya kwandula nilunike ilizwe le‐Gileyadi libe yimfuyo. ₃₀Kodwa ukuba aluyi kuwela luxo̔bile nani, lwozuza imfuyo pakati kwenu elizweni le‐Kanane. ₃₁Lwaza lwapendula usapo luka‐Gadi nosapo luka‐Rubene, lusiti: Oko uyehova akutetileyo ezicakeni zako, siya kwenza ngokunjalo. ₃₂Siya kuwela tina, sixo̔bile, pambi kwoyehova, siye elizweni le‐Kanane; nemfuyo yelifa letu soba nayo nganeno kwe‐Yoredane.

₃₃Wandula u‐Mosesi wanika kulo, kwa kulo usapo luka‐Gadi, nakulo usapo luka‐Rubene, nakuso isiqingata sesizwe sika‐Manase unyana ka‐Josefe, ubukumkani buka‐Sihone ukumkani waba‐Amori, nobukumkani buka‐Hogi ukumkani we‐Bashane, ilizwe kunye nezixeko zalo emideni, izixeko zelizwe elingqongayo.

₃₄Lwaye usapo luka‐Gadi lwaka i‐Dibone, ne‐Hatarote, ne‐Harohere, ₃₅ne‐Hatarote‐shofane, ne‐Yahezere, ne‐Yogebeha, ₃₆ne‐Bete‐nimra, ne‐Bete‐harane, izixeko ezinqatyisiweyo; lwaka nezibaya zegusha.

₃₇Lwaye usapo luka‐Rubene lwaka i‐Heshebone, ne‐Elehale, ne‐Kiriyatayime, ₃₈ne‐Nebo, ne‐Bali‐mehone, (ziguqulelwe igama,) ne‐Sibama; lwawabiza ngamagama wambi amagama ezozixeko lwazakayo.

₃₉Lwasuka usapo luka‐Makire, unyana ka‐Manase, lwaya e‐Gileyadi, lwayibamba, lwagqogqa aba‐Amori ababekuyo. ₄₀Waza u‐Mosesi wanika i‐Gileyadi ku‐Makire, unyana ka‐Manase; wada wahlala kuyo. ₄₁Kanjalo u‐Yahire, unyana ka‐Manase, waya wabamba imizi yabo, wayibiza ngokuti yi‐Havote‐yahire. ₄₂Waya no‐Nobaki wabamba i‐Kenate namagxamesi ayo, wayibiza nge‐Nobaki, ngegama lake.