Amaculo 102

₁YIVA umtandazo wam, Yehova! isikalo sam masize kuwe. ₂Ungandifihleli ubuso bako: mhlana ndisebunzimeni, tobela kum indlebe yako; mhlana ndibizayo, zuhle undipendule.

₃Ngokuba imihla yam ipela njengomsi; amatambo am atshile njengeziko. ₄Intliziyo yam ibetiwe, yoma njengenca, ndada ndalibala ukudla isonka sam. ₅Ngenxa yelizwi lokugula kwam, amatambo am ate nama enyameni yam. ₆Ndinjengencwangube yentlango, ndinjengesikova sobugxwayiba. ₇Ndiyalinda, ndinjengehobohobo elilodwa pezu kwendlu. ₈Intshaba zam ziyandigxeka imini yonke; abo bandigezelayo bafungile ngakum. ₉Ngokuba ndityile ututu njengesonka, nokusela kwam ndikupitikezile nokulila, ₁₀ngenxa yengqumbo yako nomsindo wako: ngokuba undifunqule, wandikahlela pantsi. ₁₁Intsuku zam zinjengesitunzi esolukayo; ndomile njengenca.

₁₂Kodwa wena, Yehova! uya kuhlala kude kube ngunapakade, nenkumbuzo yako kwisizukulwana ngesizukulwana. ₁₃Uya kuvuka, ube nenceba pezu kwe‐Ziyone; ngokuba ixesha lokuyipata ngofefe, ewe, ixesha elimiselweyo, lifikile. ₁₄Ngokuba izicaka zako zikolela amatye ayo, zikedamela utuli lwayo. ₁₅Kukona abaheyideni baya kwoyika igama likayehova, nabo bonke okumkani bomhlaba ubungcwalisa bako. ₁₆Nxa uyehova aya kwaka i‐Ziyone, uya kubonakala ebungcwaliseni bake. ₁₇Wobeka emtandazweni wabahamba zé; akayi kudela umtandazo wabo. ₁₈Oku kwoba̔lelwa isizukulwana sasemva, baze abantu abaza kudalwa badumise uyehova. ₁₉Ngokuba ebekangele pantsi kwa senyangweni yake eyingcwele; kwa sezulwini uyehova wakangela umhlaba; ₂₀ukupulapula ukugula kwombanjwa; ukukulula abo bamiselwe ukufa; ₂₁ukushumayela igama likayehova e‐Ziyone, nodumo lwake e‐Yerusaleme; ₂₂nxa izizwe zihlanganisene ndawonye, nezikumkani, ukukonza uyehova.

₂₃Wabulala amandla am endleleni; wancipisa imihla yam. ₂₄Ndati: Tixo wam! zungandisusi ndisepakati kwemihla yam: iminyaka yako imi ngezizukulwana ngezizukulwana. ₂₅Kwa kudala wabeka ukuseka kwomhlaba; nezulu lingumsebenzi wezandla zako. ₂₆Zotshabalala zona, kodwa wena womana ubako: ewe, zonke ezo ziya kuguga njengengubo; uya kuziguqula njengesivato, zaziya kuguqulwa ke. ₂₇Kanti wena ukwa nguwe; iminyaka yako ayisayi kupela. ₂₈Abantwana bezicaka zako bohlala, nenzalo yazo yoqiniswa pambi kwako.