IZIKRONIKE I 24

₁Ke oonyana baka-Aron, amaqela abo ibingala: oonyana baka-Aron nguNadabhi, noAbhihu, noElazare, noItamare. ₂Bafa ooNadabhi noAbhihu phambi koyise, bengenanyana; baba ngababingeleli ooElazare noItamare.

₃Wabahlula uDavide: yanguTsadoki koonyana bakaElazare, yanguAhimeleki koonyana bakaItamare, ngodidi lwabo ekonzweni yabo. ₄Bafumaneka oonyana bakaElazare bebaninzi ngokweentloko zamagorha, ngaphezu koonyana bakaItamare. Babenjenje ukubahlula: koonyana bakaElazare, iintloko zezindlu zooyise zaba lishumi elinantandathu; koonyana bakaItamare, zasibhozo ngokwezindlu zooyise. ₅Babahlula ngamaqashiso, aba baba naba; ngokuba abaphathi bendawo engcwele nabaphathi bakaThixo bebengabakoonyana bakaElazare, naphakathi koonyana bakaItamare.

₆UShemaya unyana kaNataniyeli umbhali, wakubaLevi, wababhala phambi kokumkani, nabathetheli, noTsadoki umbingeleli, noAhimeleki unyana ka-Abhiyatare, neentloko zezindlu zooyise kubabingeleli nakubaLevi; indlu yoyise inye iphuma noElazare, inye iphuma noItamare.

₇Laphuma iqashiso lokuqala noYoyaribhi, ₈elesibini noYidaya, elesithathu noHarim, ₉elesiné noSehorim, elesihlanu noMalekiya, elesithandathu noMiyamin, ₁₀elesixhenxe noHakotse, elesibhozo noAbhiya, ₁₁elesithoba noYeshuwa, eleshumi noShekaniya, ₁₂eleshumi elinanye noEliyashibhi, eleshumi elinesibini noYakim, ₁₃eleshumi elinesithathu noHupa, eleshumi elinesiné noYeshebhabhi, ₁₄eleshumi elinesihlanu noBhilega, eleshumi elinesithandathu noImere, ₁₅eleshumi elinesixhenxe noHezire, eleshumi elinesibhozo noApitsetse, ₁₆eleshumi elinesithoba noPetaya, elamashumi omabini noYehezekeli, ₁₇elamashumi omabini analinye noYakin, elamashumi omabini anesibini noGamuli, ₁₈elamashumi omabini anesithathu noDelaya, elamashumi omabini anesiné noMahazeya. ₁₉Lulo olo udidi lwabo, lwenkonzo yabo yokungena endlwini kaYehova, ngokwesiko labo elanikwa nguAron uyise, njengoko wawisa umthetho uYehova uThixo kaSirayeli.

₂₀Ke koonyana bakaLevi abaseleyo ngaba: koonyana baka-Amram nguShubhayeli; koonyana bakaShubhayeli nguYedeya. ₂₁NgoRehabhiya: koonyana bakaRehabhiya, intloko nguIshiya. ₂₂KumaItsare nguShelomoti; koonyana bakaShelomoti nguYahati. ₂₃Koonyana bakaHebron nguYeriya inkulu, noAmariya owesibini, noYahaziyeli owesithathu, noYekamam owesiné. ₂₄Oonyana bakaUziyeli nguMika; koonyana bakaMika nguShamire. ₂₅Umkhuluwa kaMika nguIshiya; koonyana bakaIshiya nguZekariya. ₂₆Oonyana bakaMerari nguMali noMushi, oonyana bakaYahaziya unyana wakhe. ₂₇Kwaoonyana bakaMerari ngooYahaziya unyana wakhe, noShoham, noSakure, noIbri. ₂₈NgoMali kuvele uElazare, ongabanga nanyana. ₂₉NgoKishe: oonyana bakaKishe nguYerameli. ₃₀Oonyana bakaMushi nguMali, noEdere, noYerimoti.

Ngabo abo oonyana babaLevi, ngokwezindlu zooyise. ₃₁Babawisela amaqashiso nabo kwanjengabazalwana babo, oonyana baka-Aron, phambi koDavide ukumkani, noTsadoki, noAhimeleki, neentloko zezindlu zooyise zababingeleli nezabaLevi: iinkulu zezindlu zooyise kwanjengabaninawa babo.