KUTIMOTI I 2

₁Ndiyavuselela ngoko kuqala kwiinto zonke, ukuba kwenziwe izikhungo, imithandazo, izibongozo, imibulelo, ngenxa yabantu bonke; ₂ngenxa yookumkani nabo bonke abasekongameni, ukuze sihlale ngokonwaba nangokuzola, sinokuhlonela uThixo, nokundileka konke. ₃Kuba oku kuhle, kwamkelekile emehlweni oMsindisi wethu uThixo; ₄onga yena bangasindiswa bonke abantu, bafikelele ekuyazini inyaniso. ₅Kuba mnye uThixo; mnye nomlamli phakathi koThixo nabantu, umntu uKristu Yesu, ₆lowo wazinikelayo ukuba abe yintlawulelo yokukhulula abantu bonke; ubungqina ke obo bokungqinwa ngamaxesha angawabo; ₇endithe ndamiselwa bona mna, ukuba ndibe ngumshumayeli nompostile• (ndithetha inyaniso ndikuKristu, andixoki), umfundisi weentlanga elukholweni nasenyanisweni.

₈Ngoko ndinga angathandaza amadoda kuzo zonke iindawo, ephakamisa izandla ezingcwele, engenangqumbo, engenantandabuzo.

₉Kwangokunjalo mabathi nabafazi banxibe iingubo ezifanelekileyo, beneentloni, benesidima, ingabi kukuphotha iinwele, nokunxitywa kwegolide neeperile,• nesambatho esixabiso likhulu; ₁₀mabathi (ngokufanele abafazi abathi bahlonela uThixo), bavathe imisebenzi elungileyo. ₁₁Umfazi, ezolile, makafunde ethobele konke. ₁₂Umfazi ke andimvumeli ukuba afundise, nokuba ayilawule indoda; makazole. ₁₃Kuba kwabunjwa uAdam kuqala, kwandula ke ukubunjwa uEva. ₁₄Kanjalo akulukuhlwanga Adam; kulukuhlwe umfazi, waba sekugqitheni. ₁₅Noko ke wosindiswa ngokuzala, ukuba bathe bema elukholweni, naseluthandweni, nasebungcwaliseni, benesidima.