UHOSEYA 8

₁Beka isigodle emlonyeni wakho. Utshaba luyirhiwula indlu kaYehova njengexhalanga; ngenxa yokuba bewugqithile umnqophiso wam, bakreqa kumyalelo wam. ₂Baya kukhala kum, bathi, Thixo wethu, siyakwazi, thina Sirayeli. ₃Iyanuka kuSirayeli into elungileyo; utshaba malumsukele.

₄Bamisé ookumkani, bengaveli kum; benzé abathetheli, ndingàzi mna; isilivere yabo negolide yabo bayenzé izithixo, ukuze inqanyulwe. ₅Ithole lakho liyanuka, Samari: umsindo wam uyavutha kubo; kunini na bengakwazi ukuziphatha msulwa? ₆Ngokuba nalo elo liphuma kwaSirayeli; lenziwe yingcibi, àliThixo lona; ke liya kucoleka ithole lakwaSamari. ₇Ngokuba behlwayelé umoya, baya kuvuna isaqhwithi. Akukho zimba kuwo; isithombo asenzi sikhwebu; nokuba besithe saba naso, besiya kudliwa ngabasemzini.

₈Úginyiwe uSirayeli; ngoku basezintlangeni njengempahla engananziweyo. ₉Kuba bona banyuke baya eAsiriya, njenge-esile lasendle lihamba lilodwa, lahlukile; ke yena uEfrayim uziqeshile izithandane. ₁₀Nakuba beqesha nokuqesha ezintlangeni, ndiya kubabutha ngoku, baqale banciphe ngenxa yomthwalo wokumkani wabathetheli. ₁₁Kuba uEfrayim uzandisile izibingelelo zokona; kuye izibingelelo zaba zezokona. ₁₂Ndimbhalela into eninzi yemiyalelo yam; bayicingela into engento. ₁₃Imibingelelo yezipho zam bayayibingelela, bayidla ngokwenyama; ke àyakholeka kuYehova; ngokunje uya kubukhumbula ubugwenxa babo, azivelele izono zabo; baya kubuyela bona eYiputa. ₁₄Kuba uSirayeli wamlibala uMenzi wakhe, wákha amabhotwe; uYuda wayandisa imizi enqatyisiweyo. Ke mna ndiya kuthumela umlilo emizini yakhe, uzidle iingxande zakhe ezinde.