ABAGWEBI 5

₂Ngenxa yokukhokela kweenkokeli,

Ngenxa yokuqhutywa kwabantu ziintliziyo zabo,

Bongani uYehova.

₃Yivani, bokumkani; bekani iindlebe, zidwangube;

Mna lo ndiya kuvuma kuYehova,

Ndiya kumbethela uhadi uYehova, uThixo kaSirayeli.

₄Yehova, ekuphumeni kwakho kwaSehire,

Ekunyalaseni kwakho, uvela emhlabeni wakwaEdom,

Lanyikima ihlabathi, lavuza nalo izulu;

Ewe, amafu avuza amanzi.

₅Iintaba zazamazama phambi koYehova;

ISinayi leya, phambi koYehova uThixo kaSirayeli.

₆Ngemihla kaShamgare, umfo ka-Anati.

Ngemihla kaYaheli, bezingàhanjwa iindlela,

Ababehamba ngeengqushu bahamba ngeendlela eziziphambusa.

₇Ebengamiwa amaphandle kwaSirayeli, ebengamiwa,

Ndada ndesuka, mna Debhora,

Ndesuka ndaba ngunina kwaSirayeli.

₈Kwakunyulwe oothixo abatsha,

Kwaza kwayimfazwe emasangweni;

Ingweletshetshe nomkhonto wawubonwa yini na,

Phakathi kwamawaka amashumi mané akwaSirayeli?

₉Intliziyo yam ingakubamisi-mthetho bakwaSirayeli,

Ingakwabo baqhutywa yintliziyo yabo phakathi kwabantu;

Bongani uYehova.

₁₀Nina bakhwele ezimazini ezimhlophe zamaesile,

Nina bahlala ezinkukweni,

Nani bahamba ngendlela, camngcani.

₁₁Kùde nezwi lababi bamaxhoba, apho kukhiwa khona amanzi,

Khona apho bobonga imisebenzi kaYehova yobulungisa,

Imisebenzi yobulungisa awayenza emaphandleni akhe kwaSirayeli;

Oko behla abantu bakaYehova, baya emasangweni.

₁₂Vuka, vuka, Debhora!

Vuka, vuka, hlaba ingoma!

Suk' ume, Bharaki, thimba abathinjwa bakho, nyana ka-Abhinowam.

₁₃Yihlani ke, maqongqolo aziingangamsha, ningabantu;

Yehova, ndíhlele phakathi kwamagorha.

₁₄Avela kwaEfrayim angcambu ikwa-Amaleki,

Emva kwakho, Bhenjamin, phakathi kwezizwe zakowenu;

Kwehla kwaMakire abamisi-mthetho,

KwaZebhulon umqikela unomnqayi wombhali wempi.

₁₅KwaIsakare abathetheli kunye noDebhora,

NjengoIsakare, ukwanjalo uBharaki;

Bagaleleka entilini, bamlandela.

Emijelweni yakwaRubhen

Yaba kukusongela okukhulu kwentliziyo.

₁₆Ubuhlaleleni na phakathi kwezibaya,

Uphulaphula amakhwelo emihlambini?

Emijelweni yakwaRubhen

Yaba kukugocagoca okukhulu kwentliziyo.

₁₇UGiliyadi phesheya kweYordan walala, àkalwa;

UDan ke yena walibala yini na ngasezinqanaweni?

UAshere wahlala ngaselunxwemeni lolwandle.

Walala phantsi ngasemachwebeni alo, àkalwa.

₁₈AmaZebhulon ngabantu ababenza isichenge ubomi babo ekufeni,

NamaNafetali, ezindaweni eziphakamileyo zelizwe.

₁₉Kwafika ookumkani, balwa,

Baza ookumkani bakwaKanan balwa

ETahanaki, ngasemanzini aseMegido;

Àbathimba neqhosha lesilivere.

₂₀Zalwa ezulwini,

Zalwa iinkwenkwezi emendweni yazo noSisera.

₂₁Umlanjana waseKishon wabakhukulisa,

Umlanjana wamanyange, umlanjana waseKishon.

Nyathela ngamandla, mphefumlo wam.

₂₂Aza angqisha ke ngamanqina amahashe

Ngokuphala, ngokuphala anamandla kuwo.

₂₃Qalekisani iMerozi, satsho isithunywa sikaYehova,

Qalekisani, qalekisani abemi bakhona.

Ngokuba bengezanga kunceda uYehova,

Kunceda uYehova phakathi kwamagorha.

₂₄Makasikelelwe kunezinye iintokazi uYaheli,

UmkaHebhere umKeni.

Makasikelelwe kuneentokazi ezisezintenteni.

₂₅Wacela amanzi, wamnika amasi,

Ngesitya sezinhanha wasondeza ingqaka.

₂₆Wasa isandla sakhe esikhonkwaneni,

Wasa esokunene esandweni sabasebenza kanzima,

Wamkhanda uSisera, wamhlekeza intloko,

Wamhlaba, wambhodloza ezintlafunweni.

₂₇Waguqa ezinyaweni zakhe, wawa, walala phantsi.

Waguqa ezinyaweni zakhe, wawa;

Apho waguqa khona, wawa ephelile.

₂₈Walunguza ngefestile, wamemeza

Ngesithuba unina kaSisera, wathi,

Ilibele yini na inqwelo yakhe yokulwa, ingafiki nje?

Zihlaleleni na iinqwelo zakhe zomkhosi, zingahlokomi nje?

₂₉Aphendule alumkileyo amakhosazana akhe —

Ke yena aphinde kwaelakhe, ethetha yedwa, athi,

₃₀Àbafumene na? Àbâbi amaxhoba na?

Yintombi, ziintombi ngambini kwintloko yendoda?

Ngamaxhoba eengubo ezimfakamfele kuSisera?

Ngamaxhoba eengubo ezimfakamfele, eengubo ezilukwe zamfakamfele?

Yingubo emfakamfele, ziingubo ezimbini ezilukwe zamfakamfele ezintanyeni zamaxhoba?

₃₁Makube njalo ukubhubha kweentshaba zakho zonke, Yehova;

Ke abamthandayo mababe njengokuphuma kwelanga linamandla.