UYOBHI 17

₁Umoya wam wonakele, imihla yam icinyiwe,

Into yam ngamangcwaba.

₂Inene ndiyinto abadlala ngayo,

Neliso lam lilibéle ziinkani zabo.

₃Khawubeke into, undimele;

Ngubani na yena oya kubambana nam ngesandla?

₄Ngokuba intliziyo yabo ùyifihlele ukuqiqa;

Ngenxa yoko akuyi kubaphakamisa.

₅Unikela abahlobo ukuba babe ngamaxhoba,

Amehlo abantwana bakhe aze aphelelwe.

₆Undimise ndaba ngumzekeliso ezizweni;

Ndaba ngotshicelwa ebusweni.

₇Laza lanorhatyazo iliso lam kukukhathazeka;

Amalungu am aba njengesithunzi onke ephela.

₈Bamangaliswa abathe tye yile nto;

Omsulwa uyazixhokonxa ngenxa yentshembenxa.

₉Ke olilungisa ubambe indlela yakhe,

Ozandla zihlambulukileyo uya ekhalipha.

₁₀Kodwa nina nonke, buyani, khanize;

Andiyi kufumana silumko phakathi kwenu.

₁₁Imihla yam idlule, zijaciwe izigqibo zam,

Amafa entliziyo yam.

₁₂Bathi ubusuku yimini;

Ukukhanya kusondele, xa kuza kuba mnyama.

₁₃Ukuba ndithe ndathemba, ndithembé elabafielyo, indlu yam;

Ndandlala umandlalo wam emnyameni;

₁₄Ukuba ndithe kukubola, Ùngubawo;

Ndathi kwimpethu, Ùnguma, ùngudade wethu:

₁₅Liphi na ke ngoku ithemba lam?

Ithemba lam, ngubani na owolibona?

₁₆Liya kuhla liye emivalweni yelabafileyo,

Xa siphumla kunye eluthulini.