UYOBHI 24

₁Yini na ukuba kungàbekwa maxesha nguSomandla?

Yini na ukuba abamaziyo bangaziboni iimini zakhe?

₂Kushenxiswa imilimandlela;

Kuphangwa imihlambi, yaluswe.

₃Kuqhutywa kumkiwe ne-esile lenkedama,

Kubanjiswe ngenkomo yomhlolokazi.

₄Kugilwa amahlwempu endleleni,

Bazímele ndawonye abaziintsizana belizwe.

₅Khangela, njengamaesile asendle entlango,

Baphuma ngomsebenzi wabo, befuna kwakusasa into yokudla;

Inkqantosi sisonka sabantwana kubo.

₆Esisimini bavuna ukutya kwabo,

Babhikice esidiliyeni songendawo.

₇Balala zé bengenangubo,

Àbananto yokuzigubungela engqeleni,

₈Bayanetha sisiphango seentaba;

Bancathama ngeliwa, bengenandawo yakuzímela.

₉Kuhluthwa ebeleni iinkedama,

Koniwe abaziintzisana.

₁₀Bahamba zé, bengenangubo;

Bathwala izithungu, belambile.

₁₁Phakathi kweendonga zâbaya bakhama ioli,

Baxovula ezixovulelweni zewayini, benxaniwe noko.

₁₂Emizini kugula amadoda,

Nomphefumlo wabangxwelerhiweyo uyakhala;

Kanti uThixo akathi bubuhilihili.

₁₃Ngabo abo bagwilika ekukhanyeni;

Abanakwazana neendlela zako,

Abahlali ezingqushwini zako.

₁₄Kusathi qhiphu ukusa, kuvuka isihange,

Sibulale iintsizana namahlwempu;

Ebusuku sibe njengesela.

₁₅Iliso lomkrexezi ligciné ungcwalazi;

Ùthi, Akukho liso liya kundalama,

Anxibe isigqubuthelo ebusweni.

₁₆Bagqobhoza izindlu emnyameni;

Emini bayazivalela,

Abazani nokukhanya.

₁₇Ngokuba ubumnyama obuthe shinyi bukukuza kokusa kubo bonke;

Ngokuba bazana nokhwankqiso lobumnyama obuthe shinyi.

₁₈Bayakhawuleza phezu kwamanzi;

Sitshabhisiwe isabelo sabo ehlabathini;

Abasasingi endleleni yesidiliya.

₁₉Amanzi ekhephu ahluthwa ngumqwebedu nakukubalela;

Aboni bahluthwa lelabafileyo.

₂₀Sibalibele isizalo; iimpethu ziyabamunya,

Ababi sakhunjulwa;

Baphulwe ke njengomthi ubugqwetha.

₂₁Bamphanga kakubi oludlolo, ongazalanga;

Abangamenzelanga okulungileyo umhlolokazi.

₂₂Wolula imihla yeembalasane ngamandla akhe,

Ziphakame bezise zibuncamile ubomi.

₂₃Uzinika inkoloseko, zayame,

Amehlo akhe abe phezu kweendlela zazo,

₂₄Ziphakame: kube mzuzwana zingabikho.

Zithe ngqu, zibuthiwe njengabanye bonke,

Zinqanyulwe njengesikhwebu sengqolowa.

₂₅Ukuba kanti akunjalo, ngubani na owondenza othetha amanga,

Akwenze into engento ukuthetha kwam?