UYOBHI 28

₁Kuba kukhó apho iphuma khona isilivere,

Nendawo yegolide abayihluzayo.

₂Isinyithi sithatyathwa eluthulini,

Banyibilikisa amatye abe lubhedu.

₃Baphelisa ubumnyama,

Bebhekisa eziphelweni zonke,

Begocagocela amatye asesithokothokweni nawasebumnyameni obuthe shinyi.

₄Bemba umngxuma kude kwabemiyo,

Belityelwe lunyawo lwabahambi;

Baxhomekile bekude nabantu, bayajinga.

₅Umhlaba — kuphuma ukutya kuwo;

Umzantsi wawo ubhukuqwa ngathi ngumlilo.

₆Indawo yesafire• ngamatye awo,

Amagada egolide akuyo;

₇Yingqushu engaziwa xhalanga,

Engathiwanga nzo liso lantloyiya,

₈Enganyathelwanga thole lanyamakazi inyalasayo,

Engahanjwanga nayingonyama.

₉Usa isandla sakhe nakwiqhwitha,

Uzibhukuqa ezingcanjini iintaba.

₁₀Ugqobhoza imijelo emaweni;

Libona zonke izinto ezinqabileyo iliso lakhe.

₁₁Uvingca imilambo ingavuzi,

Okufihlakeleyo akukhuphele emhlotsheni.

₁₂Ke bona ubulumko bufunyanwa phi na?

Iphi na indawo yengqondo?

₁₃Àkalazi umntu ixabiso labo;

Àbufunyanwa ezweni labahleliyo.

₁₄Amanzi enzonzobila athi, Àbukum;

Ulwandle luthi, Àbunam.

₁₅Àkurholwa golide ithe shinyi esikhundleni sabo;

Àkulinganiswa silivere ibe yintengo yabo.

₁₆Abumelwa yigolide ecikizekileyo yakwaOfire,

Nesardonisi• enqabileyo, nesafire.•

₁₇Azinakulingana nabo igolide negilas;

Abunakwananana neempahla zegolide engcwengiweyo.

₁₈Zingasakhunjulwa iikroale• neekristale,•

Ukuzuzwa kobulumko kuphezu kweeperile.•

₁₉Ayinakulingana nabo itopazi• yakwaKushi;

Abumelwa yigolide ecikizekileyo, ecocekileyo.

₂₀Ubulumko buvela phi na ke,

Yiyiphi na indawo yengqondo?

₂₁Bufihlakele emehlweni eento zonke eziphilileyo;

Busithakele nasezintakeni zasezulwini.

₂₂Inzonzobila nokufa kuthi,

Sibuvile ukubuva ngendlebe.

₂₃NguThixo oyiqondayo indlela yabo,

Nguye oyaziyo indawo yabo.

₂₄Kuba yena ubheka eziphelweni zehlabathi,

Ubona phantsi kwamazulu onke;

₂₅Ngokuwenzela umoya ubunzima bawo,

Namanzi awalinganise ngomlinganiso;

₂₆Ekuyenzeleni kwakhe imvula ummiselo,

Nombane wendudumo indlela:

₂₇Waza wabubona, wabubala;

Wabumisa, wabugocagoca nokubugocagoca;

₂₈Wathi emntwini: Yabona, ukoyika iNkosi, bubulumko obo,

Nokutyeka ebubini kuyingqondo.