UYOBHI 31

₁Ndiwamisele amehlo am umnqophiso;

Ndingáthini na ukuqwalasela entombini?

₂Besiya kuba yini na isahlulelo sikaThixo esivela phezulu,

Nelifa loSomandla elivela ezindaweni eziphakamileyo?

₃Ukusindeka asikokogqwethayo yini na,

Neshwangusha asilelabenzi bobutshinga yini na?

₄Akaziboni na yena iindlela zam,

Awabale onke amabanga am?

₅Ukuba ndibe ndihamba nokhohlakeleyo,

Lwangxamela inkohliso unyawo lwam,

₆Makandilinganise esikalini• sobulungisa,

Ákwazi uThixo ukugqibelela kwam.

₇Ukuba ebethe gu bucala amabanga am endleleni,

Yalandela amehlo am intliziyo yam,

Sanamathela isisihla ezandleni zam:

₈Mandihlwayele, kudle omnye,

Iingcambu zabaphume kum zincothulwe.

₉Ukuba ibihendekile intliziyo yam ngenxa yomkamntu,

Ndalalela esangweni lommelwane wam,

₁₀Umkam makasilele omnye umntu,

Kuguqe abanye phezu kwakhe.

₁₁Kuba loo nto bubugqwirha,

Loo nto bubugwenxa phambi kwabagwebi.

₁₂Inene, loo nto ngumlilo odla use enzonzobileni;

Ibiya kuncothula iingcambu zongeniselo lwam lonke.

₁₃Ukuba ndibe ndilahle ilungelo lomkhonzi wam nelomkhonzazana wam,

Bakubambana nam,

₁₄Bendingáthini na ukwenza, xa athe uThixo wesuka waphakama?

Xa athe wavela, bendingáthini na ukuphendula?

₁₅Owandenzayo ezibilinini akamenzanga na naye?

Owasimilisa esizalweni akamnye na?

₁₆Ukuba ndibe ndisala nabakungxameleyo abasweleyo,

Ndawaphelisa amehlo omhlolokazi,

₁₇Ndawudla ndedwa umthamo wam,

Ayadla inkedama kuwo:

₁₈Hayi bo! Kwasebuncinaneni bam inkedama yakhulela kum, ngathi ikuyise,

Ndamalathisa umhlolokazi nasesizalweni sikama.

₁₉Ukuba ndibe ndimbona otshabalalayo engenanto yokwambatha,

Ihlwempu lingenanto yokuzigubungela;

₂₀Ukuba abengàndisikeleli amanqe akhe,

Àkazifudumeza ngoboya beemvana zam;

₂₁Ukuba bendilingisile ngesandla sam kwinkedama,

Ngokuba bendiboné uncedo lwam esangweni:

₂₂Igxalaba lam maliwe esixhantini salo,

Nomkhono wam waphuke ethanjeni lawo.

₂₃Bekuya kuba kum ukunkwantya, ukusindeka nguThixo,

Ndikhohlwe phambi kokuphakama kwakhe.

₂₄Ukuba bendenze igolide inqolonci yam,

Ndathi kwecikizekileyo, Nkoloseko yam;

₂₅Ukuba bendikuvuyela ukuba buninzi kobutyebi bam,

Nokufumana kakhulu kwesandla sam;

₂₆Ukuba bendilibona ilanga likhupha imitha,

Nenyanga ihamba indilekile,

₂₇Yahendeka ngasese intliziyo yam,

Ndasangela ngomlomo wam isandla sam:

₂₈Nako oko ngekuba bubugwenxa phambi kwabagwebi;

Kuba ngendiba ndimkhanyele uThixo waphezulu.

₂₉Ukuba ndibe ndivuyela ilishwa londithiyayo,

Ndaxhumela ukuba efunyenwe bububi

₃₀(Ke andilivumelanga ikhuhlangubo lam, ukuba lone,

Ndiwùcele ngentshwabulo umphefumlo wakhe);

₃₁Ukuba babengàtsho abantu bentente yam, ukuthi,

Angaba ngubani na ongahluthanga yinyama yakhe?

₃₂Ubengalali phandle umphambukeli,

Iingcango zam bendizivulela endleleni;

₃₃Ukuba bendilugubungela ukreqo lwam, njengoAdam,

Ngokuqhusheka ubugwenxa bam esifubeni sam,

₃₄Ngakuba bendingcangcazela phambi kwengxokolo eninzi,

Ndaqhiphuka umbilini kukudelwa yimizalwane,

Ndathi cwaka, andaphuma emnyango —

₃₅Andaba bendinondiphulaphulayo!

Nangu umqondiso wam, uSomandla makandiphendule;

Nantsi incwadi ayibhalileyo obambene nam.

₃₆Inene, ndoyithwala ngesixhanti nam,

Ndoyithi jize kum njengesithsaba.

₃₇Inani lamabanga am ndomxelela,

Ndimsondele njengengànga.

₃₈Ukuba umhlaba wam ubukhala ndim,

Nemiqela yawo yalila kunye nawo;

₃₉Ukuba bendiwadla amandla awo kungekho mali,

Ndabanga ukuba uphume umphefumlo womniniwo:

₄₀Makuphume amakhakakhaka esikhundleni sengqolowa,

Nokhula esikhundleni serhasi.