UYOBHI 36

₂Khawenze kuhle, ndikutyele;

Kuba kusekho ukuthetha okusingisele kuThixo.

₃Ndiya kukuphakamisela entweni ekude ukwazi kwam,

Ndimnike ubulungisa uMenzi wam.

₄Okwenene, àkubuxoki ukuthetha kwam;

Ogqibeleleyo ngokwazi uphambi kwakho.

₅Yabona, uThixo unamandla, akacekisi bani;

Unamandla ngokuqina kwengqondo.

₆Akamlondolozeli ebomini ongendawo;

Iintsizana uzinika ibango lazo.

₇Akawasusi amehlo akhe kwabangamalungisa;

Úbahlalisa kunye nookumkani etroneni

Ngonaphakade, baphakame ke.

₈Ukuba bakhonkxiwe ngemixokelelwane,

Bebanjiwe ngezintya zeentsizi,

₉Úbaxelela izenzo zabo

Nezikreqo zabo; ngokuba bezenza amagorha.

₁₀Uzityhilela intethiso iindlebe zabo;

Uthi mababuye ebutshingeni.

₁₁Ukuba bathe beva, bamkhonza,

Boyigqiba imihla yabo ekulungeni,

Neminyaka yabo ebumnandini.

₁₂Ukuba bathe abeva, bogqithela emkhontweni,

Baphume umphefumlo bengenakwazi.

₁₃Ke abaziintshembenxa ngentliziyo babamba umsindo;

Abazibiki xa abakhonkxayo;

₁₄Úfe ke ebuncinaneni umphefumlo wabo,

Nobomi babo bube bobeng'awu kwindawo engcwele.

₁₅Úyamhlangula olusizana ngeentsizi zakhe,

Ayityhile indlebe yakhe ngokuxinwa kwabo.

₁₆Nawe úbengakukhululayo yena emlonyeni wembandezelo,

Akuse endaweni ebanzi, emzantsi ungacuthekileyo;

Nókubekwa etafileni yakho kuzale kukutyeba.

₁₇Ke wena uzele kukugweba kwabangendawo;

Ukugweba nokugwetywa kunako ukukubamba.

₁₈Kuba ubushushu mabungakuxhokonxeli ekutyhwakrazeni izandla,

Nobukhulu bocamagusho mabungàthi gu bucala.

₁₉Ukuzibika kwakho kokubeka ngaphandle kwembandezelo na,

Nemigushanxa yonke yamandla?

₂₀Musa ukuzonda ubusuku

Bokususa izizwe esikhundleni sazo.

₂₁Lumka, ungaguqukeli konobutshinga;

Kuba ùnyulé loo nto kuneentsizi.

₂₂Yabona, uThixo uphakamise ukwenza ngamandla akhe;

Ngubani na umyali onjengaye?

₂₃Ngubani na omphathise indlela yakhe;

Ngubani na ongáthi, Wènzé ngobugqwetha?

₂₄Khumbula ukuba úwukhùlise ngendumiso umsebenzi wakhe,

Awuhlabele ingoma amadoda.

₂₅Bonke abantu bayawubona;

Umntu uwukhangela emgama.

₂₆Yabona, uThixo mkhulu, asimazi;

Inani leminyaka yakhe aligocagoceki.

₂₇Kuba utsalela phantsi amathontsi amanzi,

Achaphaze eyimvula enkungwini yakhe,

₂₈Esiyinisayo isibhakabhaka,

Ivuze phezu kwabantu abaninzi.

₂₉Kanene baya kuqónda na ukwanekwa kwamafu,

Nokuzongoma komnquba wakhe?

₃₀Yabona, waneka phezu kwakhe ukukhanya kwakhe,

Azigubungele ngamazantsi olwandle.

₃₁Kuba ngezo nto ugqweba iziziwe,

Unika ukudla ngento eninzi.

₃₂Izandla zozibini uzigubungela ngombane,

Awuwisele umthetho ngokochanayo.

₃₃Ukugquma kwakhe kuyamxela,

Kwaneenkomo, ukuba úza kunyuka.