UYOBHI 37

₁Inene, ngale nto iyagubha intliziyo yam,

Ixhume endaweni yayo.

₂Phulaphulani, phulaphulani ukuguguma kwelizwi lakhe,

Nokudumzela okuphumayo emlonyeni wakhe.

₃Úkusingisa ngaphantsi kwezulu lonke,

Nombane wakhe uye emasondweni ehlabathi.

₄Emva kwawo kubhonga ilizwi;

Ududuma ngezwi lobungangamsha bakhe;

Akawulibazisi, xa livakalayo izwi lakhe.

₅UThixo ududuma ngezwi lakhe ngokubalulekileyo,

Esenza izinto ezinkulu esingenakuzazi.

₆Kuba úthi kwikhephu, Yiwa uwele emhlabeni;

Nakwisiphango semvula,

Nakwisiphango seemvula ezinkulu zakhe.

₇Isandla soluntu lonke uyasitywina asivingcele,

Ukuba babe nokwazi bonke abantu abenzileyo.

₈Amarhamncwa angena emlaleleni,

Ahlale ezikhundleni zawo.

₉Engontsini yasentla kuvela isaqhwithi;

Kumphephethi wasentla kuvela ukubanda.

₁₀Ngokuphefumla kukaThixo kuza umkhenkce,

Ububanzi bamanzi bucutheke.

₁₁Kananjalo usindanisa ilifu ngamanzi amaninzi;

Uphangalalisa amafu akhe abanekayo.

₁₂Wona ajikajika ngeenxa zonke ngokwalathiswa nguye,

Ukuze enze konke awawamisela khona

Ebusweni behlabathi elimiweyo;

₁₃Nokuba kungenxa yokubetha, nokuba kungenxa yehlabathi lakhe,

Nokuba kungenxa yenceba, uyawafikisa.

₁₄Oko kubekele indlebe, Yobhi;

Yima, uyigqale imisebenzi ebalulekileyo kaThixo.

₁₅Ùyazi na ukuwathwesa kukaThixo amafu akhe,

Nokubengezelisa kwakhe ukubaneka kwawo?

₁₆Ùyazi na ukulinganiselwa kwamafu,

Imisebenzi ebalulekileyo yoSokwazi?

₁₇Wena ungubo zifudumeleyo,

Lakuzola ilizwe lulophu lwasezantsi;

₁₈Ùsikhánda usolule naye na isibhakabhaka,

Esiqinileyo njengesipili esityhidiweyo?

₁₉Sázise esingákuthethayo thina kuye;

Asinakucacisa nto ngenxa yobumnyama.

₂₀Wóbikelwa na ukuthi ndiyathetha?

Umntu uthi makaginywe na?

₂₁Ke ngoku àkubonwa kukhanya

Kukhazimlayo, kusesibhakabhakeni;

Kudlula umoya, lise.

₂₂Entla kuziwa negolide;

Phezu koThixo yindili eyoyikekayo.

₂₃USomandla asinakumfumana, mkhulu ngamandla;

Akagwenxi siko nabuninzi bobulungisa.

₂₄Ngako oko bayamoyika abantu;

Akabakhathalele bonke abalumke ngokwabo.