UYOBHI 7

₁Àkaphumé mkhosi na ehlabathini umntu?

Àyinjengemihla yomqeshwa na imihla yakhe?

₂Njengesicaka esibe sizonda umthunzi,

Njengomqeshwa olinde umvuzo wakhe?

₃Ndenjenjalo ukwamkeliswa iinyanga ezinenkohliso,

Ndabalelwa nobusuku bobubi.

₄Ndakuba ndilele phantsi, ndithi,

Ndiya kuvuka nini na? Ukuhlwa kolukile,

Ndidikiwe kukuqikaqikeka kude kuse.

₅Inyama yam yambeswe iimpethu namagada omhlaba;

Ulùsu lwam lungamaqhula, lubhiqiza.

₆Imihla yam ikhawuleza ngaphezu komkhonjana womluki,•

Iphela kungekho themba.

₇Khumbula ukuba bungumoya ubomi bam;

Iliso lam aliyi kubuya likubone okulungileyo.

₈Aliyi kuba sandalama iliso londiboni leyo;

Amehlo akho ekum, ndingabikho.

₉Liphelile ilifu, limkile;

Unjalo ohla aye kwelabafileyo, akenyuki.

₁₀Akabi sabuyela endlwini yakhe,

Ingabi samazi indawo yakhe.

₁₁Nam andiyi kuwubamba umlomo wam;

Ndiya kuthetha ekubandezelweni komoya wam,

Ndikhalaze ebukrakreni bomphefumlo wam.

₁₂Ndilulwandle na, ndiyingwenya na,

Ukuba undimisele umlindo?

₁₃Xa bendisithi, Wóndithuthuzela umandlalo wam,

Sondithwalisisa inkalazo yam isingqengqelo sam:

₁₄Wesuka wena wandoyikisa ngamaphupha,

Wandidandathekisa emibonweni,

₁₅Wada umphefumlo wam wanyula ukukrwitshwa;

Wanyula ukufa ngaphezu kwamathambo la.

₁₆Ndikruqukile; andingi ndingadla bomi ngonaphakade;

Ndíyeke, kuba ingumphunga imihla yam.

₁₇Uyintoni na umntu lo, le nto umkhulisayo,

Le nto uyisingise kuye intliziyo yakho,

₁₈Umvelele imiso yonke

Umcikide imizuzu yonke?

₁₉Kunini na ungawasusi amehlo kum,

Ungandiyeki, khe ndiginye amathe?

₂₀Ndithé ndona, ndingákwenza ntoni na?

Wena mlindi woluntu,

Yini na ukuba undenze itekeni,•

Ndibe ngumthwalo kum?

₂₁Yini na ukuba ungasixoleli isikreqo sam, ungabudlulisi ubugwenxa bam?

Kuba kaloku ndiya kuzilalisa eluthulini;

Wòndondela kakhulu, ndingabikho.