IZILILO 4

₁Yoo! Isuke igolide yaba mncumevu;

isuke ecikizekileyo, elungileyo, yaba yeyimbi;

Asuke aphalazwa amatye engcwele ekujikeni kwezitrato zonke.

₂AbeZiyon abanqabileyo, ábamelwe yigolide engcwengiweyo,

Yoo! Babalelwa ekubeni yimiphanda yodongwe, umsebenzi wezandla zombumbi.

₃Kanti neempungutye ziyalirhola ibele, zanyise amathole azo;

Ke yona intombi yabantu bakowethu isuke yaba sisijorha, njengenciniba entlango.

₄Ulwimi losebeleni lunamathela ekhuhlangubeni lakhe linxano;

Abantwana bacela isonka, akukho ubaphulelayo.

₅Ababesidla ubuncwane baphanzile ezitratweni;

Ababephathwa ngeengubo ezibomvu bawola amazala.

₆Bukhulile ubugwenxa bentombi yakowethu ngaphezu kwesono seSodom,

Yona yabhukuqwáyo ngephanyazo, kungasiwanga sandla kuyo.

₇Babeqaqambile ababalulekileyo bayo ngaphezu kwekhephu; baye bemhlophe ngaphezu kwamasi;

Babeyingqombela imizimba ngaphezu kwekorale,• isibili sabo besinjengesafire;•

₈Imbonakalo yabo imnyama ngaphezu kocolothi;

Abanakaneki ezitratweni; ulùsu lwabo lutshele emathanjeni abo; lomile, lwanjengokhuni.

₉Baneyhweba ababulewe ngekrele kunababulewe yindlala,

Bona baphelayo ngokubulawa kukungabikho kweziqhamo zamasimi.

₁₀Izandla zabafazi abanemfesane zipheke abantwanana babo,

Baba kukudla kwabo ekwaphukeni kwentombi yabantu bakowethu.

₁₁Úbuphelelisile ubushushu bakhe uYehova, ukuphalazile ukuvutha komsindo wakhe;

Wafaka umlilo eZiyon, wazitshisa iziseko zayo.

₁₂Bebengenakukholwa ookumkani behlabathi, nabemi bonke belimiweyo.

Ukuba ubengángenayo umbandezeli notshaba emasangweni aseYerusalem.

₁₃Kungenxa yezono zabaprofeti bayo, nobugwenxa bababingeleli bayo,

Abaphalazé igazi lamalungisa phakathi kwayo.

₁₄Baphamzela beziimfama ezitratweni, bedyobhekile ligazi,

Bada abantu ababa nakuchukumisa nezambatho zabo.

₁₅Sukani, nantso inqambi! Kwatshiwo ukumenyezwa kubo. Sukani, sukani, musani ukuphatha!

Bakùsaba, baphamzela nalapho, kwathiwa phakathi kweentlanga,

Mabangaphindi baphambukele khona.

₁₆Ubuso bukaYehova bubachithachithile, akasayi kubabheka;

Ubuso bababingeleli ababubhekanga, amadoda amakhulu abawababalanga.

₁₇Thina, amehlo ethu ayaphela, ekhangele uncedo olungamampunge;

Ekuboniseleni kwethu sibonisela uhlanga olungayi kusisindisa.

₁₈Bazingela amanyathela ethu, ukuze singabi nakuhamba ezitratweni zethu;

Kusondele ukuphela kwethu, izalisekile imihla yethu; ewe, kufikile ukuphela kwethu.

₁₉Abasisukelayo banamendu ngaphezu kwamaxhalanga asezulwini;

Basisukela ezintabeni ngokushushu, basilalela entlango.

₂₀Umoya wamathatha ethu, umthanjiswa kaYehova, ubanjisiwe emihadini yabo:

Lowo besisithi, Siya kuhlala phantsi komthunzi wakhe ezintlangeni.

₂₁Yiba nemihlali uvuye kambe, ntombi yakwaEdom, ihleliyo ezweni lakwaUtse;

Iya kudlulela nakuwe indebe; ùya kunxila, uzihlube.

₂₂Bugqityiwe ubugwenxa bakho, ntombi inguZiyon;

Akayi kuphinda akufuduse;

Ùya kubuvelela ubugwenxa bakho, ntombi yakwaEdom.

Ùya kuzityhila izono zakho.