IMIZEKELISO 1

₁Imizekeliso kaSolomon unyana kaDavide, ukumkani wamaSirayeli,

₂Yokuba kwaziwe ubulumko noqeqesho;

Yokuba kuqondwe iintetho zengqondo;

₃Yokuba kwamkelwe uqeqesho lwengqiqo,

Ubulungisa, nesiko, nokuthe tye;

₄Yokuba izidenge zinikwe ubuqili,

Ulutsha lunikwe ukwazi nokunkqangiyela;

₅Ukuze eve osisilumko, aqokele afunde,

Oqondayo azuze amacebo obulumko;

₆Yokuba kuqondwe umzekeliso nezafobe zokuthetha,

Amazwi ezilumko nezintsonkotha zazo.

₇Ukoyika uYehova kukuqala kokwazi;

Ubulumko noqeqesho izimathane ziludelile.

₈Nyana wam, yiva uqeqesho lukayihlo,

Ungawulahli umyalo kanyoko.

₉Kuba ezo zinto zisisangqawe esihle entlokweni yakho,

Nezambalo emqaleni wakho.

₁₀Nyana wam, ukuba aboni bathe bakuhenda,

Uze ungavumi ke.

₁₁Ukuba bathe, Hamba nathi,

Masilalele igazi,

Masibalalele abamsulwa bengenatyala;

₁₂Masibaginye njengelabafileyo behleli,

Begqibelele, njengabehla baye emhadini;

₁₃Sofumana ubuncwane obunqabileyo,

Sozizalisa izindlu zethu ngamaxhoba;

₁₄Wena ke woliphosa phakathi kwethu iqashiso lakho,

Yoba nye ingxowa yethu sonke:

₁₅Nyana wam, musa ukuhamba ngendlela nabo;

Lunqande unyawo lwakho emendweni wabo.

₁₆Kuba iinyawo zabo zigidimela ububi,

Zikhawulezela ukuphalaza igazi;

₁₇Kuba úfumana usanekwa umnatha

Emehlweni eentaka ezi zonke;

₁₈Ke bona balalela elabo igazi,

Bazonda owabo umphefumlo.

₁₉Unjalo umendo wabo bonke abangxamele inzuzo embi;

Imka nomphefumlo womniniyo.

₂₀Ubulumko bumemeza ngaphandle,

Buvakalisa izwi labo ezitratweni.

₂₁Bumemeza emantloko eendawo zembutho;

Ekungeneni kwamasango,

Phakathi komzi, buthetha iintetho zabo, busithi:

₂₂Kunini na, ziyathandini, nithanda ubuyatha,

Abagxeki befuna ukugxeka,

Izinyabi zithiya ukwazi?

₂₃Nithe nabuyela ekohlwayeni kwam,

Niyabona, ndowumpompozisela kuni umoya wam,

Ndonazisa amazwi am.

₂₄Ngokokuba ndinibizile, anavuma,

Ndolulé isandla sam, akwabakho ukhathalayo;

₂₅Nesuka naliyeka necebo lam lonke,

Anavuma ndakunohlwaya.

₂₆Nam ke ndonihleka ekusindekeni kwenu;

Ndogculela ekufikeni kokunkwantyiswa kwenu;

₂₇Ekufikeni kokunkwantyiswa kwenu njengesithonga,

Ekuzeni kokusindeka kwenu njengesaqhwithi,

Ekufikelweni kwenu yimbandezelo nenkcutheko.

₂₈Baya kwandula bandibize, ndingaphenduli,

Bandifune kwakusasa, bangàndifumani;

₂₉Ngethuba lokuba bakuthiyile ukwazi,

Àbakunyula ukoyika uYehova;

₃₀Àbalivuma icebo lam,

Basigiba sonke isohlwayo sam:

₃₁Baya kudla ke isiqhamo sendlela yabo,

Bahluthe ngamacebo abo.

₃₂Kuba ukuphamba kweziyatha kuyazibulala,

Nobunqobo bezinyabi buyazitshabalalisa.

₃₃Ke yena ondivayo uhleli ekholosile,

Wonwabile ekunkwantyiseni kobubi.