IMIZEKELISO 29

₁Indoda eyohlwaywa futhi, íyenze lukhuni intamo yayo,

Iya kuchithakala ngephanyazo, kungabikho kuncedwa.

₂Ekwandeni kwamalungisa bayavuya abantu;

Ekulawuleni kongendawo bayagcuma abantu.

₃Indoda ethanda ubulumko ivuyisa uyise;

Olikholwane lamahenyukazi uchitha impahla yakhe.

₄Ukumkani ulimisa ilizwe ngesiko;

Ke yona indoda erhunywayo iyalibhukuqa.

₅Umfo ocengacenga ummelwane wakhe

Uthiyela iinyawo zakhe ngomnatha.

₆Elukreqweni lwendoda enobubi kubakho isirhintyelo;

Ke lona ilungisa limemelela livuye.

₇Ilungisa liyalazi ibango lesisweli;

Ke yena ongendawo akanangqondo yakulazi.

₈Amadoda agxekayo aphembelela isixeko;

Ke zona izilumko ziyawudambisa umsindo.

₉Yakumangalelana indoda elumkileyo nesimathane,

Soguguma sihleke, kungabikho kuthozama.

₁₀Amadoda amagazi ayabathiya abagqibeleleyo;

Nabathe tye, afuna umphefumlo wabo,

₁₁Isinyabi siya kukhupha konke ukufutha kwaso,

Ke sona isilumko sikudambisela embilinini yaso.

₁₂Umlawuli olibazela indlebe ilizwi lobuxoki,

Bonke abalungiseleli bakhe bangabangendawo.

₁₃Ihlwempu nendoda engumxinezeli bayaqubisana;

Umkhanyiseli wamehlo abo bobabini nguYehova.

₁₄Ukumkani ogweba ityala lezisweli ngenyaniso,

Itrone yakhe iya kuzinza ngonaphakade.

₁₅Intonga nesohlwayo sinika ubulumko;

Ke yena umntwana oyekelelweyo udanisa unina.

₁₆Ekwandeni kwabangendawo luyanda ukreqo;

Ke wona amalungisa aya kukubona ukuwa kwabo.

₁₇Mqeqeshe unyana wakho, wókuphefumlisa,

Awuyolise umphefumlo wakho.

₁₈Apho kungekho mbono baba yimiqhathu abantu;

Bakuwugcina umyalelo, hayi, uyolo lwabo!

₁₉Isicaka asiqeqeshwa ngamazwi;

Kuba siyaqonda, singakhathali.

₂₀Ùyayibona indoda engxamileyo ngamazwi ayo?

Kukho ithemba ngesinyabi kunayo.

₂₁Osifekethisayo kwasebuncinaneni isicaka sakhe

Uya kwenelwa lukhula ekupheleni.

₂₂Indoda enomsindo ixhaya ingxabano;

Umntu onobushushu uzele lukreqo.

₂₃Ikratshi lomntu liya kumthoba;

Ke yena omoya uthobekileyo ufumana uzuko.

₂₄Owahlulelana nesela uthiya umphefumlo wakhe;

Uyasiva isishwabulo, angaxeli.

₂₅Ukugubha ngumntu kunesirhintyelo;

Ke yena okholose ngoYehova uya kuphakanyiselwa phezulu.

₂₆Baninzi abafuna ubuso bomlawuli;

Ke lona ibango lendoda livela kuYehova.

₂₇Indoda enobugqwetha lisikizi kumalungisa;

Ondlela ithe tye lisikizi kongendawo.