IMIZEKELISO 3

₁Nyana wam, musa ukuwulibala umyalelo wam;

Intliziyo yakho mayiyibambe imithetho yam;

₂Kuba iya kukongeza imihla emide,

Neminyaka yobomi, noxolo.

₃Inceba nenyaniso mayingakushiyi;

Zínxibe kuwe emqaleni;

Zíbhale elucwecweni lwentliziyo yakho,

₄Ubabalwe ube nengqiqo entle

Emehlweni kaThixo nawabantu.

₅Kholosa ngoYehova ngentliziyo yakho yonke,

Ungayami okwakho ukuqonda.

₆Uze umazi yena ezindleleni zakho zonke;

Wówulungelelanisa umendo wakho.

₇Musa ukuba sisilumko kwawakho amehlo;

Yoyika uYehova usuke entweni embi.

₈Ukuphila kobakho enkabeni yakho,

Nokuqina emathanjeni akho.

₉Mzukise uYehova ngobuncwane bakho,

Nangentlahlela yongeniselo lwakho lonke:

₁₀Ózala amaqonga akho bubuninzi,

Nemikhombe yakho yokukhongozela iphuphume iwayini entsha.

₁₁Uqeqesho lukaYehova, nyana wam, musa ukulucekisa,

Ungakruquki sisohlwayo sakhe;

₁₂Kuba lo amthandayo uYehova uyamohlwaya,

Njengoyise esohlwaya unyana akholwayo nguye.

₁₃Hayi, uyolo lomntu ofumene ubulumko, Lomntu ozuze ingqondo!

₁₄Kuba lulungile urhwebo lwabo ngaphezu korhwebo lwesilivere,

Nongeniselo lwabo ngaphezu kwegolide embiweyo.

₁₅Bunqabile bona ngaphezu kwekorale,•

Nezinto zakho zonke ezinqwenelekayo azilingani nabo.

₁₆Imihla emide isesandleni sabo sokunene,

Kwesokhohlo sabo bubutyebi nozuko.

₁₇Iindlela zabo ziindlela ezimnandi,

Wonke umendo wabo uluxolo.

₁₈Bungumthi wobomi kwababambelela kubo,

Únoyolo obubambayo.

₁₉UYehova waliseka ihlabathi ngobulumko,

Walizinzisa izulu ngengqondo.

₂₀Agqobhoka amanzi anzongonzongo ngokwazi kwakhe,

Savuza umbethe isibhakabhaka.

₂₁Nyana wam, ezi nto mazingemki emehlweni akho:

Londoloza uzimaso nomnkqangiyelo.

₂₂Zóba bubomi emphefumlweni,

Nento entle emqaleni wakho.

₂₃Ùya kwandula uhambe ngendlela yakho úkholosile.

Lungabetheki unyawo lwakho.

₂₄Ukuba uthe walala, akuyi kunkwantya;

Wòlala, bube mnandi ubuthongo bakho.

₂₅Musa ukoyika lunkwantyiso luzayo ngesiquphe,

Nasithonga sabangendawo, sakufika.

₂₆Kuba uYehova uya kuba yinqolonci yakho,

Alugcine unyawo lwakho lungabanjiswa.

₂₇Musa ukwala nento elungileyo kolunge nayo,

Kwakuba kusemandleni esandla sakho ukuyenza.

₂₈Musa ukuthi kummelwane wakho, Hamba, wòbuya uze,

Ndokunika ngomso;

Kanti ùnayo.

₂₉Musa ukuyila ububi ngommelwane wakho,

Ehleli nawe yena ekholosile.

₃₀Musa ukubambana nomntu kungekho nto,

Engakuphathanga kakubi nje.

₃₁Musa ukuyimonela indoda engonyamelayo,

Unganyuli nanye kwiindlela zayo.

₃₂Kuba othi gu bucala úlisikizi kuYehova;

Ke lunabathe tye ucweyo lwakhe.

₃₃Ingqalekiso kaYehova isendlwini yongendawo;

Ke isithili samalungisa úyasisikelela.

₃₄Ngokubhekisele kubagxeki, uyabagxeka;

Ke abalulamileyo uyabababala.

₃₅Izilumko ziya kuludla ilifa uzuko;

Ke izinyabi zamkela umrhumo wokucukucezwa.